Xroon tsikjin ndo Pablo xruenꞌen ndo ndo Tito
1
Ndo Pablo nichjeꞌe ndo ndo Tito
1 Janꞌan, Pablo, ntaꞌa xrée ndo Dio ko ndo Jesucristo kuincheꞌena ndo ixi sintakuanꞌan kain sen kuincheꞌe ndo Dio ko kaxon ixi xrochuxin sen ngeꞌe chuntiana ko meꞌe ti chijni nduaxin,
2 ko xrochonꞌen sen ti tsechón sen kain nchakon. Ndo Dio, ndo ncheyaꞌi, tsindachro ndo nduaxin jaña tsonꞌen ti xrakoꞌa nunte xasintajni.
3 Ko nchakon tsindachro ndo Dio ixi jaña tsonꞌen, jeꞌe ndo juinchenoi̱na ndo chijnie ndo ixi ikaxin sen juakoi̱na sen. Ko ndo Dio, ndo ncheméꞌe jíei̱na, kuetuanꞌan ndo ixi sintaꞌa xrée ndo ko tsjako chijnie ndo.
4 *Kjinꞌan xroon jiꞌi, Tito. Janꞌan tikuan xranchi chjanꞌna ixi kayuina chuntiana ndo Jesús. Juasie Ndotáina Dio ko ndo Jesucristo, ndo ncheméꞌe jíei̱na, jeꞌe ndo sintanchaoan ndo ko tsikonóaꞌa ndo ko xrotjáa ndo juaxruxin.
Ixra̱ sincheꞌe ndo Tito tjajna Creta
5 Nchakon kuintuꞌa nunte jii ngusine ndachaon ndatinꞌin Creta ixi xrokuetuenꞌén sen jii ntiꞌa xranchi sincheꞌe sen ko xrojuinchejexian ixra̱ titjáña ko xrondachrua ngisen tsetuanꞌan ngujngu niꞌngo jii tjajna xranchi kuetuanꞌan janꞌan.
6 *Xrokonda ixi ngisen jitaoꞌen niꞌngo jian sincheꞌe sen ixi jaña xroꞌan ngisen tsjankataꞌa na̱ sen ijie̱, ko xrochónda sen naakua janchriꞌe sen, ko chjenꞌen sen xrokonda tsitikaon xjan Ncháina Jesucristo, ko jaña xroꞌan chujni tsjankataꞌa xjan ijie̱ ko jian tsitikaon xjan.
7 Jaña sen jitaoꞌen niꞌngo, sen meꞌe tikinixinꞌen sen xrondachro sen xranchi tsonꞌen xrée ndo Dio, xrokonda naa ngisen jian tsakeꞌe ixi jaña tsjankataꞌi na̱ sen ijie̱. Ko sinchejiéꞌa sen aséen sen, ko takaꞌi xrochjée sen juañao. Ko xrokuanꞌi sen, ko tse̱to̱ꞌa sen ngajin chujni ko sincheyaꞌi sen ixi jaña xrotsé sen tomi tjúáꞌi.
8 Ko jian tsayéꞌe sen xrojan ngisen tsiji ndoꞌa sen; xrokonda sincheꞌe sen ti jian; jian xroxraxaon sen ko ndako sincheꞌe sen ngajin ngixeꞌi chujni. Ko nchijíi aséen sen tsakeꞌe sen ngajin ndo Dio ko ixi nchijíi aséen sen sincheꞌe sen xrée nchée sen.
9 Ko kaxon xrokonda tsintueꞌa sen chijni jian kuayéꞌe sen ixi jaña tsjakoꞌe sen ikaxin sen kichuu sen chijni jian, ko kaxon jaña sinchendá sen aséen ni ndachro jeꞌa nduaxin ngeꞌe tjakona.
10 Ixi jii itsjé ni titikaonꞌa, ni meꞌe ste ngakjenꞌen ni judío, ni nichja xranchi naa ni ninta ko ncheyeꞌe na̱ ikaxin chujni.
11 Ni meꞌe xrokonda tsijeꞌe̱ni roꞌa na̱ ixi nchetjáñajin na̱ kain sen ste naa nchia ixi jeꞌo tjako na̱ ngeꞌe nduaxinꞌa ko jeꞌa jian, ixi jaña tsjacha na̱ kueya tomi.
12 Naa xi tjajnée sen, tjajna Creta, tsindachro xa: “Kain chujni tjajnána tsango ncheya na̱ ko tsango jieꞌe na̱ ko tsango ine na̱ ko tsango seꞌe na̱.”
13 Ti tsindachro xa nduaxin meꞌe. Méxin, Tito, soji nichjeꞌé sen kichuuna ixi jian xrochuntia sen ndo Dio.
14 Nichjeꞌé sen ixi tsienꞌa sen kain ngeꞌe teki ni judío, ko tsitikaonꞌa sen ngeꞌe tetuanꞌan ni ningakonꞌen chijnie ndo Dio, chijni nduaxin.
15 Ni jian xraxaon, kain ngeꞌe ncheꞌe na̱ tjúá kaxon. Ko ngisen ndakoꞌa xraxaon, xroꞌan ngeꞌe jian xraxaon na̱ ko kain ngeꞌe xraxaon na̱, tjúáꞌi.
16 Ndachro na̱ ixi chúxin na̱ ndo Dio, ko ti ncheꞌe na̱, meꞌe tjakoxinna ixi jeꞌa nduaxin ti nichja na̱. Jeꞌe na̱ tsango ñaꞌi na̱ ko titikaonꞌa na̱, méxin juaꞌi ncheꞌe na̱ naa ngeꞌe jian.