3
عِسَ نُن نِكٌدٍ مُ شَ سُمُنيِ
1 يُوِقِ كُنتِفِ ندٍ نُ نَ قَرِ سّنِيٍ يَ مَ، نَشَن شِلِ نِكٌدٍ مُ.
2 عَ نَشَ سِفَ عِسَ شْن مَ كْي رَ، عَ عَ قَلَ عَ بّ، «كَرَ مْشْ، مُشُ عَ كٌلٌن كَرَ مْشْ نَن عِ رَ عَلَ نَشَن شّيشِ. عِ تْنشُمَ مَكَابَشِ نَشٍيٍ رَبَقٍ، مِشِ يٌ مُ نْمَ عٍ رَبَدٍ شَ عَ كَنيِ نُن عَلَ شَ مُ عَ رَ.»
3 عِسَ نَشَ عَ مَسٍن عَ بّ، «ﭑ شَ نْندِ يَتِ قَلَ عِ بّ، شَ مِشِ مُ بَرِ عَ نّينّ رَ، عَ مُ نْمَ سٌدٍ عَلَ شَ مَنفّيَ نِينِ بُن مَ.»
4 نِكٌدٍ مُ نَشَ عَ مَشْرِن، «مِشِ مْشِ نْمَ فبِلٍندٍ عَ نفَ تّيفّ، عَ مَن فبِلٍن بَرِ رَ؟»
5 عِسَ نَشَ عَ يَابِ، «عَ نْندِ عِ مَ ﭑ شَ عَ قَلَ عِ بّ، شَ مِشِ مُ بَرِ عَ نّينّ رَ، يٍ نُن عَلَ شَشِلِ سّنِيّنشِ سَابُي رَ، عَ مُ نْمَ سٌدٍ عَلَ شَ مَنفّيَ نِينِ بُن مَ.»
6 «قَتٍ بّندّ نَن مِشِ قَتٍ بّندّ بَرِ مَ. كْنْ مِشِ شَشِلِ تَن بَرِ مَ عَلَ شَشِلِ سّنِيّنشِ نَن سَابُي رَ.
7 ﭑ تٌ عَ قَلَشِ عِ بّ عَ قٌ وٌ شَ بَرِ عَ نّينّ رَ، نَ نَشَ عِ تّرّننَ.
8 قٌيٍ مِنِمَ عَ نَ وَ مِنِقٍ دّدّ بِرِ رَ. عِ عَ شُي نَن مّمَ، كْنْ عِ مُ عَ كٍلِدٍ كٌلٌن، عِ مُ عَ سِفَدٍ قَن كٌلٌن. مِشِ نَ بَرِ عَ نّينّ رَ عَلَ شَشِلِ سّنِيّنشِ سَابُي رَ، عَ لُمَ نَ كِ نّ.»
9 نِكٌدٍ مُ نَشَ عَ مَشْرِن، «نَ رَبَمَ دِ؟»
10 عِسَ نَشَ عَ يَابِ، «عِ تَن نَشَن قِندِشِ عِسِرَيِلَ كَرَ مْشْ شُنفبٍ رَ، عِ مُ نَ كٌلٌن؟
11 ﭑ شَ نْندِ يَتِ قَلَ عِ بّ، مُشُ قٍيٍ نَن قَلَمَ مُشُ نَشٍيٍ كٌلٌن. مُشُ مَن قٍيٍ نَن سٍيدٍ بَمَ مُشُ نَشٍيٍ تٌشِ، كْنْ وٌ بَرَ تٌندِ مُشُ شَ سٍيدٍحْشْيَ رَ.
12 شَ وٌ مُ لَ ﭑ شُي رَ، ﭑ تٌ يِ دُنِحَ قٍيٍ قَلَقٍ وٌ بّ، شَ ﭑ سَ عَرِيَننَ قٍيٍ نَن قَلَ وٌ بّ، وٌ لَمَ عَ رَ دِ؟
13 مِشِ يٌ مُ نُ تٍ عَرِيَننَ، قٌ عَدَ مَ شَ دِ نَشَن كٍلِشِ عَرِيَننَ.»
14 «عَننَبِ مُنسَ تٌ نُ نَ فبٍنفبٍرٍنيِ مَ، عَ نَشَ بْشِمَسٍ مِسَالِ ندٍ يَءِلَن وُرٍ فبٍيلِ رَ، عَ عَ عِتٍ وُرِ كُيٍ مَ. عَدَ مَ شَ دِ قَن لَنمَ عَ شَ عِتٍ وُرِ كْن نَ نَ كِ نّ،
15 عَلَكٌ نَشَن يٌ دَنشَنِيَ عَ مَ، نَ كَنيِ شَ كِسِ سْتْ نَشَن مُ حْنمَ عَبَدَن.
16 عَلَ دُنِحَ شَنُ نّ هَن عَ نَشَ عَ شَ دِ كٍرٍنيِ قِ، عَلَكٌ مِشِ يٌ نَشَن نَ دَنشَنِيَ عَ مَ، عَ نَشَ لْي، عَ شَ كِسِ نّ عَبَدَن.
17 عَلَ مُ عَ شَ دِ شّي دُنِحَ شَ رَتْندٍ، عَ عَ شّي نّ عَ شَ قَ دُنِحَ رَكِسِ.
18 نَشَن يٌ نَ دَنشَنِيَ عَ مَ، كِيتِ مُ كَنَمَ نَ كَنيِ رَ، كْنْ نَشَن يٌ مُ دَنشَنِيَ عَ مَ، كِيتِ حَن بَرَ فّ كَنَدٍ نَ كَنيِ رَ، بَرِ مَ عَ مُ دَنشَنِيَشِ عَلَ شَ دِ كٍرٍنيِ مَ.
19 كِيتِ نَن يَ؛ عَلَ شَ نَءِيَلَنيِ بَرَ قَ دُنِحَ، كْنْ دِ مِ رَقَن عَدَ مَدِيٍ مَ دَنفِ نَ نَءِيَلَنيِ رَ، بَرِ مَ عٍ كّوَلِ مُ قَن.
20 نَءِيَلَنيِ مُ رَقَن قٍ كٌبِ رَبَ يٌ مَ. عٍ مُ مِنِمَ نَءِيَلَنيِ مَ، عٍ شَ وَلِ كٌبِيٍ نَشَ قَ سَ كّنّ مَ.
21 كْنْ نَشَن يٌ حّرّ مَ عَلَ شَ نْندِ مَ، عَ تَن مِنِمَ نَءِيَلَنيِ مَ، عَلَكٌ عَلَ وَشْنقٍ عٍ نَشَن نَبَقٍ، نَ شَ سَ كّنّ مَ.»
عَننَبِ يَيَ سٍيدٍ بَقٍ عِسَ شَ قٍ رَ
22 نَ شَنبِ، عِسَ نُن عَ قْشِرَبِرّيٍ نَشَ كٍلِ دَرِ سَلَمُ عٍ سٌ يُدَيَ بْشِ مَ. عِسَ نَشَ وَشَتِ ندٍ رَبَ مّننِ عَ نُن عَ قْشِرَبِرّيٍ، عٍ نُ مِشِيٍ شُنشَمَ يٍ شْورَ.
23 يَيَ قَن نُ مِشِيٍ شُنشَمَ يٍ شْورَ عٍنٌن نّ، سَلِمٌن قّ مَ، بَرِ مَ يٍ فبٍفبٍ نُ نَ نَا. مِشِيٍ نُ سِفَمَ عَ شْن، عَ تَن نُ عٍ شُنشَ يٍ شْورَ.
24 عَ عَ لِشِ نَ تّمُي، عَ مُ نُ سَشِ فٍيلِ سِندٍن.
25 لْشْ ندٍ، وْيّنيِ نَشَ مِنِ يَيَ قْشِرَبِرّيٍ نُن يُوِقِ ندٍ تَفِ مَرَ سّنِيّنيِ شَ قٍ رَ.
26 عٍ نَشَ سِفَ يَيَ يِرٍ، عٍ عَ قَلَ عَ بّ، «كَرَ مْشْ، وٌ نُن شّمّ نَشَن نُ عَ رَ يُرُدّن نَاكِرِ مَ، عِ بَرَ نَشَن مَ قٍ سٍيدٍ بَ، عَ نَ مِشِيٍ شُنشَقٍ يٍ شْورَ. بِرِن نَ سِفَقٍ عَ يِرٍ.»
27 يَيَ نَشَ عٍ يَابِ، «مِشِ مُ قٍقٍ سْتْمَ، قٌ عَلَ نَ نَشَن قِ عَ مَ.
28 وٌ تَن يَتِ بَرَ قِندِ ﭑ مَ سٍيدٍيٍ رَ، عَ ﭑ عَ مَسٍن نّ، ‹ﭑ تَن شَ مُ قِندِشِ عَلَ شَ مِشِ سُفَندِشِ رَ. ﭑ شّيشِ عَ يَ رَ نّ.›
29 شّمّ نَشَن فِنّ قٍنشِ، عَ تَن نَن قِندِ مَ فِنّ كَنيِ رَ. عَ دّقَنبٌورٍ تَن لُمَ عَ قّ مَ نّ، عَ عَ تُلِ مَتِ عَ رَ حّلّشِنيِ كُي. ﭑ تَن لُمَ نَ كِ نّ عِسَ بّ. ﭑ مَ سّيوّ بَرَ كَمَلِ.
30 قٌ عِسَ شَ قٍ شَ عِتٍ نّ، ﭑ فبٍ شَ عِفٌرٌ.»
31 «نَشَن كٍلِشِ كٌورٍ، عَ تَن دَنفِ بِرِن نَ. نَشَن كٍلِشِ دُنِحَ مَ، دُنِحَ مِشِ نَن عَ رَ نَشَن وْيّنمَ عَ دُنِحَ كِ مَ، كْنْ نَشَن تَن كٍلِشِ عَرِيَننَ، عَ تَن دَنفِ بِرِن نَ.
32 عَ تَن قٍ نَن سٍيدٍ بَمَ، عَ بَرَ نَشَن تٌ، عَ مَن بَرَ نَشَن مّ، كْنْ مِشِ يٌ مُ لَمَ عَ شَ سٍيدٍحْشْيَ رَ.
33 مِشِ نَشَن لَمَ نَ سٍيدٍحْشْيَ رَ، عَ بَرَ عَ كٌلٌن عَ عَلَ نْندِ نَن قَلَمَ.
34 عَلَ شَ شّيرَ عَلَ شَ مَسٍنيِ نَن تِمَ، بَرِ مَ عَ كَمَلِشِ عَلَ شَشِلِ سّنِيّنشِ رَ.
35 بَبَ عَلَ عَ شَ دِ شَنُشِ نّ، عَ قٍ بِرِن سَ عَ بّلّشّ.
36 نَشَن نَ دَنشَنِيَ عَلَ شَ دِ مَ، عَ بَرَ عَبَدَن كِسِ سْتْ. كْنْ نَشَن نَ عَلَ شَ دِ شُي مَتَندِ، نَ كَنيِ تَن مُ كِسِمَ. عَلَ شَ شْنّ نَن بِرَ مَ عَ قْشْ رَ.»