19
Elaia sawe wadi Sainai bedewe aleide
1 Eiab alene duwa wisene dewa uduudu Elaia dewamona ita ambi Baal perowetawa uduudu bomona umanawa manainapa Iesebel dieno eten.
2 Iesebel dewa ema umanawa etene Elaia gagalowa wanaubene wanase, “Imonepi omo ema rua e Baal peroweta bomoana rua ne e boepa. Naita ne mai epe dewanteapa, ne godina mampo rauparintedina ne matangelaneapue do boneapu.”
3 Elaia ema umanawa etene inalepia insene sawe alen. Ita me Iuda bedewe wisene nolawa dewalala bola Beasiba bedewe en.
4 Ita me meba sala makowa bedewainta aleidio rawilen. Me ia ebowa burum bumpe waine bolepona menasano rauparilene wanase, “Iawe God ne pokaidanen. Ne inawana wadaaubewo bonteapa nosinosina bontoiena ruau.”
5 Me epe rauparilene aupe ia bumpe ituawawalen.
Ita tauwadea Iawe God enseliwa wadenmesane wanase, “Enawie nana naa.”
6 Me aia etene enenwisene sala ewen ita uwawe bured tabataba isana polapolaua osowe susulala ita esa dugiwa wineio ewamon. Ita me bured ita esa nane tane osowe itulen.
7 Tane Iawe God enseliwa osowe me wadenmesane wanase, “Enawie nana naa. Naita dia e mai rua inta dauma aita.”
8 Sa baiwa me enene bured ita esa namon. Ita me nana sa nane muka waneno walama 40 ita tadina 40 alen God wadiwa wadi Sainai osowe wisen.
9 Ita sape me wisene tadinaleno guba bedewe itulen.
Iawe God Elaia mampe gagalolen
Iawe God me diene wanase, “Elaia, e dima baiwa mape wien?”
10 Elaia me sipoasane wanase, “Iawe God Mukamukaua, ne walama uduudu e os simbiaedine. Tane Israelwa e sauaa badowa dabuasaiena ita pulontompa watawa epakokomoiena ita do e perowetaa uduudu bomonatuaiena. Ne os wainedina ita tauma mo ne boneapua baiwantoi.”
11 Tane Iawe God me diene wanase, “E aite wadi iwa osowe nainanepe enaa.”
Ita Elaia enedio Iawe God nosene alen ita lanunu debamaia wisene wadi epeno nau tutuwaiena. Tane Iawe God ipa mai lanunu bedewe, dia. Ema aupe wanatata uwen, tane Iawe God mai wanatata sa bedewe, dia.
12 Tane wanatata aupe ia debama iilala wisene alen. Tane me mai ia sa bedewe, dia. Ia ema aupe aia kerauda asibenebenema wadio eten.
13 Ita Elaia asibenebenema moinawa etene garawa onapea teineno odene namba rupusan ita nosene alene guba moape enedie. Tane aia me mampe wane wanase, “Elaia, e dima baiwa mape wien?”
14 Tane me sipoasane wanase, “Iawe God Mukamukaua, ne walama uduudu e os simbiaedine. Tane Israel apanawa e sauaa badowa dabuasaiena ita pulontompa watawa epakokomoiena ita do e perowetaa uduudu bomonatuwaiena. Ne os wainedina ita tauma mo ne boneapua baiwantoi.”
15 Ita Iawe God me diene wanase, “E leuite inta wienawo asiasi sala makowa bola debama Damaskas tampe aitaa. Ita bola sa debama bedewe odee mena Asael osowe memee euwasaa me ando tawo Siria warereu segalepi.
16 Tane Nimsi otopa Ieru osowe mena memee euwasa me ando Israel apanawa warereu segalepi. Ita Sapat otopa Elaisa bola Abel Meola apanawa osowe mena memee euwasa me ando e aupaa wadepie ne perowetana segalepi.
17 Apana mida Asael bosapia sawa alepia Ieru me bosapi. Tane mo mida Ieru bomopua sawantopue antopua Elaisa mo bomopi.
18 Tane Israel apanawa 7,000 mo mida mai Baal wadaposisapona ba kokoitauwa isuruwasapona, mo os waimompa.”
Iawe God Elaisa apasan
19 Tane Elaia alene Sapat otopa Elaisa iraiwa bedewe dogo nobaleidio donsan. Sape apana uduudu 12 muba kaubu natanata otamone iraibu bedewe nolantoie ita Elaisa kau nata sa ompa otamone dogo nobaleidie. Elaia me mampe alene garawa onapea dauma wadene Elaisa awanapa osowe itune ene alen.
20 Tane Elaisa nolaleidia kauwa nata emone Elaia wawe alene diene wanase, “Bauta ne antape mamana ita inana isuruwamope ita auwamope epe wimpo nata ana!”
Elaia me sipoasane wanase, “Leuite aita ita ne e manawo dima dewamona insamona.”
21 Ita Elaisa leulene alen kauwa nata epaboiamon. Tane kau ia teineio dogo nobaleidia otene denalene moia sune ita apana wanamono naiena. Ita me alene Elaia warorosane nolawa dewalala segalen.