4
Dipwisou kan ong Tehnpas Sarawio
(1 Nanmwarki 7.23-51)
1 Nanmwarki Solomon ketin wiahda pei sarawi prons ehu, me piht 30 keimw pahieu oh piht 15 ile.
2 E pil ketin wiahda dengk prons pwonopwon ehu, me piht isuh elep loal, piht 45 pwonopwon oh piht 15 sang apali lel apali.
3 Mie kapwat pohn keilen dengko, me wia irek riau. Kapwat ko mwomwen kouwol, me wiawihdahte patehng dengko.
4 Dengko mi pohn kouwol prons ehkriemen me sohpeipeseng, wad silimen sohpeila ekis wasa.
5 Keilen dengko mosulki ins 3. Keileo duwehte kilin ewen kep, welikekla liki duwehte wahnrohs. Kalon en pihl kerenieng nen limekid me kak audehda.
6 Re pil wiahda peisin eisek, limau mi palieir en Tehnpaso oh limau paliepeng, mehn widen mahn akan me kin wia meirong isihs. Oh en samworo kan mehn omwiomw pihl me mi nan dengk kalaimwuno.
7-8 Re wiahda dewen lamp kohl eisek, duwehte me mieier ko, oh tehpel eisek, oh kihdiong nan pere laud en nan Tehnpaso, dewen lamp wad limau oh tehpel wad limau apali apali. Re pil wiahda pwohl kohl epwiki.
9 Re pil wiahda kehl me kapilpene Tehnpaso ong samworo kan, oh pil ehu kehl masliki. Wenihmwen ewen kehl me mi nanpwungara kidikidkihla prons.
10 Dengko koasoansoandiong limwahn palieir en palimesehn keimw en Tehnpaso.
11-16 Uram pil wiahda einpwoat kei, sapwel kei, oh pwohl kei. E kaimwisekala soahng koaros me e inoukihong Nanmwarki Solomon me e pahn wiahda ong Tehnpaso:
Uhr riapwoato
Moangen uhr ko me mwomwen pwohl
Mwomwen sihn me mi ni moangen oapwoat oapwoat uhr ko
Pwohmakraneid prons 400 me irek pidahli moangen uhr ko
Kuruma eiseko
Peisin eiseko
Dengko
Kouwol ehk riemen me utungada dengko
Einpwoat, sapwel, oh pwohk ko
Uram me keieu samanih wiahda mehkot, e wiahkidahr dipwisou pwukat koaros prons melengileng, nin duwen me Nanmwarki Solomon mahsanih, mehn doadoahk ong nan Tehnpesen KAUN-O.
17 Nanmwarkio ketin wiahda mepwukat koaros nanpwungen Sukot oh Sereda nan Wahun Sordan.
18 Kiden dipwisou wiawihda kahrehda sohte emen me lemehda en teneki uwen prons me doadoahkala.
19 Nanmwarki Solomon pil ketin wiahda dipwisou kohl kei ong nan Tehnpaso: pei sarawi oh tehpel me pilawahn meirong ong Koht kin mi powe;
20 dewen lamp oh lamp kan me wiawihkihda kohl mwakelekel me kin ngkengken mwohn Wasa Sarawiheo, nin duwen me koasoandi;
21 kapwat wahnrohs kan, lamp kan, oh tihpw kan;
22 mehn kakunla lamp kan, pwohl kan, oh delen warpwohmwahu kan, oh pan kan mehn wisik mwoalus ngken. Dipwisou pwukat koaros wiawihkihda kohl tohr. Maslikin wenihmw kan en Tehnpaso oh wenihmw kan ong Wasa Sarawiheo kidikidki kohl.