Kisinlikou Kesiluh Sang Sohn
Oaralap en Kisinlikou wet
Kesiluhn Kisinlikou Sang Sohn ntingdier sang ni mengin pehn “Me Maho” ong sounkaweid en mwomwohdiso men, ede, Kaius. Sounntingo kapingkalahngankihong Kaius sawas me e wiahiong souleng teikan, e ahpw pil padahkihong en kaparki ih ohl emen me ede Diohtrepihs.
Audepe ni Oaralap
Tepin kisinlikou 1-4
Kapingpen Kaius 5-8
Keriapen Diohtrepihs 9-10
Kapingpen Demihtrius 11-12
Kaimwiseklahn kisinlikou 13-15
1
1 Sang me Maho—
Ong Kaius me I kin poakepoake mehlel.
2 Kompoakepahi, I kin kapakap pwe ke en pweida ni soahng koaros, oh ke en pil kehlail, duwehte omw kehlail ni pali ngehn.
3 I perenkihda kowahlap ni ahnsou me riata souleng ko pwarodo oh koasoiahda omw loalopwoatohng me mehlelo, duwehte omw kin momourki me mehlelo ahnsou koaros.
4 Sohte me I perenki sang ei rong me nei kompoakepahi kan kin momourki mour mehlel.
Kapingpen Kaius
5 Kompoakepahi, me mwahu omw loalopwoatohng doadoahk mwahu me ke kin wiahiong riata souleng kan, mehnda ma irail mehn keiru kei.
6 Re kin koasoiaiong tohn mwomwohdiso wet duwen omw limpoak. Eri, I peki rehmw, ke en pil sewese irail pwe re en kak woneweite nan arail seiloak, ni soahng kan me Koht pahn kupwurperenki.
7 Pwe ni arail tapihada seiloangki doadoahk en Krais, re sohte men ale sawas sang irail me seupwoson kan.
8 Eri, kitail souleng kan en sewese aramas pwukat, pwe kitail en wiahki ehu ni arail doadoahk en me mehlelo.
Diohtrepihs Oh Demihtrius
9 I kadarowohng tohn mwomwohdiso kisinlikou mwotomwot kis; ahpw Diohtrepihs, me inengieng en wiahla arail sounkaweid, sohte men rong ei koasoi.
10 Eri, ni ei pahn pwarowei, I pahn kapwarehda mehkoaros me e wia: soahng suwed kan me e koasoiakin kiht, oh pil likamw akan me e kin koasoia. Ahpw kaidehn soahng pwukatte; pwe e pil sohte kin kasamwo riata souleng kan ni arail pahn pwarodo. E pil keinapwihedi irail kan me men kasamwo irail, oh e pil song en pwakihasang irail nan mwomwohdiso!
11 Kompoakepahi, ke dehr alasang me suwed, ahpw ke en alasang me mwahu. Mehmen me kin wiewia me mwahu, iei ih sapwellimen Koht; a mehmen me kin wiewia me suwed e sohte wehwehki Koht.
12 Aramas akan koaros kin kahdamwahwih Demihtrius, oh me mehlelo pil kin kahdamwahwih. Eri, se pil kadehdehda, oh ke ese me at kadehde me mehlel.
Kaimwiseklahn Rahnmwahu kan
13 Soahng tohto mie me I men koasoiaiong uhk, ahpw I sohte men ntingiheki ingk oh mehn nting.
14 I koapworopworki me I pahn tuhwong uhk ni ahnsou keren; eri, kita ahpw pahn koasoipene.
15 Popohl en ieiang uhk.
Kiht koaros kompoakepahmw kan se rahnmwahu ong uhk. Eri, ke ahpw pil kihong at rahnmwahu ong emenemen kompoakepaht kan koaros.