5
Pi ula꞉ buka pita꞉ Sipisipi Ma꞉na꞉ Ikiki yaapo
1 Mo kini seana꞉ pila꞉ halina꞉ popeke nane kikina꞉ta꞉ mo pi ula꞉ buka miniki pitia꞉eki handoa꞉me. Mo pi ula꞉ bukana꞉ nepoko yaapo telipuna꞉ta꞉ wapema꞉ tumbulu bao wia꞉me. Kutupa watake hata꞉ tonkaake alema꞉ tonkaeyekeme.
2 Kutupa wele wopu piki enisolo handoa꞉me. Mo enisoloma꞉ pi ho̱la̱꞉make tiekema꞉ alota꞉ Mo tonkaake alemanu yamba꞉la mo pi ula꞉ buka lumbuluekema꞉ epita꞉ ipika꞉ pa꞉la꞉ hauma꞉ ana꞉na꞉ pea꞉peke ya꞉la꞉pe lea꞉me.
3 Pate oli hepeni nane make do kenke nane make kenke oto nane make mo pi ula꞉ buka lumba tukiki nane handa꞉peke some ma꞉nda꞉ dia꞉me.
4 I̱ma꞉ ka꞉pa꞉puki yoka e̱ tieke loa꞉me. Pa ekipeke mo pi ula꞉ bukata꞉ lumba tukiki pa꞉ta꞉ handuluekema꞉ ma꞉nda꞉ ipika꞉ pa꞉la꞉ hauma꞉ ana꞉na꞉ pea꞉peke hali ma꞉nda꞉ dia꞉yeke loa꞉me.
5 Mo hande you hali homeke ma꞉nda꞉ma꞉ I̱ pa꞉ta꞉ alota꞉ E̱ na lapee. Handa꞉e. Hande Diudana꞉ tapake laeonota꞉ hande Deipidina꞉ eiyekema꞉ monduma꞉ monduma꞉ pea a꞉pa ota꞉ biki wiki hali mendieke somema꞉ homeke bepolao hala꞉me. Ipikana꞉ma꞉ ana꞉na꞉ mo watake hata꞉ tonkaakemanu ula꞉eki yamba꞉la mo pi ula꞉ buka lumba꞉peke ya꞉la꞉me.
6 Kutupa mo Sipisipi Ma꞉na꞉ Ikiki homeketa꞉ mo kini sea tukikina꞉ haya꞉eki handoa꞉me. Ipikita꞉ mo deto hala꞉ ale tonkopu make mo you haliwekima꞉ make dupaememe. Mo Sipisipi Ma꞉na꞉ Ikikita꞉ limiki nono piekeme. Ipikita꞉ watake hata꞉ ekekemanu hao make watake hata꞉ lekemanu haya꞉me. Ipika꞉ leke manuta꞉ hande Koda꞉na꞉ watake hata꞉ sipitidimanu do kenke honiki paeyao pa꞉ta꞉ tapaala꞉eki yekeme.
7 Mo Sipisipi Ma꞉na꞉ Ikikima꞉ mo kini seana꞉ pila꞉ halina꞉ popeke nane kikina꞉ wia pitia꞉ pi ula꞉ buka pua mia꞉me.
8 Dupitolo haena꞉ta꞉ mo deto hala꞉ tonkopu ale manuma꞉ make mo hali tieke homekena꞉ tonkopu you haliweki paeyaoma꞉ mo Sipisipi Ma꞉na꞉ Ikikina꞉ puki tikitikina꞉ panda꞉puniao lopememe. Homeke homekema꞉ta꞉ mo kidama꞉ handeke ale make mo koloma꞉ wepiki ulu pa꞉ta꞉ta꞉ totopo piki alema꞉ tumbikieki wimime. Kotota꞉ mo hande Koda꞉na꞉ wanda꞉halina꞉ yeni pita꞉la꞉eki yekeme.
9 Ikana꞉ma꞉ panake emeli homeke alota꞉
Neketa꞉ mo pi ula꞉ buka mea tonkaake ale yamba꞉lapeketa꞉ ota꞉ ana꞉ pa꞉la꞉me.
Pa ekipeke neketa꞉ limikime. Kutupa nakana꞉ma꞉ naka꞉ wema꞉ mo wanda꞉halita꞉ Koda꞉na꞉ wanda꞉hali haena꞉yeke hambeleme.
Ikita꞉ tapake ta꞉ta꞉ ta꞉ta꞉ make pi ta꞉ta꞉ ta꞉ta꞉ make kapomani manuma꞉ handeteke hala꞉ da ta꞉ta꞉ ta꞉ta꞉ make tutu ta꞉ta꞉ ta꞉ta꞉ paeyao pa꞉ta꞉ hambeleme.
10 Kutupa nakana꞉ma꞉ ikita꞉ mo yeni peao hala꞉ kilu tombuao hala꞉eki haena꞉yeke Koda꞉ oto pa꞉ta꞉ hata꞉ e pokaena꞉ leleme.
Ikita꞉ do kenkena꞉ handeteke haena꞉ lelipikie laa lemekeme.
11 Pa handoeketa꞉ mo yata꞉pea꞉peke na yeke tupa꞉ haemeke enisolo titita꞉ daoseni eleke eleke opua꞉me. Ikita꞉ mo kini sea make mo deto hala꞉ tonkopu alemanu make mo you haliweki popei yao haememe.
12 Kutupa pi ho̱la̱꞉make anekema꞉ emeli alo alota꞉
Mo hande lia꞉ Sipisipi Ma꞉na꞉ Ikikima꞉ta꞉ wele make
hamoko make hone u tiaasa꞉eki make honkopu make
biki miniliaasa꞉eki make pa̱a̱ pikieki make
yeiya꞉ laasa꞉eki make paeyao mea꞉peketa꞉ ana꞉ pa꞉la꞉me lemekeme.
13 Kutupa oli ya nane make kenkena꞉ make kenke oto nane make dawala pa꞉ta꞉ da꞉ta hala꞉ ala꞉ta꞉ ala꞉ta꞉ paeyaoma꞉ emeli lemeeki opua꞉me. Dupa lememe.
Mo kini seana꞉ pila꞉ hali make mo Sipisipi Ma꞉na꞉ Ikiki make
yeiya꞉ lao make biki miniliao make pa̱a̱ make wele make
hoto paeyao pa u haena꞉e lememe.
14 Koto lemeke mo deto hala꞉ tonkopu ale manuma꞉ alota꞉ Kutu pina꞉e lemeke mo you haliwekita꞉ panda꞉puniao lopa ipiki pa꞉ta꞉ yeiya꞉ laaso yeni pimime.