4
Espíritue ndo Dio ko espíritue xi ningakonꞌen ndo Cristo
1 Jaꞌanta kichuuna, titikaonꞌanta kaxin ni ndachro ixi jeꞌe na̱ nichjaxin na̱ Espíritue ndo Dio. Jaꞌanta tsjeꞌenta á nduaxin nichjaxin na̱ Espíritue ndo Dio o̱ naꞌi. Ixi ntiꞌi ngataꞌa nunte jii kueya ni ncheya ixi ndachro na̱ jeꞌe na̱ nichjaxin na̱ espíritue ndo Dio ko nduaxinꞌa meꞌe.
2 Ko jaꞌanta jaꞌin tsichuxixinnta ngisen chónda Espíritue ndo Dio; kain sen ndachro ixi ndo Jesucristo kui̱i̱ ndo ngataꞌa nunte xasintajni xranchi naa chujni, sen meꞌe nduaxin chónda sen Espíritue ndo Dio.
3 Ko ni ndachro ixi ndo Jesús kuiꞌa ndo xranchi naa chujni, ni meꞌe chóndaꞌi na̱ Espíritue ndo Dio. Ko jeꞌe na̱ chónda na̱ espíritue xi ningakonꞌen ndo Cristo. Jaꞌanta ó kuinꞌennta ixi espíritu meꞌe xrokui̱i̱ ngataꞌa nunte, ko jai ó kui̱i̱ espíritu meꞌe.
4 Chjanꞌna, jaꞌanta ó chjenꞌen ndo Dio nta̱a̱, ko ó juacheꞌenta ni ncheya ixi Espíritue ndo Dio jii ngajinnta ícha soji ixi espíritue Xixronꞌanxrée jii ngataꞌa nunte xasintajni sojiꞌa.
5 Ko ni meꞌe titikaonꞌa na̱ ndo Dio, méxin nichja na̱ ti ndakoꞌa. Ko chujnie na̱ naxrajeꞌo nichja na̱ méxin tienxin kichuu na̱.
6 Ko jai̱na tikinixinꞌenna ndo Dio. Ko sen chúxin ndo Dio tinꞌen sen ngeꞌe ndachena sen. Ko ni titikaonꞌa ndo Dio, ni meꞌe tjaunꞌa na̱ tsinꞌen na̱ chijnie ndo. Jaña tsichúxinna ngisen chónda Espíritue ndo Dio ko ni chónda espíritue juancheya.
Ndo Dio tjueꞌe ndo chujni
7 Kichuuna, tsango tjuaꞌanta, xrokonda xrotjueꞌe kichuuna, ixi ti tjueꞌe kichuuni, ti meꞌe ti̱ꞌxi̱n ngajin ndo Dio. Ko ngisen tjueꞌe kichuu, sen meꞌe chjenꞌen ndo Dio, ko nduaxin jeꞌe sen chúxin sen ndo Dio.
8 Ko ngisen tjueꞌa ni kichuu, ni meꞌe chúxinꞌa na̱ ndo Dio ixi jeꞌe ndo tsango tjueꞌe ndo kain chujni.
9 Ndo Dio jaꞌin juakoxin ndo ixi tjuai̱na ndo, méxin xruanꞌan ndo Chjenꞌen ndo, xjan naakuaxon, kui̱i̱ xjan ntiꞌi nunte xasintajni ixi jeꞌe xjan tsajon xjan juachaxin tsechónna kain nchakon.
10 Ko ti tjuai̱na ndo Dio xrondachro ixi jeꞌa jai̱na tjueꞌena ndo Dio; jeꞌe ndo ícha saꞌó tjuai̱na ndo, méxin xruanꞌan ndo Chjenꞌen ndo kuenxin xjan ixi jai̱na ko jaña kuantsje xjan ijie̱ chondana.
11 Jaꞌanta kichuuna, siá ndo Dio ó tjuai̱na ndo, jaña kaxon xrokonda xrotjueꞌena sen kichuuna.
12 *Xroꞌan chujni bikon ndo Dio. Méxin, siá xrotjueꞌena ni kichuuna, meꞌe ndo Dio jii ndo ngaya aséei̱na, ko meꞌe nduaxin ícha xrotjueꞌeni ni kichuuni ngujngu nchakon.
13 Ndo Dio kuajon ndo Espíritue ndo chondana, méxin, nónaxinna ixi soji steniina ngajin ndo Dio ko jeꞌe ndo jii ndo ngajin jai̱na.
14 Méxin, jai̱na bikona ko ndachrona ixi Ndotáina Dio xruanꞌan ndo Chjenꞌen ndo ixi sincheméꞌe xjan ijie̱ sínká kain chujni jii ngataꞌa nunte xasintajni.
15 Ngisen titikaon ixi ndo Jesús Chjenꞌen ndo Dio, sen meꞌe jii sen ngajin ndo Dio ko jeꞌe ndo jii ndo ngajin sen.
16 Ko jaña noi̱na ko titikaꞌonna ixi ndo Dio tjuai̱na ndo. Ko jeꞌe ndo tsango tjueꞌe ndo chujni, ko ngisen tjueꞌe ndo Dio ko tjueꞌe sen kichuu sen, sen meꞌe stenii sen ngajin ndo Dio ko ndo Dio jii ndo ngajin jeꞌe sen.
17 Jaña nduaxin jai̱na ícha jian tjueꞌena ndo Dio, ko nchakon sinchéña ndo Dio ijie̱ xroxronkaꞌina, ixi jai̱na ti stena ngataꞌa nunte ntiꞌi tjueꞌe kichuuna xranchi jeꞌe ndo Jesucristo tjueꞌe ndo kain chujni.
18 Ngisen tachrjexin ñao tjueꞌe ndo Dio, sen meꞌe xrakonꞌa sen ixi jian tjueꞌe sen ndo Dio, meꞌe satji kain juaxrakon ixi ti nchexronkani meꞌe jitikaꞌo ijie̱, ixi sen xrakon xrachuxinꞌa sen ti jian tjueꞌeni ndo Dio.
19 Jai̱na tjueꞌena ndo Dio ixi jeꞌe ndo ícha saꞌó tjaunna ndo.
20 Siá xrojan ngisen ndachro: “Janꞌan tjuaꞌa ndo Dio”, ko ningakonꞌen sen sen kichuu sen, sen meꞌe ncheya sen. Ixi siá chujni tikon sen ko juaꞌi tjueꞌe sen, xranchi xrotjueꞌe sen Ndotáina Dio, ndo juaꞌi tikon sen.
21 Ndo Jesús kuetuai̱na ndo ixi ngisen tjueꞌe ndo Dio kaxon xrokonda xrotjueꞌe sen, sen kichuu sen.