5
Xranchi xronichjeꞌena sen titikaon ndo Cristo
1 Chaxro nichjeꞌé sen tachríi; tuyakuteꞌa sen. Ko ti xrondache sen, nichjeꞌé sen xranchi xronichjeꞌé ndotáa. Ko kain chajan nichjeꞌé chán xranchi naa xjan kichuua.
2 Sen nachríi nichjeꞌé sen kaxon xranchi xrokjui janáa. Ko nchrichajan, nichjeꞌé nchrichan xranchi nichjeꞌé naa nchrichan kichuua; kain sen, jian nichjeꞌe sen.
3 Ko tingijna nchri kaꞌan siá nduaxin xroꞌan sen ndoꞌa nchra chónda nchra.
4 Ko siá xrojan nchri kaꞌan chónda chjenꞌen nchra o̱ xjantié nchra, jeꞌe sen meꞌe tikinixinꞌen sen tsingijna sen nchra ko kaxon xrokonda tayakonꞌen sen sen ndoꞌa sen, janée sen o̱ Ndotée sen, ixi kain jiꞌi ncheꞌe ndo Dio juaxruxin.
5 Sen nchri nduaxin kaꞌan ko jeꞌo sen tsikituꞌe sen, ícha xrochuntia sen ndo Dio ko ícha tinóatée sen ngajin ndo ko nichjeꞌe sen ndo tiie, nchakon.
6 Ko sen nchri, sen kaꞌan, ndakoꞌa ncheꞌe, sen nchri meꞌe xranchi tsikenꞌen sen jii sen maski jichón sen.
7 Tetuenꞌén kain sen tsitikaon sen ti nchekuenꞌen sen, ixi jaña xroꞌan chujni xronichja ndakoꞌa ixi jeꞌe sen.
8 Ko siá xrojan ngisen tsingijnaꞌi sen kichuu sen ko sen ndoꞌa sen, sen meꞌe tjako sen ixi nduaxinꞌa titikaon sen ndo Dio ko ícha ñaꞌi sen ixi ni chúxinꞌa ndo Dio.
9 Ko ti tsixintaxin xroon sen nchri, sen kaꞌan, jeꞌo tsixintaxin sen chónda níi ti ikán o̱ ícha nano, ko jeꞌo tsixintaxin sen nchri kuachónda naakua ndoxiꞌe.
10 Kaxon xrokonda tsichuxin na̱ sen nchri, sen kaꞌan ixi ndako ncheꞌe sen, xranchi tjaun ndo Dio: sen nchri kaꞌan chaxro juinchekangi sen chjenꞌen sen ko sen kaꞌan jian nichjeꞌe sen kichuu sen ko jian kuiyeꞌe sen ni kuiji ndoꞌe sen, ko jian bingijna sen sen titikaon ndo Cristo, ko bingijna sen ni niꞌe, ko kaxon bingijna sen ngajin ni chónda juachjaon, ko juincheꞌe sen kain ixra̱ jian.
11 Ko tasintaxinꞌanta nchri, sen kaꞌan, xranchrichájan, ixi ba̱ sincheꞌe sen juaxruxin tsuteꞌe sen íjngo ko tsintuꞌe sen ti ndachro sen xrojuincheꞌe sen ixra̱ ngajin Ncháina Jesucristo.
12 Kondeexin meꞌe tsama sen ijie̱ ixi sinchejexinꞌa sen ixra̱ xrojuincheꞌe sen ngajin Ncháina.
13 Ko kaxon sen nchri, sen kaꞌan, xranchrichájan chrjiko sen nchia ko nchia, ko seꞌe sen ko jeꞌa jeꞌo meꞌe; kaxon teki sen chijni kondeꞌa sen ko tajon roꞌa sen ko nichja sen chijni ndakoꞌa.
14 Méxin tjaꞌon ixi sen nchri, sen kaꞌan xranchrichájan cháña tsuteꞌe sen íjngo ko xrochónda sen chjenꞌen sen ko jian tayakonꞌen sen ndoꞌa sen. Ko jaña tsajonꞌa sen juachaxin ngajin Xiñaꞌi ixi tsjangíꞌe xa sen.
15 Ixi kaxin sen nchri, sen kaꞌan ó ngaxiton sen ko steruéꞌe sen ngeꞌe tjaun Xiñaꞌi.
16 Siá xrojan sen kichuuna, chónda sen nchri kaꞌan, xrokonda tayakonꞌen sen sen kaꞌan ixi jaña sen niꞌngo ítsingijnaꞌi sen nchri kaꞌan meꞌe, ixi ícha jian tsingijna sen nchri kaꞌan nduaxin xrokondeꞌe.
17 Ko xronichjana jian ixi sen tituanꞌan niꞌngo ko xrokonda xroxengeꞌe sen ꞌna̱ ko ícha jian tsonꞌen jiꞌi ngajin kain sen nchekuai̱na ko tjakoi̱na chijnie ndo Dio.
18 *Ixi chijnie ndo Dio ndachro: “Takeꞌanta ino roꞌa kuxinta ncheꞌe ixra̱”, ko kaxon ndachro: “Sen ncheꞌe ixra̱ tikinixinꞌen sen xroxengeꞌe sen ꞌna̱.”
19 Tianꞌa siá xrojan ngisen tjankataꞌa ijie̱ ngajin sen tetuanꞌan niꞌngo siá koꞌa yuu o̱ níi sen xrochronga ngeꞌe nduaxin konꞌen.
20 Ko sen nduaxin chónda ijie̱, nichjeꞌé sen ngataoxin ikon kain sen niꞌngo ixi jaña sen ikaxin jian xroxraxaon sen ko ísincheꞌa sen ti ndakoꞌa.
21 Tjanchaꞌa ngajin ikon ndo Dio ko Ncháina Jesucristo ko sen ángel kuincheꞌe ndo ixi titikáoan kain jiꞌi ko xrajeꞌo ncheꞌe ngajin kain chujni á chuxian sen o̱ naꞌi.
22 Ko tincheꞌa jañao ngisen sincheꞌe ixra̱ niꞌngo, ícha jian xrotsjeꞌe ngeꞌe tjakoxin sen, ba kaxon jaꞌa tsama ijie̱ xranchi jeꞌe sen. Ko jaꞌa tsjeꞌe ixi xroꞌan ijie̱ tsama.
23 Ko jaꞌa nanaó toniꞌa ixi tiín tsée, tiꞌa jeꞌo inda. Cháña tiꞌia nchíín xranvino.
24 Jíee kaxin chujni saꞌó tonoxin ti xratóñeꞌa na̱ ijie̱. Ko jíee ikaxin sen ícha takaꞌi tonoxin.
25 Jaña tonꞌen kaxon kaxin chujni ncheꞌe ixra̱ jian taka tonoxin, ko ikaxin maski jai tonoxinꞌa, íjngo nchakon xrokonda tonoxin.