12
1 E apana sanaa wainiana walamawe
mida e dewaena mai nuaawawasaa,
ipawa e gulauitaa walamawe e wae waase,
“Ne tawo ema osowe wanwamba mai menaneipona, dia.”
2 Mida e dewaena insena ipawa ando
omo, uaboa ita kipora dubantopuo mai sala ewaadewaitaa,
ita unu wapia baiwa giou dubaleidia mai punwapie dialepi, dia.
3 Mida e dewaena insena e witaa tauma mukamukaua wineie oniaeia
ando oauarantopue uwauwantopu,
ita waa tauma mukamukaua wineia
ando oauarantopu.
Mida e dewaena insena
ando e moaa nepa nonosintopuo nana mai naadewaitaa,
ita e emaa sala mai ewepidewalepi.
4 Mida e dewaena insena ando asia potalepio aia mai etadewaitaa,
e nana laulantompa ba sino epompa moinawa mai etaa.
Tane nene aiawa e wadamesaepi.
5 Mida e dewaena insena
ando e sala awoia awa inguguraitone saitona kadi donsaa sawa,
ita e uwaa lagunalepie sapa wapi,
e kapoi rua mamoo teteite aitaa,
ita e eba mai aitaa rua, dia.
Ita nitu daitada nuaeubu manawo dialepi.
Mida e dewaena insena
ando apana uduudu bontompe bubua bolawe antompa,
ita apana into ke wampe leumpa.
6 Mida e dewaena insena
ando ia kampa idia,
ipituwapi ita isana obasalepi
do ando sala pola wadia obasalepi,
ita ando nene mabupa imba empio rowolepie alepi.
7 No bontato etemba leulepie dogo popokauwa wanalepi,
ita aleumba leulepie God mida dewasana mampe alepi.
8 Sa baiwa Waeuwa Apanawa wadiase,
“Nitu uduudu ipa diapanau, diapanauida ipusiawaia.”
Gagalo ompa
9 Waeuwa Apanawa insadewasala ita me apana aten umanawa waeuwamodie. Me aten waeuwa tontawa deaitopa insadewasamodie ita ulaipa mampe empuempumodie intaweintawe girumamodio wineie.
10 Waeuwa Apanawa aia dainea dodomana mampelepio girumamopia ita rua dima girumamona ipa ulaipa.
11 Insadewasala apanawa waeuwa ipa gamo onioniala koinawa moamoaua wadedie sipsipwa bodamodio adewantoia rua. Me aiawa ipa tutu moamoaua ia bedewe epeio aidaleidia rua. Aia sa ipa God me mida no uduudu onianedia mampee wisen.
12 Ne otona, ewadewaitaa. Waeuwa ema wadaadoe wanempa. Buka girumawa dewawa ando mai dialepi ita kainokaino insaisawaitone girumawaitone etea dabualepi.
13 Dewa ema uduudu bedeuwo
dewa dea os ipa debamawaida wape dieepa,
sa ipa e God sawaitone ita aiawa ruawaitona.
Ipawa ema baiwa God apana tawo ema osowe dewanene teaneno wainitana.
14 God dewa uduudu werego euda ba kadiwa dewasaitana ruawalepie kotunepi.