Nuapare sasau ita raupari
Buka ema bedewe emalawoa apanawa ena 586 bedewe wimone Ierusalem kadisaieno Israel apanawa nuaparentoiena umanawa wade. Emalawoa apanawa sa wimone nitu eubu wineia otamone antoiena. Buka ema girumalena apanawa mai atentapona, dia. Tane apana isiwa waia buka ema ipa Ierimaia girumalen.
1
Nuapare debama Ierusalem bedewe segaleide
1 Mapo Ierusalem bedewe apana uaraia waimoie,
tane tauma mai apana da wainipona, diaida.
Mapo bola sa ipa eboeboua bola uduudu bedeuwo,
tane tauma obu rua nuapareidalen,
mai mida da me tounasapia rua.
Mapo me ipa i eboeboua rua bola isiwa me atowe waimoie,
tane tauma me ipa nola dewalala iwa rua segalen.
2 Tadino me ke wadio
emawe ke aleide.
Me babadawa ene antonatuwaiena,
mo mai nuadubusapua rua,
me sosowaida uduudu nibuasane eiena,
tauma mo ipa me emalawoa apanawa waimoi.
3 Emalawo apanawa wimone Iuda apanawa onau enane
nanaumone ita otamone antoiena,
ita mo dewamoieno nolau apanawa wanantoieno
sai debama osouwo ituiena.
Tauma mo antone apana da bedeuwo waimoi,
mo mai bubua bolawa da donsapona, dia.
Mo emalawoau apanawa tanamone antone otamoiena,
ita mo mai sawo naepe antope inantopona rua, dia.
4 Ierusalem intawa ke wai,
ipawa mai mida da God wadaposiwa baiwa mo osouwointa wimoipe antoipona, dia.
Mai mida da bola sa gonaawa moainta odepia rua, dia.
Ita pirisi poka eteie nuaparentoi,
ioto sanaau ke wai,
ita bola debama sa apanawa uduudu pokaida etei.
5 Mo emalawoau apanawa mukau atowentono oniamoi,
ita emalawoa apanawa sa nitu uduudu mampe rua os waimoi.
Ierusalem dewawa kadiwa daitada dewamona baiwa Iawe God me matangelasan.
Emalawoa apanawa me obampa otamone antone nowa dauwo teamone emoiena.
6 Mapo Ierusalem ipa eboeboua ita bola uwatauwa eudida,
tane tauma me euwawa sa uduudu dialen.
Me apanawa debamau pue ebowa dia ruau
omana tomodio nana banuwa lai.
Mo omana tomono oauarantona baiwa,
mai sawo tauwadea emalawoau apanawa emopue
weuwapue antopua rua, dia.
7 Tauma Ierusalem apanawa bola daitada bedeuwo
nuabola saiwa daitada do waimoie lai,
mo nitubu eubu daitada bauta mampo wineia insamoie waimoi.
Walama sawo mo emalawoau apanawa wimone nanaumone aimoiena,
ita mai mida da mo saumopona, dia.
Me emalawoa apanawa onawa enane nanausaiena,
ita mo me kadi donsana ewane oiwa waiena.