18
Babilonia marca ushacänanpag cashgan
1 Tsaypitanami ricargä munayniyog ángil chip-chipyaycar jana patsapita uraycämogta. Tsay chip-chipyayninmi intëru patsata atsicyapargan.
2 Tsay angilmi fuertipa caynog nimorgan:
“¡Ushacashganami, ushacashganami Babilonia marca!
Cananga demoniucunalanami tsaycho taycan.
Tsaychöga wisculcuna, condurcuna y tucucunalami wagaycan.
3 Tsay marcacho tag runacuna jutsata mana pengacuypa rurapäcushganta ricacurmi waquin runapis jutsata rurapäcorgan.
Tsaynoglami Babilonia runacunata ricacur nacioncunapa mandagnin reycunapis Diosta mana cäsucuypa cawapäcorgan.
Tsay marca runacuna imatapis ricashgan cagtaga rantiptinmi negocianticuna pasaypa rïcuyashga.”
4 Tsaynogpis yapay mayargä jana patsapita Tayta Diosnintsi caynog nimogta:
“Nogaman yäracamag cäga,
tsay marcapita juc läduman gueshpicäriy.
Jutsata rurar cawagcunapita witicäriy.
Aywacäriptiquimi paycunaman castïgo chayarpis gamcunamanga mana chämongapagtsu.
5 Paycunaga pasaypa jutsasapami carcaycan.
Jutsa rurashgantaga lapantami ricaycä.
6 Jutsata rurashganpita paycuna fiyupami castigashga cangapag.
Waquin runacunata nacatsishganpita paycuna más fiyupami nacatsishga cangapag.
7 Runa-tucur alabacushganpitami fiyupa castigashga cangapag.
Paycunaga shonguncho caynogmi yarpapäcun:
‘Nogaga imaypis manami nacashagtsu.
Nogaga lapanpagpis munayniyogmi caycä.
Guërrachöpis manami pipis vincipäcamashgatsu.
Nogaga imaypis manami laquicushagtsu.’
8 Tsaynog cashganpitami pasaypa nacaycuna paycunaman chayangapag.
Wanuypis, nacaypis y yargaypis elagpitami chayangapag.
Lapanpag munayniyog car juzgaptëmi tsay marca rupaycar pasaypa ushacangapag.
9 “Babilonia marcapita goshtay sharcuycagta ricarmi lapan nacioncunapa mandagnin reycuna laquicushpan wagapäcongapag. Tsay mandagcunaga Babilonia runacunawan juntacaycushpan Diosta mana cäsucurmi jutsata rurar cawapäcorgan.
10 Tsay castigashganta ricarmi mantsacashga carulapita ricarpanga caynog nishpan:
‘¡Wawalau!
¡Babilonia marca rupar ushacaycan!
¡Tagay marcaga munayniyogmi cargan!
¡Cananga elagpitana ushacaycan!’
11 “Tsaynogmi lapan negocianticunapis wagapäconga tsay marca ushacashganpita. Manami canganatsu pipis apashgan negociuncunata rantinanpag.
12 Paycunami ranticunanpag apapäcog öruta, guellayta, cuyaylapag chip-chipyaycag rumicunatapis, lïnupita rurashga tëlata, sëdapita rurashga tëlata y pasaypa chanin puca-chicnu tëlatapis, tucuy-nirag fïnu tablacunata, cuyaylapag marfilpita, broncipita, fiërrupita y marmolpita rurashga aläjacunata y imaycatapis.
13 Tsaynoglami ranticunanpag apapäcog canëlata, inciensuta, mïrrata y tucuy-nirag ali asyag jachacunatapis. Tsaynoglami apapäcog vïnuta, aceitita, harinata, trïguta, cargacuna cag uywacunata, uyshacunata, caballucunata y cärrucunatapis. Tsaynoglami runacunatapis ranticäreg ashmaynin cananpag.
14 Tsaychömi tsay negocianticuna laquicur tsay marcata caynog nipäconga: ‘Naupataga imatapis munashgayquitami tarergayqui. ¡Cananga manami imatapis tarinquipagnatsu! ¡Cuyaylapag imayquipis cashgan cagcunaga ushacashganami caycan! ¡Rïcu cashgayquinog y ali röpashga cashgayquinöga imaypis manami canquipagnatsu!’
15 “Tsay marcacho rïcuyag negocianticuna marca rupaycashganta ricaycurmi wagashpan carulapita mantsacashga ricarpanga caynog nir:
16 ‘¡Wawalau!
¡Tsay cuyaylapag marca pasaypa ushacashga!
Tsay marca cuyaylapag car lïnupita rurashga puca-chicnu ali röpashga warminogmi cargan.
Öruwan, perlascunawan y cuyaylapag chip-chipyaycag rumicunawan adornashga warminogmi cargan.
17 ¡Tsay riquëzancunaga elagpita chipyagmi ushacashga!’
“Barco manijag runacuna y barcucho lapan arupacogcunapis carulapita ricaraycar quëdaconga.
18 Tsay marcapita goshtay sharcogta ricarmi pasaypa wagapäconga caynog nir: ‘Manami may marcapis cashgatsu tsay marcanog pasaypa cuyaylapäga.’
19 Pasaypa wagar gaparashpanmi alpatapis umanman chayananpag altupa jitapäconga caynog nir:
‘¡Wawalau!
¡Cuyapaypagmi caycan Babilonia marca!
Tsay marcachömi barcuyogcuna negociunta ranticur lapanpis rïcuyashga.
Cananga elagpitami tsay marca rupar pasaypa ushacäcushga.’
20 Gloriacho cagcuna, pasaypa cushicäriy cay Babilonia marcata Tayta Diosnintsi ushacätsishganpita.
Tayta Diospa apostolnincuna, profëtancuna y payman lapan yäracogcunapis cushicäriy.
Jutsata rurar cawapäcushganpitami Tayta Dios tsay marcata chipyag ushacätsishga.”
21 Tsaypitanami munayniyog juc ángil mulïnu-nirag rumita jogarcur lamarman jitarergan caynog nir:
“Babilonia marcacho tagcuna,
cay rumita elgagpag lamarman jitarishgänogmi gamcunatapis Tayta Dios elgätsishunquipag.
Gamcunataga imaypis manami runacuna ricashunquipagnatsu.
22 Manami imaypis mayanquipagnatsu arpata, pinculluta, ni cornëtatapis cälliquicunacho tucaycagta.
Tsaynogpis marcayquicho manami ima runapis canganatsu ima aruyta arunanpagpis.
Mulïnu agaycashganpis marcayquicho manami mayacanganatsu.
23 Pipis mana taptin mechërupis mananami ratanganatsu.
Casaray fiestapis mananami canganatsu.
Babilonia marcacho negocianticuna más munayniyog captinpis marcayqui ushacangapagmi.
Brüju car may-tsaychöpis tag runacunata engañashgayquipitami tsaynog ushacangapag.
24 Tsay Babilonia marca runacunami Tayta Diosnintsipa profëtancunata y payman yäracogcunata may-tsaychöpis wanutsipäcushga.
Tsaynog cashganpitami paycunata lapanta ushacätsengapag.”