5
Ra ꞌbantsꞌa hɛꞌmi, ne ra Tꞌʉca Dɛti núꞌa̱ rá Tꞌʉ Ajua̱
1 Nepʉ dá handa ꞌnara ꞌbantsꞌa hɛꞌmi mi ha̱ ja rá ꞌyɛ ra ꞌñɛi núꞌa̱ to hudi ja rá hudi, ne xqui tꞌofo de mbo ne de møte, ne xqui seyo co yoto ya seyo.
2 De guehni dá handa ꞌnara ɛnxɛ xi mi ja rá tsꞌɛdi ne mi ña̱ ntsꞌɛdi mi ena:
―¿Ha gue di ꞌbʉi toꞌo di pɛꞌtsa ra nsɛqui da xøꞌtsa ya seyo ne da tʉntsꞌa ra ꞌbantsꞌa hɛꞌmi?
3 Pe mi joꞌo ni ꞌna de gue núꞌʉ bí ꞌbʉ mahetsꞌi nixi de núꞌʉ mi ꞌbʉcua ja ra ximhai, nixi de núꞌʉ xa du, himbi za to bi tʉntsꞌa núꞌa̱ ra ꞌbantsꞌa hɛꞌmi, nixi himbi za to bi hyandiꞌa̱.
4 Nuga xi dá nzoni ngueꞌa̱ himbi tsꞌʉdi ni ꞌna núꞌa̱ toꞌo mri ꞌñepi da tʉntsꞌa núꞌa̱ ra ꞌbantsꞌa hɛꞌmiꞌa̱ pa da hñeꞌti y nixi pa da hyandi.
5 Nepʉ ꞌna de núꞌʉ ya nda̱ bi ꞌñengagui:
―Oguí zoni, ꞌbʉi ꞌna xi ja rá tsꞌɛdi ngu ꞌnara zate, núꞌá̱ xqui ꞌñehe de yá ja̱ꞌi ra Judá ne de ra nda̱ Davi. Núꞌá̱ ha̱, go gueꞌa̱ xa nta̱te, hangue núꞌá̱ go dí ꞌñepabi da xøꞌtsa núꞌʉ yoto ya seyo pa da za da tʉntsꞌa núꞌa̱ ra ꞌbantsꞌa hɛꞌmi.
6 Nepʉ de guehni dá handi madetho de núꞌa̱ ra hudi ꞌnara Tꞌʉca Dɛti núꞌa̱ rá Tꞌʉ Ajua̱, mi hnequi ngu xqui tho, mi ꞌbahni madetho de núꞌʉ goho ya da̱ꞌɛnxɛ ne de núꞌʉ ya nda̱. Y núꞌa̱ ra Tꞌʉca Dɛtiꞌa̱ mi pɛꞌtsa yoto yá nda̱ni ne yoto yá da. Y núꞌʉ yoto yá da mi pɛꞌtsi, gueꞌʉ núꞌʉ yoto yá nda̱hi Ajua̱ núꞌʉ xa mɛhni ja gatho rá ngʉni ra ximhai.
7 Núꞌa̱ ra Tꞌʉca Dɛtiꞌa̱ bi joni pa bi hña̱nga núꞌa̱ ra ꞌbantsꞌa hɛꞌmi mi ha̱ ja rá ꞌyɛ ra ꞌñɛi núꞌa̱ toꞌo mi hudi ja rá hudi.
8 Y nu mi hña̱nga núꞌa̱ ra hɛꞌmiꞌa̱, núꞌʉ goho ya da̱ꞌɛnxɛ ne núꞌʉ ꞌnatemagoho ya nda̱, bi ndandiña̱hmuꞌʉ ja rá thandi ra Tꞌʉca Dɛti. Gatho núꞌʉ ya nda̱ mi ha̱ ya arpa ne ya njʉspi dega oro mi ñutsꞌi co ra tꞌutsꞌi; nura tꞌutsꞌiꞌa̱ gueꞌa̱ yá søcambeni ya gamfri.
9 Nehe mi tutiꞌʉ ꞌnara ꞌraꞌyo thuhu mi ena:
Nuꞌi go dí ꞌñepꞌaꞌi gui hña̱nga ra ꞌbantsꞌa hɛꞌmi, ne gui xøꞌtsa núꞌʉ yoto ya seyo pɛꞌtsi,
ngueꞌa̱ nuꞌi go bi thoꞌaꞌi ne xcá tangaguihe co ri ma̱ca ji, pa njabʉ bi za gue Ajua̱ bi ꞌyøtcꞌaguihe yá mɛtiguiheꞌa̱
núje stí ꞌñehehe de gatho ya ꞌmʉi gá ja̱ꞌi, ne de gatho ya hña̱qui, ne de gatho ya hnini, ne de gatho ya hai de maxøgue ra ximhai.
10 Ne xcá hñuxcahe dega nda̱ ne dega macja̱ de ja rá ꞌbɛfi Ajua̱,
nehe ma ga nda̱he ja ra ximhai.
11 Nepʉ dá øde ꞌra mi ña̱, y de guehni dá handa ya ꞌmotho ya ɛnxɛ, ya ꞌmo dega ꞌmotho, ne xqui gotꞌatho de habʉ mi hudi Ajua̱, ne habʉ mi ꞌbʉ núꞌʉ goho ya da̱ꞌɛnxɛ ne núꞌʉ ya nda̱,
12 ne mi ña̱ꞌʉ ntsꞌɛdi, ne mi ena:
Ra Tꞌʉca Dɛti núꞌa̱ bi tho,
dí ꞌñepi da nda̱, ne dí ꞌñepi da hña̱ni gatho ya hño,
ne ra mfa̱di, ne ra tsꞌʉtbi,
ne dí ꞌñepiꞌa̱ dra tꞌeꞌtsua rá nsu, ne dra nsunda, ne dra søcambeni.
13 Nehe dá øde bi ña̱ gatho núꞌʉ to bí ꞌbʉ mahetsꞌi ne ja ra ximhai, ne de njaꞌti ra ximhai, ne de ja ra ndehe, ne de mbo ra ndehe, gatho mi enaꞌʉ:
Drá søcambeni Ajua̱ núꞌa̱ toꞌo hudi ja rá hudi, nehe drá søcambeni ra Tꞌʉca Dɛti.
Drá tꞌeꞌtsua rá nsu, ne drá nsunda, ne dá hma̱ gue pɛꞌtsa ra tsꞌɛdi
pa nza̱ntho ne pa nza̱ntho.
14 Nepʉ núꞌʉ goho ya da̱ꞌɛnxɛ mi ena:
―¡Njabʉ gueꞌa̱!
Y núꞌʉ ꞌnatemagoho ya nda̱ bi ndandiña̱hmu ne bi xøcambeniꞌʉ núꞌa̱ toꞌo ꞌbʉi pa nza̱ntho.