28
مَسٍنيِ تِرٍ مَنفّ نُن سِدْن بّ
1 عَلَتَلَ نَشَ عَ مَسٍن ﭑ بّ، عَ نَشّ،
2 «عَدَ مَدِ، عَ قَلَ تِرٍ مَنفّ بّ، ‹عِ مَرِفِ عَلَتَلَ يِ نَن مَسٍنشِ؛
عِ بَرَ لَ عِ يّتّ رَ عَ قَلَقٍ رَ، «عَلَ نَن ﭑ تَن نَ!
ﭑ دْشْشِ عَلَيٍ شَ كِبَنيِ نَن كُي بَا دّ رَ!»
كْنْ عِ مُ قِندِشِ عَلَ يٌ رَ،
هَلِ عِ تٌ عَ مَحْشُنشِ عَ عِ شَشِلِ لُشِ نّ عَلْ عَلَ فبٍ.
عِبُنَدَ مَ تُن نَن نَ عِ رَ.
3 عِ حْشْ عَ مَ عَ عِ شَشِلِ قَن دَنفِ عَننَبِ دَنِيّلِ فبٍ رَ؟
عِ فُندٌ قٍ بِرِن كٌلٌن؟
4 عِ شَ شَشِلِمَيَ بَرَ عَ نِيَ عِ شَ بَننَيَ سْتْ،
شّيمَ نُن فبٍتِ فبٌشِ عِ شَ نَاقُلِ يَ مَ.
5 عِ قَتَ يُلّيَ رَبَدٍ.
نَ بَرَ قِندِ بَننَيَ رَ عِ بّ،
كْنْ عَ مَن بَرَ عَ نِيَ عِ شَ قِندِ يّتّ عِفبٌي رَ.›»
6 «نَ قٍ مَ، عِ مَرِفِ عَلَتَلَ يِ نَن مَسٍنشِ؛
عِ حْشْ عَ مَ عِ شَشِلِ لُشِ نّ عَلْ عَلَ فبٍ،
7 ﭑ عِ يَشُي كٌبِيٍ رَدِنمَ نّ عِ مَ،
عَلَكٌ عٍ شَ عٍ شَ سَنتِدّفّمَيٍ بَ عٍ تّي كُي،
عٍ شَ وٌ شَ تٌقَنيِ نُن وٌ شَشِلِمَيَ رَفٌرٌ،
عِ شَ قٍ قَنيِ شُن قَ رَكَنَ.
8 عٍ عِ مَدُلَمَ نّ بَا مَ، عِ قَ قَشّ شْرْشْي سْتْ، عِ فٌرٌ عَلِفِيَمَ.
9 عِ قَمَ نّ عَ قَلَدٍ قَشّتِيٍ يَ عِ، ‹عَلَ نَ ﭑ نَ›؟
مِشِ نَن تُن نَ عِ رَ نَشَن قَشَمَ مِشِيٍ بّلّشّ رَ.
10 عِ قَشَمَ نّ يَافِ كُي عَلْ بِلَكْرّ.
عِ مَرِفِ عَلَتَلَ شُي نَن نَن كِ.»
11 عَلَتَلَ نَشَ عَ مَسٍن ﭑ بّ، عَ نَشّ،
12 «عَدَ مَدِ، سُننُن سُوكِ ندٍ بَ تِرٍ مَنفّ بّ، عَ قَلَقٍ رَ،
‹عِ مَرِفِ عَلَتَلَ يِ نَن مَسٍنشِ؛
عِ نُ كَمَلِشِ شَشِلِمَيَ نُن تٌقَنيِ نَن نَ.
13 عَ نُ لُشِ نّ عَلْ عِ سَبَتِشِ عَلَ شَ يِرٍ قَنيِ نَن كُي نَشَن شِلِ عٍدٍن بْشِ.
فّمّ تٌقَنيِ نَشٍيٍ سَرٍ فبٌ عٍ نُ نَ عِ يِ رَ.
عٍ شِلِ نُ قَلَمَ؛ سَرِدُوَنِ، تٌثَسِ، دِيَمَن، كِرٌ سٌلِتٍ، عٌنِشِ، يَسَثٍ، سَقِرِ، عٍسِكَرِبُكُلُ، نُن عٍمٍرٌدٍ.
نٍيٍ نُ سَشِ شّيمَ رَشُنمَسٍيٍ نَن تَفِ، عٍ قِندِ شُرُندّ، بّلّشّرَ سٌي، نُن كْنمَفٌرٍيٍ رَ.
عَلَ نَ نَن بِرِن رَقَلَشِ عِ بّ عِ دَا تّمُي.
14 ﭑ تٌ عِ تِ مَنفّ رَ، ﭑ مَلٍكّ سّنبّ سٌ عِ يِ رَ.
عِ نُ حّرّ مَ تّ نَن تَفِ ﭑ مَ فٍيَ قَرِ.
15 عِ نُ سّنِيّن كَبِ عِ دَا لْشْي،
كْنْ تِنشِنتَرٍيَ بَرَ عِ سُشُ.
16 عِ شَ يُلّيَ شَ فبٌي بَرَ عِ قِندِ يُنُبِتْي حَاشِ رَ.
نَ كُي ﭑ نَشَ عِ كٍرِ عَلَ شَ فٍيَ قَرِ،
ﭑ نَشَ مَلٍكّ سّنبّ بَ عِ يِ.
17 عِ شَ تٌقَنيِ نَن عَ نِيَ عِ شَ قِندِ يّتّ عِفبٌي رَ.
عِ شَ قٍ كٌلٌنيِ نَن عَ نِيَ عِ شُن شَ رَكَنَ.
نَ كُي ﭑ نَشَ عِ شَ قٍ مَفٌرٌ بْشِ مَ عَلَكٌ مَنفّيٍ شَ عِ تٌ.
18 عِ شَ يُنُبِيٍ نُن عِ شَ تِنشِنتَرٍيَ عِ شَ يُلّيَ كُي،
نَ بَرَ عِ شَ سَلِدٍيٍ قِندِ يِرٍ سّنِيّنتَرٍيٍ رَ.
ﭑ بَرَ تّ رَ مِنِ عِ شِلِ مَ نَشَن عِ شُن نَكَنَمَ،
ﭑ بَرَ عِ قِندِ شُبٍ رَ حَمَ يَ شْرِ.
19 مَنفّ نَشٍيٍ نُ عِ كٌلٌن،
عٍ بِرِن بَرَ مَكَابَ عِ شَ فبَلٌي شَ قٍ رَ.
عِ شَ قٍ بَرَ حْن كٍرٍنيِ رَ.›»
20 عَلَتَلَ نَشَ عَ مَسٍن ﭑ بّ، عَ نَشّ،
21 «عَدَ مَدِ، عِ شَ تِ سِدْن كَنكٍ، عِ شَ مَسٍنيِ تِ عَ بّ ﭑ شِلِ رَ، عَ قَلَقٍ رَ،
22 ‹وٌ مَرِفِ عَلَتَلَ يِ نَن مَسٍنشِ؛
ﭑ بَرَ كٍلِ عِ شِلِ مَ سِدْن!
ﭑ نَ ﭑ مَ نْرّ مَسٍنمَ نّ وٌ تَفِ.
ﭑ نَ وٌ حَشَنكَتَ، مِشِيٍ عَ كٌلٌنمَ نّ عَ ﭑ تَن نَن نَ عَلَتَلَ رَ.
نَ لْشْي ﭑ نَ ﭑ مَ سّنِيّنيِ مَسٍنمَ نّ وٌ يَ مَ.
23 ﭑ وُفَنيِ رَدِنمَ نّ وٌ مَ، مِشِ فبٍفبٍ شَ قَشَ تَا كُي.
ﭑ سَنتِدّفّمَ رَوَلِمَ نّ وٌ شِلِ مَ، مِشِ فبٍفبٍ شَ سْنتْ يِرٍ بِرِن.
نَ كُي مِشِيٍ عَ كٌلٌنمَ نّ عَ ﭑ تَن نَن نَ عَلَتَلَ رَ.›»
24 «نَ تّمُي وٌ مُ لُمَ عَلْ تُنبٍيٍ عِسِرَيِلَ بْنسْي سّيتِ مَ سْنْن، عٍ قَ عَ كٌلٌن عَ ﭑ تَن نَن نَ عٍ مَرِفِ عَلَتَلَ رَ.»
25 عَلَتَلَ نَشَ عَ مَسٍن ﭑ بّ، عَ نَشّ، «ﭑ نَ فّ عِسِرَيِلَ بْنسْييٍ بِرِن تٌنفٌدٍ حَمَنّيٍ تَفِ عٍ رَيٍنسٍنشِ دّننَشّ، ﭑ نَ ﭑ مَ سّنِيّنيِ مَسٍنمَ نّ عٍ بّ حَمَنّيٍ يَ شْرِ. نَ تّمُي عٍ سَبَتِمَ نّ قَ عٍ شَ بْشِ مَ، ﭑ نَشَن قِشِ ﭑ مَ كٌنيِ يَشُبَ مَ.
26 عٍ لُمَ نّ نَا شَشِلِسَ كُي، عٍ بَنشِيٍ تِ، عٍ سَنسِيٍ سِ. عٍ دْشْ نَا شَشِلِسَ كُي، ﭑ نَ عٍ دْشْبٌورٍيٍ حَشَنكَتَمَ تّمُي نَشّ، نَشٍيٍ نُ بَرَ عٍ تْورْ كِ قَنيِ رَ. نَ تّمُي، عٍ عَ كٌلٌنمَ نّ عَ ﭑ تَن نَن عٍ مَرِفِ عَلَتَلَ رَ.»