Xroon saꞌó tsikjin ndo Pablo xruenꞌen ndo ndo Timoteo
1
Ndo Pablo kjinꞌen ndo ndo Timoteo
1 Janꞌan, Pablo, ntaꞌa xrée Ncháina Jesucristo ixi jaña tjaun ndo Dio, ndo tajon juachaxin tsechón chujni kain nchakon, ko ndo Jesucristo, ndo chonꞌenna tsi̱i̱ íjngo.
2 *Jaꞌa Timoteo kjinꞌan xroon jiꞌi ko xruanꞌan juajna, jaꞌa chjanꞌna, xjan nduaxin chuntia Ndotáina Dio ko Ncháina Cristo Jesús. Jeꞌe ndo tsikonóaꞌa ndo ko sintanchaoan ndo ko xrotjáa ndo juaxruxin.
Tsi̱i̱ chujni ndakoꞌa tsjako chijnie ndo Dio
3 Xranchi kuinóatáana ngajian nchakon sakjui̱ tjajna Macedonia, jaꞌa tituꞌa tjajna Éfeso ixi tsetuenꞌen kaxin ni ste ntiꞌa, ni ndakoꞌa tjako chijnie ndo Dio, ítsjakoꞌa na̱ jaña,
4 ko tetuenꞌen na̱ tsitikaonꞌa na̱ chijni xroꞌan xrée, chijnie ni bakeꞌe saꞌó. Chijni meꞌe jeꞌo ncheke̱ꞌto̱ na̱ ko tjakaxin kichuu na̱ ko xroꞌan xrée chijni meꞌe, ixi kain meꞌe tingijnaꞌi tsichuxin na̱ ngeꞌe tjaun ndo Dio ixi jeꞌe ndo tjaun ndo ícha xrochúntiani ngajin ndo.
5 Janꞌan tetuanꞌan jiꞌi ixi kain sen ícha xrotjueꞌe kichuu sen ixi ti xrotjueꞌe kichuu sen meꞌe ícha tsontjúá aséen sen ko ti jian xraxaon sen ko meꞌe tsjako ixi nduaxin chuntia sen Ncháina Jesús.
6 Ko ikaxin sen tjáñeꞌe sen ixi xrotjueꞌe kichuu sen, jeꞌo tjakaxin sen ko jiꞌi tingijnaꞌi sen.
7 Jeꞌo tjaun sen xrokjan sen xranchi ni tjako ley ko tienxinꞌa sen meꞌe, ko tienxin sen ngeꞌe tjako sen xranchi xrokjui chijni jian.
8 Ko jai̱na noi̱na ixi ngeꞌe kuetuanꞌan ndo Dio meꞌe jian, siá jai̱na nduaxin sinchekuenꞌenna chujni xranchi tjaun jeꞌe ndo.
9 Ó noi̱na ixi ley kuetuanꞌan Ncháina, jeꞌa jii kondeexin ni jian ncheꞌe. Ley kuetuanꞌan ndo Dio jii ley kondeexin ni ñaꞌi ko ni titikaonꞌa, ni yama ijie̱, ni nichjangíꞌe ndo Dio ko ni titikaonꞌa ti nichja ndo ko ni naatóñaxón ndotée ko janée ko ikaxin chujni,
10 ko kaxon ni chónda inaa chujni jeꞌa janchriꞌe ko jeꞌa ndoxiꞌe, ko xi tejuakao xi, ko nchri tejuakao nchri, ni te̱e ko ni nchekji chujni, ko ni ncheya, ko ni nichjaxin ndo Dio ixi jeꞌe na̱ ncheꞌe na̱ ti jian ko nduaxinꞌa meꞌe. Méxin ley kuetuanꞌan ndo Dio jii ley ixi tsingijna kain ni titikaonꞌa chijni jian.
11 Ixi jiꞌi chijni nduaxin ko jian tajon juachaxin tsechón chujni, ko jiꞌi ti kuetuanna ndo Dio, ndo tjúá, tsjakoꞌanta.
Ngeꞌe jian juincheꞌe ndo Dio ngajin ndo Pablo
12 Tajon juasiana ngajin Ncháina Jesucristo ixi juinchesojina ndo ko bikon ndo ixi jian titikaꞌon ndo, meꞌe chjána ndo ixra̱ sintaꞌa ngajin ndo.
13 *Maski seno kuanichjangíꞌa ndo ko bakitikaonꞌa ndo ko bakengi sen titikaon ndo ko chinga banichja kondee jeꞌe ndo, ko maski jaña juintaꞌa, ndo Dio tsango bikonóaꞌna ndo ixi nchakon meꞌe nónaꞌi ngeꞌe juintaꞌa ko kuichuxinꞌa ndo.
14 Ko Ncháina Jesús tsango juinchenchaonna ndo ixi kuajon ndo juachaxin tsitikaꞌon ndo, ko jaña chuntia ngajin ndo ko tjuaꞌa sen kichuuna ixi titikaꞌon ndo.
15 Jiꞌi ti nduaxin ko xrokonda ixi kainna tsitikaonna ixi ndo Jesucristo kui̱i̱ ndo ngataꞌa nunte ixi tsantsje ndo ijie̱ chónda kain chujni. Ko janꞌan ícha ndakoꞌa juintaꞌa.
16 Ko maski jaña juintaꞌa, ndo Dio ícha bikonóaꞌna ndo ixi jaña juakoxin Ncháina Jesucristo ixi jeꞌe ndo tsango jian ndo ko kuindoxinna ndo meꞌe janꞌan juakoxin ngajin kain chujni ixi sen tsitikaon ndo xrochónda sen juachaxin tsechón sen kain nchakon.
17 Méxin xrokonda tsajonna kain juasiai̱na ngajin ndo Rey tsakeꞌe kain nchakon, ndo naiꞌa tsenꞌen ko chujni juaꞌi tsikon na̱ ndo. Ko jeꞌo jeꞌe ndo Dio tituanꞌan ndo, ndo tsango noꞌe kain ngeꞌe. Jaña tsonꞌen.
18 Timoteo, jaꞌa chjanꞌna, ko tetuanꞌan ixi tsjacha tse̱tua ngajin ni ndakoꞌa tjako chijni ixi chuntia Ncháina ko jian xraxaoan. Ko jaꞌa sincheꞌe ti jian xranchi nichja sen kichuuna nchakon kuayeꞌé xrée Ncháina, sen nichjaxin ixi juachaxien ndo Dio.
19 Ixi kaxin sen ndakoꞌa xraxaon sen, méxin juinchetjáña sen ti jian bakitikaon sen Ncháina.
20 Jaña konꞌen xi Himeneo ko xi Alejandro, méxin janꞌan kuajon xa ngajin Xixronꞌanxrée ixi tsikaa jaa xa ko tsonoꞌe xa ixi juaꞌi xronichjangíꞌeni ndo Dio.