31
Iawe God Israelwa leumopio wimopua gagalowa
7 Ema ipa Iawe God gagalowa wadi wadiase,
“E Israelwa baibu sasaitane nuaeuitana mo ipa eboeboua,
e Israelwa nuaeuitane ka wana!
Sasaitane ka wane wadapositane wanase,
‘O Iawe God, e apanaa inamoa
Israelwa inawaa waimoi, mai bontopatuwapona!’
8 Ne apanana bola wita sen deneuwe antone waimoia banlamopo leuntopue wimopu,
ita do bola isiwa nowa dauwoido winamoia bedewe antone waimoia leuntopue wimopu.
Mo emau potawa ita tampu aiaisiwa leuntopue wimopu,
ioto bulala ita da gamo baiwantoia,
sa ipa apana uaraia leuntopue wimopu.
9 Ne banlamopo leuntopue iompe,
ke wampe ita rauparintompa.
Ne mo banlamopo esa maneuleida tampe wimopue antompa,
ita mo inta deulala asiasi adewantompa
ita mai wau dima da bagorepio omepu, dia.
Ne ipa Israel mamba ita Eparaim ipa ne otona tautuwa
sa baiwa ne mo mampo epe dewasapaa rua.”
31 Ema ipa Iawe God gagaloleidie wadiase, “Walama iedia bedewe ne sauana badowa sanaa dewasapa Israel ita Iuda apanawa mampo.
32 Saua ema ipa mai ne mo nosinosiu mampo sauantena rua, dia. Sa ipa ne mo Isibt bedewe waimoio banlamono nomoiena. Walama sawo ne mo badau rua deaitopa oniadewasamona, tane mo ne anaanana ainapundeiena.”
33 Iawe God gagaloleidie wadiase, “Walama iedia bedewe ne sauana badowa sanaa Israel apanawa mampo dewasapa. Sa ipa ne anaanana mo insaisau ita do nuau bedewe girumanteapa. Ita ne mo Godiu wananteapa ita mo ne apanana wanantopu.
34 Walama sawo mo mida eboeboua ita ebousiawaia uduudu ne atenidaneapu. Sa baiwa mai mida me sowa ando waeuwasapie wapiase, ‘E Iawe God ateitaa.’ Ne mo nuapareuntape dewau kiokiou insepadabuasapa, ita mo kadiu ando mai insepa, dia.” Ema ipa Iawe God gagaloleide.