22
1 Nebei malaikat mbai wali yeumi wibe yolo-yolo renden sele kristal wanenbe rare keleufe. Nebei wi Allahle Domba Kelule kendan wameran neketera rileunge,
2 nebei yo kaban yan kaban na nibi kaban nolore yae rileimeyele. Wi bonei-bonei reufi-reufine walire yaimi o habe hebate, ani roko me bee oro nen bee bele ralo yakama mbai mokoikoyate, oko mbai roko mbai ani mokoikoyole. Na fae yae nebeinye arilaisike, ro miyae onomi yemmile naeise.
3 Allah yae olomore neungeboke rambun nebei yo einye u. Allah bele Domba Kelule kendan wameran nebei yone hononende. Allahle kaliare mokate yo nebei yo yanne Naei kaliare mokonate.
4 Nebei yo Allah na be yoi kanenainyele nane merau Allahle ro na feline molonaimikonde.
5 Nebei yo yanne reniai ban, isehe bele hu hehe bele enaeikoi, rabuhine ban Tuhan Allah Nauwa inyukui yae nebei yore hehe naemmikonde. Nda ro miyae yae ondofolo wanen mae huba ban haei ban hiwa yore me mokonaimiyende.
Yesus Benen Mende Hee
6 Nebeisa nebei malaikat yae rare weufe, “Na ranne a yoni-yoni na hele nane merau rabo ensalembe. Tuhan Allah Naei Rohre weunge yenjo kayaayo walora huwemmile Kiyae, Naei malaikatre ukeunge meke Naei kaliare mokate holona yore na heki ban benate rambunde kelemmibonde naeise.”
7 Eren, nana hesele bene nekenayete, Reyae na heki ban mo merele. Ro miyae nda homofaena a nuleungekokalere hakonate yo, onomi foka hubanainyende.
8 Reyae Yohanes nda rambun nanemene angkaei borowale ijoko yae erewale kiyae. Nebeisa boroukokale nane merau ereukokalera malaikat nda rambunde keleufekoke kiyaele oro bene be are nekale eise molorendere.
9 Nebeibe neyae weufe, “Ae, nebei mekai omokoijae! Allahre mo ei moloinye! Rabuhine ban waeinya wanen mbai reyae Allahle kaliare mokale ro, nane merau waei aka baeke Allahle yenjo kayaayo bele ro miyae nanemene fomene nda homofae einya a usaei wasaeise hakoyate yo bele nane hului mbai.”
10 Neyae benen weufe, “Nda homofae einye nulainyekoke a faeu nunne eheraweijae, rabuhine ban ndare inyaibonde ya nobeungekokene.
11 Ro miyaere nda mekai yae weumile: nde naei bekore mokonayendena, na hibi yae beko mokonayende; nde wali niki belere mokonaterena, na hibi niki bele olenayende; Allah kena kole huluinye ro miyae mokonaterena, na hibi Allahle kena hului hakonainyele; wali yolo-yolo yo, na hibi wali yolo-yolo yae nekenayende.
12 “Eren, Reyae na heki ban mo Raeinya roibu bele roufemende. Ro miyae me u mokowate huluinye Raeinya roibu waheremikonde.
13 Reyae Yunani afaeunge huruf na bena kiyae Alfa bele na moinye kiyae Omega yeubokale, Hubalo Mando, hengkelen raufikale Kiyae nane merau hubare erensalengkonde Kiyae.”
14 “Ro miyae na hului walire yaimi o ha na ani anenate nane merau nebei yo kaban yan kabande na romaufa enayembonde naeise na malo kuyaikoke yo, onomi foka yae hubanainyende.
15 Yo moinye nda u mekai bele ro miyae yae enainyekende: yoku u mekai bele yo, buloolo yo, yoko kaeimaere koyate yo, ro miyaere hoyate yo, hoime bahere ei moloyaimi yo, ame-amere beyatere kena kate yo.
16 “Reyae Yesus, jemaat hire-hire huweumile naeise, Raei malaikatre ukanale ende nda ako faeuko ware isaeinyete. Onsi kambura ketate wanen Reyae Ondofolo Kaban Daudle orona menara faukale. Reyae Niyae rene kaukaunga hehe kabande naeikoyole findelau yahei.”
17 Allahle Roh bele miyae neme wainyeboke wanen Allahle jemaat bele elete, “Menne!” Borate ro miyae yae elenate, “Menne!” Ro miyae nde walire yemmile bu anensindere ki oyeungena, mai kena kaube hului me karo yae ren.
Huba Mokoikoi A
18 Ro miyae nde nda homofae na a nulainyekokere borombondena, Reyae Yohanes nda are isaeisembombere: ro miyae nde yae nda ako faeuko barannele kiyae, nebei ro miyaere nda homofae einye yo bei yan bei molaikokebe ehee bukulure Allah yae nebei yore ennebarande.
19 Nane merau ro miyae nde yae nda homofae na nulainyekoke a kalo ennemolondena, nda homofaene molaikoke walire yeumi o ha bele Allahle yo neme bele nebei ro miyae naei kayeero Allah yarongkonde.
20 Nda are nanemene isaeiwoufe Kiyae elele, “Na hele, Reyae na heki ban merele.”
Amin, Tuhan Yesus meinye!
21 Reyae ebeli banale Tuhan Yesus Allahle holona ro miyaere kena buhae aere ban mae hemmiyende. Amin.