Bbaruha gya Pau̱lo Gyakubanza hali
Basosolanika
Kwanjuura
Bbaruha gigi gyakubanza hali Basosolonika gyahandi̱i̱ki̱i̱rwe Pau̱lo, mukwenda wa Yesu̱ Ku̱ri̱si̱to (1:1), mu b̯wi̱re b̯u̱yei̱cali̱rengi̱mwo Koli̱nso. Yaagi̱handi̱i̱ki̱ri̱ harabi̱ri̱ho myaka 51 Yesu̱ Ku̱ri̱si̱to amaari̱ kubyalwa. Bbaruha gigi gikuteekwa kubba gyalingi gya kubanza mu bbaruha zaamwe zenseenya zi̱yaahandi̱i̱ki̱ri̱. Pau̱lo b̯uyaalingi mu lugyendu lwamwe lwakabiri lwa ku̱tebya Makuru Garungi ga Ku̱ri̱si̱to, yaatandi̱ki̱si̱i̱ryeho kitebe kya beikiriza ba Yesu̱ Ku̱ri̱si̱to mu rub̯uga lwa Sosolonika (Bikorwa bya Bakwenda 17:1-10). Kiki kitebe kya beikiriza kyalingi na Bayudaaya banene na Bayonaani banene. Mu Sosolonika yaaru̱gi̱ri̱yo b̯wangu hab̯wa Bayudaaya bamwei̱ kumubyokeera (Bikorwa bya Bakwenda 17:5-10).
Pau̱lo yaahandi̱i̱ki̱i̱ri̱ Basosolonika ku̱batati̱i̱rya na ku̱bei̱ramwo bi̱b̯u̱u̱lyo byab̯u, na maani maani ha nsonga gya kwi̱ra kwa Yesu̱ Ku̱ri̱si̱to. Pau̱lo yaananu̱ki̱si̱i̱rye Basosolonika nti bab̯wo banyaku̱kwa nibakwikiririza mu Ku̱ri̱si̱to, boodede Ku̱ri̱si̱to akwi̱za kubatwala; kandi de nti, boobo balibanza kwingira mu b̯womi b̯utamalikaho (4:16).
Kandi de yaabahandi̱i̱ki̱i̱ri̱ ku̱batati̱i̱rya mu kwikiriza kwab̯u ha bintu bya mu̱si̱nge gwa nzikiriza gya Ku̱ri̱si̱to. B̯ukwenda b̯wa bbaruha gigi b̯wicala b̯wa ku̱hu̱u̱mu̱u̱lya na kwi̱ryamwo maani beikiriza ba Ku̱ri̱si̱to bali mu ku̱ru̱mbwa, aleke beege nti Ruhanga ali hamwei̱ nabo; kandi de nti mu kumaliira bakwi̱za ku̱si̱ngu̱ra.
Bicweka Bi̱handu̱ bya mu Bbaruha gigi nka Ku̱bi̱honderegeeni̱
(i) Pau̱lo naaramu̱kya kandi naasi̱i̱ma Ruhanga hab̯wa Basosolonika 1
(ii) Pau̱lo naabaza ha b̯uheereza b̯wamwe b̯wa Sosolonika na ha makuru ga Ti̱mi̱teo gaayaamu̱leeteeri̱ 2—3
(iii) Pau̱lo naalamba beikiriza ha mu̱li̱ngo gwa kwicaliramwo nibakulindiira kwi̱ra kwa Ku̱ri̱si̱to 4:1—5:15
(iv) Kulamba kwa kumaliirira 5:16-28
1
Bi̱ramu̱kyo Kuruga hali Pau̱lo
1 Gyagya Pau̱lo, hamwenya na Silivaano, na Ti̱mi̱teo. Tu̱bahandi̱i̱ki̱i̱ri̱ bbaruha gigi, nywe kitebe kya beikiriza ba Yesu̱ ba mu rub̯uga lwa Sosolonika, beikiririza mu Ruhanga, Bbaa weetu̱ kandi, mu Mukama weetu̱ Yesu̱ Ku̱ri̱si̱to.
Ruhanga abahe mbabazi̱ zaamwe, kandi, abahe kwicala kurungi na b̯u̱si̱nge.
Pau̱lo Naasi̱i̱ma Kitebe kya Beikiriza ba mu Sosolonika
2 Biro byensei̱ b̯utubba nitukusaba Ruhanga, tubasabira mbe, kandi nitutahoona na ku̱mu̱si̱i̱ma hab̯wenyu̱.
3 Kubba, twi̱zu̱ka mbe bikorwa bya kwikiriza kwenyu̱ ku̱mwei̱ki̱ri̱ri̱i̱zemwo, hamwei̱ na kutaho mutima kukora milimo mya Yesu̱ Ku̱ri̱si̱to na bihika, kandi, hamwei̱ na kubba basi̱gi̱ku̱ mu ku̱ni̱hi̱ra kumwicala nakwo mu Mukama weetu̱ Yesu̱ Ku̱ri̱si̱to.
4 Bei̱ra bange, nywe ba Ruhanga bayendya, tu̱kyegi̱ri̱ Ruhanga nka ku̱yaabatongoi̱ri̱ yaabafoora bantu baamwe.
5 Hab̯wakubba, Makuru Garungi gakukwatagana na Yesu̱ Ku̱ri̱si̱to gatwabatebeerye, gatakabbe ga bigambu kwankeenya; bei̱tu̱, gaali gawa maani, maani ga Mwozo wa Ruhanga. Kandi, mwaweeni̱ kwo bi̱byo bigambu, nibili bya mananu. Kandi de, mu̱kyegi̱ri̱, nka ku̱twabakoleeri̱ mu bigambu bi̱twabawereeri̱.
6 Kandi, mu bi̱byo bigambu bi̱twabatebeerye, Mwozo wa Ruhanga yaabaheeri̱ kusemererwa kunene, nab̯umwabba mwali nimukuwonawona. Mu ngeru gi̱gyo yatyo, mwadoori̱ kutuhondera na kuhondera ngesu za Mukama weetu̱ Yesu̱ Ku̱ri̱si̱to.
7 Kandi, mu ngeru gyogyo gi̱mwei̱, mwafooki̱ri̱ kyakuwoneraho, hali beikiriza bensei̱ ba Yesu̱ ba mu bicweka bya Makedooni̱ na byʼAkaaya.
8 Kandi, mwasasani̱i̱rye hensei̱ bigambu bya Ruhanga. Mu̱takabi̱sasaani̱e mu Makedooni̱ hasa, bei̱tu̱ na mu kicweka kyʼAkaaya. Kwikiriza kwenyu̱ mu Ruhanga ku̱doori̱ ha kwegeb̯wa hantu henseenya. Nahab̯waki̱kyo, tu̱weeni̱ ki̱takwetaagi̱sya, twe kubaza ha kwikiriza kwenyu̱ ku̱kwo.
9 Kandi de, bantu ba mu bi̱byo bicweka byensei̱ baatu̱hanu̱li̱i̱ri̱ mu̱li̱ngo gu̱mwatu̱tangi̱ri̱i̱ri̱mwo, na mu̱li̱ngo gu̱mwaleki̱ri̱ho ku̱ramya bi̱si̱sani̱, mwatandika ku̱ramya na kukoora Ruhanga, Ruhanga yogwo wa mananu, kandi mwomi.
10 Kandi de, baatu̱weereeri̱ nka kumukulindiira Mwana wa Ruhanga kuruga mwiguru, yogwo gi̱yaahi̱mboori̱ kuruga mu baku̱u̱. Yooyo Yesu̱ alitujuna hali ki̱ni̱ga kya Ruhanga kikugyenda kwi̱za.