Bbaruha gya Pau̱lo hali
Beefeeso
Kwanjuura
Bbaruha gigi gya Beefeeso gyahandi̱i̱ki̱i̱rwe Pau̱lo, mukwenda wa Yesu̱ Ku̱ri̱si̱to (1:1). Pau̱lo yaahandi̱i̱ki̱ri̱ bbaruha gigi naali mu nkomo (3:1; 4:1; 6:20) yaagiha Ti̱ki̱ko agitwale Efeeso b̯uyaali naakugyenda kub̯ungira kitebe kya beikiriza ba Ku̱ri̱si̱to kyʼEfeeso (6:21-22). Kitabbu kiki kiteekerezeb̯wa kubba kyahandi̱i̱ki̱i̱rwe harabi̱ri̱ho myaka nka 60 Yesu̱ Ku̱ri̱si̱to amaari̱ kubyalwa.
Efeeso lwalingi rub̯uga lukooto, rub̯uga lwa Baru̱u̱mi̱ lweisaza lyʼAsi̱ya. Rub̯uga lu̱lwo lwali lwegebeerwe hab̯wa Yeekaru gikooto gya kihala kya Bayonaani ki̱beetengi̱ Aru̱temi̱si̱ (Bikorwa bya Bakwenda 19:23-31).
Bicweka bibiri bi̱handu̱, bya b̯ukwenda b̯uli mu kiki kitabbu byobyo bibi:
1. Mu kicweka kyakubanza kya bbaruha gigi, Pau̱lo asoboora ku̱yaakomi̱ri̱ bantu baamwe yaabajuna bibii byab̯u kuraba mu Yesu̱ Ku̱ri̱si̱to. Kandi aleeta kyakuwoneraho kya kitebe kya beikiriza ba Ku̱ri̱si̱to naaki̱lengesani̱a na mubiri gwa muntu, b̯u̱b̯wo, Ku̱ri̱si̱to naali mu̱twe. Kandi de, aleeta kyakuwoneraho kya beikiriza ba Ku̱ri̱si̱to naaki̱lengesani̱a na nnyu̱mba, b̯u̱b̯wo, Ku̱ri̱si̱to naali i̱hi̱ga lya muhendu hoi̱ lya ku nsonda.
2. Mu kicweka kyakabiri kya kitabbu kiki Pau̱lo yeegesya ha mu̱li̱ngo gwa beikiriza ba Ku̱ri̱si̱to bakusemeera kwicaliramwo.
Bicweka Bi̱handu̱ bya mu kiki Kitabbu nka Ku̱bi̱honderegeeni̱
(i) Pau̱lo naakwebazaho kandi naaku̱ramu̱kya Beefeeso 1:1-2
(ii) Pau̱lo ni̱yolokya b̯u̱kwatei̱ne hakati̱ gya kitebe kya beikiriza na Ku̱ri̱si̱to 1:3—3:21
(iii) Pau̱lo ni̱yolokya mu̱li̱ngo beikiriza ba Ku̱ri̱si̱to bakusemeera kwicaliramwo 4:1—6:20
(iv) Bigambu bya kumaliira 6:21-24
1
Bi̱ramu̱kyo Kuruga hali Pau̱lo
1 Bbaruha gigi gi̱ru̱gi̱ri̱ hali gya Pau̱lo, wa Ruhanga gi̱yaakomi̱ri̱ mu kwendya kwamwe, kubba mukwenda wa Yesu̱, Mutongoole wa Ruhanga.
Ngi̱handi̱i̱ki̱i̱ri̱ nywe bantu ba Ruhanga bali mu rub̯uga lwʼEfeeso, nywe bali beesigwa mu Yesu̱, Mutongoole wa Ruhanga.
2 Nkubasabira, aleke Ruhanga Bbaa weetu̱ hamwei̱ na Mukama weetu̱ Yesu̱ Ku̱ri̱si̱to, babagiire mbabazi̱ kandi babahe kwicala na b̯u̱si̱nge.
Mi̱gi̱sa Mi̱i̱za Kuraba mu Ku̱ri̱si̱to
3 Ruhanga kandi Bbaa Mukama weetu̱ Yesu̱ Ku̱ri̱si̱to, ahaariizib̯we. Yooyo atu̱heeri̱ mi̱gi̱sa myensei̱ miruga mwiguru kujuna myozo myetu̱, naarabya mi̱myo mi̱gi̱sa mu Ku̱ri̱si̱to.
4 Kubba Ruhanga yaatu̱komi̱ri̱ kuraba mu Ku̱ri̱si̱to nsi gi̱takabbeeri̱ kuhangwa, tubbe basyanu̱ kandi batali na kakuu mu mei̱so gaamwe. Hab̯wa Ruhanga ku̱twendya,
5 yaaru̱gi̱ri̱ hansi atu̱komi̱ri̱ tufooke baana baamwe mu Yesu̱ Ku̱ri̱si̱to, kubba yo kwokwo yendeerye.
6 Ki̱kyo yaaki̱koori̱, aleke tumuhaariize hab̯wa mbabazi̱ zaamwe zinene, zi̱yaatu̱heereeri̱ b̯usa kuraba mu Mwana waamwe gi̱yendya.
7 Mu yogwo Yesu̱, tutunga kucungurwa hab̯wa ibbanga li̱yaabbwomi̱ri̱ mu ku̱kwa kwamwe; kwokwo ikoba, tu̱ganyi̱rwa bibii byetu̱, hab̯wa mbabazi̱ zaamwe zinene hoi̱,
8 zi̱yaatu̱gi̱ri̱i̱ri̱ mu magezi̱ gaamwe na mu kwetegereza kwamwe.
9 Mu magezi̱ gensei̱ na mu kwetegereza kwensei̱, Ruhanga yaatu̱manyi̱si̱i̱rye ntegeka gi̱yaasi̱i̱mi̱ri̱, gyogyo nsita gi̱yaatwolokeerye mu Ku̱ri̱si̱to.
10 Gi̱gyo ntegeka, gyogyo gya kuteeraniza bintu byensei̱ kuraba mu Ku̱ri̱si̱to, bya mwiguru na bya mu nsi, kasu̱mi̱ b̯ukalidwa.
11 Ruhanga yogwo akora bintu byensei̱ ku̱si̱gi̱ki̱ra ku ntegeka gyamwe na kigyendererwa kyamwe, yaatongoori̱mwo twe Bayudaaya, tubbe baamwe kuraba mu kututeeraniza na Ku̱ri̱si̱to.
12 Yaakomi̱ri̱ twe Bayudaaya banyakubanza kubba na ku̱ni̱hi̱ra mu Ku̱ri̱si̱to, aleke tuhe bantu, kuhaariiza ki̱ti̱i̱ni̱sa kya Ruhanga.
13 Nanywe Banyamahanga banyakwegwa kigambu kya mananu, googo Makuru Garungi ganyaku̱badoosya ha kujunwa, mwei̱ki̱ri̱ri̱i̱ze mu Ku̱ri̱si̱to, mwateeb̯waho kilengeru kya Myozo Mu̱syanu̱, yogwo wa Ruhanga giyaali aragani̱si̱i̱rye kuha bantu baamwe.
14 Yogwo Mwozo, ali musimbo gu̱kwolokya nti Ruhanga akwi̱za kutuha bintu birungi bi̱yaatu̱ragani̱si̱i̱rye ha kasu̱mi̱ kaalitucungulira ki̱mwei̱, aleke ki̱ti̱i̱ni̱sa kyamwe kihaariizib̯we.
Pau̱lo Naasabira Beefeeso
15 Nahab̯waki̱kyo kuruga b̯u̱nyeegwi̱ri̱ nti mukwikiririza mu Mukama Yesu̱, kandi de nti, mwendya bantu ba Ruhanga bensei̱,
16 ncala biro byenseenya ni̱nsi̱i̱ma Ruhanga hab̯wenyu̱ kandi nimbasabira b̯uli b̯umba ninkusaba.
17 Mbasabira, Ruhanga wa Mukama weetu̱ Yesu̱ Ku̱ri̱si̱to, yogwo Ruhanga Bbaa weetu̱ wa ki̱ti̱i̱ni̱sa, abahe kubba bagezi̱ kandi abeezolokye, aleke mumwege kurungi.
18 Kandi de mbasabira, Ruhanga abamulukire mu mitima myenyu̱ aleke musobore kwetegereza mi̱gi̱sa minyamaani kandi mirungi hoi̱. Mi̱myo myomyo mi̱gi̱sa mya Ruhanga mi̱yaaragani̱si̱i̱rye kutuha b̯u̱yaatweti̱ri̱ kubba bantu baamwe, mi̱myo mi̱tu̱ku̱ni̱hi̱ra kutunga.
19 Kandi de mbasabira, aleke mwege maani gaamwe, gagwo gakira maani gandi genseenya kandi ni̱gatu̱soboresya kumwikiririzamwo. Maani gagwo googo gadi̱
20 gayoolokeerye mu Ku̱ri̱si̱to, b̯u̱yaamu̱hi̱mboori̱ kuruga mu baku̱u̱, yaamwi̱cali̱irya mu kiikaru kya ki̱ti̱i̱ni̱sa kinene hoi̱, kulema na Ruhanga mwiguru.
21 Yogo Ku̱ri̱si̱to ali hakyendi̱ wa bitebe bya mu mwanya, bi̱byo bya bamalayika bahandu̱, bya ba b̯u̱sobozi̱, bya ba maani, bya balemi̱, rundi ba ki̱ti̱i̱ni̱sa kindi kyenseenya, hatali mu biro bibi bisa, bei̱tu̱ na mu biro bi̱kwi̱za.
22 Bintu byensei̱ Ruhanga yaabi̱teeri̱ bibbe hansi wa b̯u̱sobozi̱ b̯wa Ku̱ri̱si̱to kandi yaataho Ku̱ri̱si̱to, yogwo eicala hakyendi̱ wa bintu byensei̱, yooyo abbe mu̱handu̱ wa kitebe kyenseenya kya beikiriza ba Ku̱ri̱si̱to.
23 Kitebe ki̱kyo kili nka mubiri gwa Ku̱ri̱si̱to; kandi kitunga b̯u̱sobozi̱ b̯wakyo kuruga hali Ku̱ri̱si̱to, yogwo aha b̯womi bintu byensei̱ hantu henseenya.