16
وَلِكّ شُنمَتِ كْوتَشِ شَ تَالِ
مَتِيُ ٦؛٢٤
1 عِسَ مَن نَشَ عَ قَلَ عَ قْشِرَبِرّيٍ بّ، «شّمّ بَننَشِ ندٍ نُ بَرَ عَ شَ قٍ بِرِن تَشُ عَ شَ وَلِكّ شُنمَتِ رَ، عَ شَ عَ رَحّرّ. لْشْ ندٍ، عَ نَشَ عَ مّ، عَ نَ وَلِكّ شُنمَتِ نُ نَ عَ هَرِفٍ مَكَنَقٍ.
2 عَ نَشَ عَ شِلِ، عَ عَ مَشْرِن، ‹ﭑ نَنسٍ مّشِ عِ شَ قٍ رَ؟ عِ شَ عِ شَ وَلِ دّنتّفّ سَ ﭑ بّ، بَرِ مَ ﭑ بَرَ شُنمَتِ وَلِ بَ عِ يِ رَ.›
3 وَلِكّ شُنمَتِ نَشَ عَ قَلَ عَ يّتّ بّ، ‹ﭑ مُنسٍ رَبَمَ قَ؟ ﭑ مَ مَنفّ بَرَ ﭑ نَمِنِ وَلِدٍ. سّنبّ مُ ﭑ يِ ﭑ شَ سِفَ يِرٍ بُشَدٍ، ﭑ مَن يَافِمَ نّ كُلّ مَتِدٍ.
4 ﭑ بَرَ قَ عَ كٌلٌن ﭑ نَشَن نَبَمَ، عَلَكٌ ﭑ مَ وَلِ نَ بَ ﭑ يِ، مِشِيٍ شَ نُ ﭑ نَسّنّ عٍ شْنيِ.›»
5 «عَ نَشَ عَ مَرِفِ شَ دٌنِتِيٍ بِرِن شِلِ كٍرٍن كٍرٍن يِ رَ. نَشَن سِنفٍ قَ، عَ نَشَ عَ مَشْرِن، ‹ﭑ مَرِفِ شَ يٍرِ نَ عِ مَ؟›
6 نَ نَشَ عَ يَابِ، ‹عٌلِوِ تُرٍ سُنبُي يَ كّمّ.› وَلِكّ شُنمَتِ نَشَ عَ قَلَ عَ بّ، ‹عِ شَ عِ شَ كّيدِ تٌنفٌ مَقُرٍن، دْشْ، عِ عَ سّبّ تٌنفٌ سُولِ.›
7 نَ شَنبِ، عَ نَشَ عَ قَلَ فبّتّ بّ، ‹عِ تَن فٌ؟ يٍرِ نَ عِ مَ؟› نَ نَشَ عَ يَابِ، ‹مَالٍ بُسَلِ وُلُ كٍرٍن.› عَ نَشَ عَ قَلَ عَ بّ، ‹عِ قَن شَ كّيدِ تٌنفٌ، عِ شَ عَ سّبّ كّمّ سٌلٌمَسَشَن.›
8 نَ كُي، نَ وَلِكّ شُنمَتِ تِنشِنتَرٍ شَ مَنفّ نَشَ عَ مَتْشْ، عَ تٌ كْوتَ رَبَشِ.»
«يِ دُنِحَ مِشِ نَشٍيٍ حّرّ مَ دِ مِ كُي، عٍ كْوتَ عٍ بٌورٍيٍ مَبِرِ، دَنفِقٍ مِشِيٍ رَ نَشٍيٍ حّرّ مَ نَءِيَلَنيِ كُي.
9 ﭑ شَ عَ قَلَ وٌ بّ، وٌ شَ دّقَنحَ قٍن يِ دُنِحَ تِنشِنتَرٍ شَ نَاقُلِ سَابُي رَ. نَ نَاقُلِ نَ حْن، وٌ قَمَ رَ سّنّدٍ بَنشِيٍ كُي نَشٍيٍ مُ كَنَمَ عَبَدَن.»
10 «نَشَن مُ لَنلَنتٍيَ كَنَمَ قٍ شُرُدِ كُي، عَ مُ لَنلَنتٍيَ كَنَمَ قٍ شُنفبٍ قَن كُي. نَشَن مُ تِنشِن قٍ شُرُدِ كُي، عَ مُ تِنشِنمَ قٍ شُنفبٍ قَن كُي.
11 شَ وٌ بَرَ لَنلَنتٍيَ كَنَ يِ دُنِحَ تِنشِنتَرٍ شَ نَاقُلِ قٍ كُي، ندٍ قَ لَمَ وٌ رَ عَ شَ عَرِيَننَ بَننَيَ تَشُ وٌ رَ؟
12 شَ وٌ بَرَ لَنلَنتٍيَ كَنَ سٍ تَشُشِ شَ قٍ كُي، ندٍ قَ وٌ فبٍ سٌمَ وٌ يِ؟»
13 «كٌنيِ يٌ مُ نْمَ لُدٍ مَرِفِ قِرِن شَ يَامَرِ بُن مَ، بَرِ مَ عَ قَمَ مَرِفِ كٍرٍن شْندٍ، عَ بٌورٍ مَشَنُ. عَ شِرِ مَ نّ كٍرٍن نَ، عَ بٌورٍ رَبٌلٌ. وٌ مُ نْمَ عَلَ نُن نَاقُلِ رَبَتُدٍ.»
عِسَ شَ مَسٍنيِ ندٍيٍ
مَتِيُ ١١؛١٢ ٬ ١٣، ٥؛٣١ ٬ ٣٢، ٥؛١٨، مَرَكِ ١٠؛١١ ٬ ١٢
14 قَرِ سّنِيٍ، كْبِرِ نُ رَقَنشِ نَشٍيٍ مَ، عٍ قَن نَشَ عٍ تُلِ مَتِ نَ قٍ بِرِن نَ، عٍ نُ عِسَ مَيٍلٍ.
15 عِسَ نَشَ عَ مَسٍن عٍ بّ، «وٌ وَ مَ وٌ يّتّ مَسٍنقٍ تِنشِنتْييٍ نَن نَ عَدَ مَدِيٍ يَ عِ، كْنْ عَلَ وٌ بْحّ مَ قٍ كٌلٌن. نَشَن تِدٍ فبٌ مِشِيٍ بّ، عَلَ نَ شْنشِ.»
16 «عَننَبِ مُنسَ شَ سّرِيّ نُن نَمِحْنمّيٍ شَ كِتَابُييٍ نَن كَوَندِ هَن يَيَ شَ وَشَتِ. كٍلِ نَ تّمُي مَ، عَلَ شَ مَنفّيَ نِينِ شَ شِبَارُ قَنيِ نَن كَوَندِ مَ قَ، مِشِيٍ قٍ بِرِن نَن نَبَقٍ، عَلَكٌ عٍ شَ سٌ عَلَ شَ مَنفّيَ نِينِ بُن مَ.
17 كٌورٍ نُن بْشِ لْيمَ نّ بٍينُن سِفِرّ كٍرٍن شَ بَ عَلَ شَ سّرِيّ رَ.»
18 «شّمّ يٌ مّي عَ شَ فِنّ رَ، عَ سَ فبّتّ دْشْ، عَ كَنيِ بَرَ يّنّ رَبَ. نَشَن نَ فِنّ دْشْ شّمّ بَرَ مّي نَشَن نَ، عَ قَن بَرَ يّنّ رَبَ.»
بَننَ شّمّ نُن لَسَرُ شَ تَالِ
19 «شّمّ بَننَشِ ندٍ نُ نَ، نَشَن نُ لُمَ عَ مَشِرِ رَ دُفِ سَرٍ شْرْشْييٍ رَ. تّمُي بِرِن، عَ نُ شُلُنيِ نَن تِقٍ. لْشْ يٌ لْشْ، عَ نُ لُفَمَ دٌنسٍ حْشُنمّ نَن نَ.
20 مِسِكِينّ ندٍ نُ سَشِ يِ بَننَ شَ تّتّ سٌدٍ دّ رَ، نَشَن نُ شِلِ لَسَرُ. سُورِيٍ نُ نَ عَ قَتٍ بِرِن مَ.
21 عَ نُ وَ مَ دٌنسٍ شُنتُنيِ ندٍيٍ نَن سْتْقٍ نَشٍيٍ نُ بِرَ مَ نَ بَننَ شَ تٍيبِلِ رَ. عَ تٌ نُ سَشِ نَا، بَرٍيٍ نَن نُ قَمَ عَ يِرٍ، عٍ نُ عَ شَ سُورِيٍ مَكْن.»
22 «لْشْ ندٍ مِسِكِينّ نَشَ لَاشِرَ، مَلٍكّيٍ نَشَ سَ عَ شَنِن عَننَبِ عِبُرَهِمَ يِرٍ. نَ بَننَ شّمّ قَن نَشَ قَشَ، عَ رَفَتَ،
23 عَ سِفَ يَهَننَمَ. عَ شَ حَشَنكَتّ كُي مّننِ، عَ نَشَ عَ يَ رَتٍ عَ سَ عَننَبِ عِبُرَهِمَ تٌ يِرٍ مَكُيٍ، عٍ نُن لَسَرُ.
24 عَ نَشَ عَ شُي رَ مِنِ، ‹ﭑ بَبَ عِبُرَهِمَ، كِنِكِنِ ﭑ مَ! يَندِ، لَسَرُ شّي ﭑ يِرٍ، عَ شَ عَ بّلّشّسٌلٍ رَ سِن يٍ شْورَ، عَ ﭑ نّنيِ مَشِنبٍلِ، بَرِ مَ ﭑ نَ يِ تّ نَشَن شْورَ، عَ ﭑ حَشَنكَتَقٍ عَ حَاشِ رَ!›»
25 «كْنْ عَننَبِ عِبُرَهِمَ نَشَ عَ يَابِ، ‹ﭑ مَ دِ، عِ شَ عِ رَتُ، عِ تَن بَرَ قٍ قَنيِ سْتْ عِ شَ دُنِحّءِفِرِ كُي، كْنْ لَسَرُ تَن تْورّ نَن سْتْ. يَكْسِ، عَ تَن بَرَ مَدُندُ بٍ، عِ تَن نَ حَشَنكَتَقٍ.
26 سَ نَ بِرِن شُن، فُلُنبَ بٍلٍبٍلٍ نَن سَشِ وٌن تَفِ، عَلَكٌ مِشِ نَشَ نْ كٍلِدٍ بٍ سِفَقٍ رَ عِ يِرٍ، مِشِ مَن نَشَ نْ كٍلِدٍ مّننِ فِرِقٍ رَ مُشُ قَن يِرٍ.›»
27 «نَ كُي، بَننَ نَشَ عَ قَلَ عَ بّ، ‹عَوَ ﭑ بَبَ، ﭑ بَرَ عِ مَيَندِ، عِ شَ لَسَرُ شّي ﭑ بَبَ شْنيِ،
28 بَرِ مَ شُنيَ سُولِ نَن نَ ﭑ بّ. عَ شَ سَ عٍ رَ سِ، عَلَكٌ عٍ نَشَ قَ بٍ، يِ حَشَنكَتّ مَ.›
29 كْنْ عَننَبِ عِبُرَهِمَ نَشَ عَ يَابِ، ‹عَننَبِ مُنسَ نُن نَمِحْنمّيٍ شَ كِتَابُييٍ نَ عٍ يِ. عٍ شَ عٍ تُلِ مَتِ نٍيٍ شَ مَسٍنيِيٍ رَ.›
30 بَننَ نَشَ عَ قَلَ، ‹ﭑ بَبَ عِبُرَهِمَ، نَ مُ سْونّيَمَ، كْنْ شَ مِشِ ندٍ كٍلِ قَشَمِشِيٍ يَ مَ سِفَقٍ رَ عٍ شْن، عٍ تُوبِمَ نّ.›
31 كْنْ عَننَبِ عِبُرَهِمَ نَشَ عَ مَسٍن عَ بّ، ‹شَ عٍ مُ عَننَبِ مُنسَ نُن نَمِحْنمّيٍ شُي رَ مّمَ، هَلِ مِشِ كٍلِ قَشّ مَ، عٍ مُ لَمَ عَ رَ.›»