7
عَلَ شَ سّرِيّ نُن عَدَ مَ شَ نَامُنيِ
مَتِيُ ١٥؛١ ٬ ٢٠
1 قَرِ سّنِيٍ نَشَ عٍ مَلَن عِسَ يِرٍ، عٍ نُن سّرِيّ كَرَ مْشْ ندٍيٍ نَشٍيٍ نُ بَرَ قَ كٍلِقٍ دَرِ سَلَمُ.
2 عٍ نَشَ عَ تٌ، عَ قْشِرَبِرّ ندٍيٍ عٍ دّفٍمَ عٍ بّلّشّ سّنِيّنتَرٍيٍ رَ، عٍ مُ عٍ رَشَشِ نَامُنيِ كِ مَ.
3 قَرِ سّنِيٍ نُن يُوِقِ بِرِن نّ عٍ دّفٍمَ قٌ عٍ عٍ بّلّشّ رَشَ سِندٍن عٍ شَ نَامُنيِ كِ مَ نَشَن قَتَنشِ عٍ بٍنبَيٍ رَ.
4 شَ عٍ كٍلِ حَمَ يِرٍ، عٍ مُ عٍ دّفٍمَ سِندٍن، قٌ عٍ فّ عٍ مَشَدٍ عَ دِينّ كِ مَ. نَامُنيِ وُيَشِ مَن نَ عٍ يِ رَ، عَلْ تْنبِلِ، تُندٍ، نُن ثَانِ مَشَ كِ.
5 نَ كُي، قَرِ سّنِيٍ نُن سّرِيّ كَرَ مْشْيٍ نَشَ عِسَ مَشْرِن، «مُنقٍ رَ عِ قْشِرَبِرّيٍ مُ بِرَشِ قٌرِيٍ شَ نَامُنيِيٍ قْشْ رَ، عٍ نُ عٍ دّفٍ عٍ بّلّشّ سّنِيّنتَرٍيٍ رَ؟»
6 عِسَ نَشَ عٍ يَابِ، «وٌ تَن قِلَنكَقُييٍ، عَننَبِ عٍسَيِ نْندِ يَتِ نَن مَسٍن وٌ شَ قٍ رَ عَ شَ كِتَابُي كُي،
‹يِ حَمَ ﭑ بِنيَمَ عٍ دّ نّ،
كْنْ عٍ بْحّ مَكُيَ ﭑ نَ ثٌن!
7 عٍ شَ سَلِ قُقَقُ نَ عَ رَ،
بَرِ مَ عٍ مِشِ شَرَنمَ عَدَ مَدِيٍ شَ مَحْشُنيِيٍ نَن نَ
عَلْ نَ نَامُنيِيٍ نَن قِندِشِ ﭑ تَن مَ سّرِيّ نَن نَ.›»
8 «وٌ بَرَ عَلَ شَ سّرِيّ بّحِن، وٌ بِرَ مِشِيٍ شَ نَامُنيِ قْشْ رَ.»
9 عِسَ مَن نَشَ عَ مَسٍن عٍ بّ، «وٌ قَتَشِ دٍ! وٌ فبِلٍنشِ عَلَ شَ سّرِيّ نَن قْشْ رَ عَلَكٌ وٌ شَ بِرَ وٌ فبٍ نَامُنيِ قْشْ رَ!
10 عَننَبِ مُنسَ بَرَ عَ مَسٍن، ‹وٌ شَ وٌ بَبَ نُن وٌ نفَ بِنيَ.› عَ مَن بَرَ عَ مَسٍن، ‹مِشِ يٌ نَشَن عَ بَبَ نُن عَ نفَ كٌنبِ، عَ لَن نّ نَ كَنيِ شَ قَشَ.›
11 كْنْ وٌ تَن نَشّ، شَ مِشِ ندٍ عَ قَلَ عَ بَبَ شَ نَ مُ عَ نفَ بّ، ‹عِ نُ لَنمَ عِ شَ نَشَن سْتْ ﭑ نَ عِ مَلِسٍ رَ، ﭑ بَرَ عَ قِ عَلَ مَ،›
12 هَلِ نَ كَنيِ مُ قٍقٍ رَبَ عَ بَبَ نُن عَ نفَ بّ.
13 نَ كُي، وٌ عَلَ شَ سّرِيّ مَتَندِ مَ وٌ شَ نَامُنيِيٍ سَابُي رَ، وٌ مَن قَ نٍيٍ نَن مَسٍنمَ وٌ شَ دِيٍ بّ. وٌ نَ قٍ مْولِ فبٍفبٍ نَن نَبَمَ، بَقٍ يِ رَ.»
14 عِسَ مَن نَشَ حَمَ شِلِ، عَ عَ مَسٍن عٍ بّ، «وٌ بِرِن شَ وٌ تُلِ مَتِ ﭑ نَ، وٌ شَ قَهَامُي سْتْ.
15-16 دٌنسٍ نَشَن كٍلِ عَ قَرِ مَ، عَ سٌ مِشِ قَتٍ عِ، عَ سٍسٍ مُ نَ نَشَن نْمَ عَ كَنيِ قِندِدٍ مِشِ سّنِيّنتَرٍ رَ. قٍ كٌبِ نَشٍيٍ كٍلِمَ مِشِ بْحّ مَ، نٍيٍ نَن عَ كَنيِ قِندِ مَ مِشِ سّنِيّنتَرٍ رَ.»
17 عِسَ تٌ بَرَ كٍلِ حَمَ شُن، عَ سٌ بَنشِ، عَ قْشِرَبِرّيٍ نَشَ عَ مَشْرِن يِ تَالِ وْيّنيِ مَ.
18 عَ نَشَ عَ مَسٍن عٍ بّ، «يَشَ وٌ قَن مُ قَهَامُي سْتْ؟ وٌ مُ عَ كٌلٌن، عَ دٌنسٍ يٌ كٍلِ عَ قَرِ مَ، عَ سٌ مِشِ قَتٍ عِ، نَ مُ نْمَ عَ كَنيِ قِندِدٍ مِشِ سّنِيّنتَرٍ رَ؟
19 بَرِ مَ نَ مُ سٌمَ بْحّ شَ كُي، عَ فٌرٌ مَ قُرِ نّ، عَ قَ مِنِ مِشِ قَتٍ عِ.» نَ كُي، عِسَ عَ مَسٍن نّ، عَ دٌنسٍ بِرِن سّنِيّن.
20 عَ مَن نَشَ عَ مَسٍن، «قٍ كٌبِ نَشَن كٍلِمَ مِشِ بْحّ مَ، نَ نَن عَ كَنيِ قِندِ مَ مِشِ سّنِيّنتَرٍ رَ.
21 بَرِ مَ شَشِلِ كٌبِ قَتَنمَ مِشِ بْحّ نَن نَ، عَلْ لَنفٌيحَ، مُحّ، قَشّ تِقٍ،
22 يّنّ، وَ سَتَرٍيَ، حَاشُي، يَنقَنتٍيَ، حّنفّيَ، تْونّ، كٌنبِ، يّتّ عِفبٌي، نُن دَشُحَ.
23 نَ قٍ كٌبِيٍ بِرِن كٍلِمَ مِشِ بْحّ نَن مَ، عٍ عَ كَنيِ قِندِ مِشِ سّنِيّنتَرٍ رَ.»
سِرِيَ قٍنِسِيَ فِنّ شَ دَنشَنِيَ
مَتِيُ ١٥؛٢١ ٬ ٢٨
24 عِسَ نَشَ كٍلِ مّننِ، عَ سِفَ تِرٍ بْشِ مَ. عَ نَشَ سٌ عَ يِفِيَدٍ. عَ مُ نُ وَ مَ مِشِ يٌ شَ عَ يِرٍ كٌلٌن، كْنْ عَ مُ نْ عَ نْشُندٍ.
25 فِنّ ندٍ نُ نَ، حِننّ نُ نَشَن شَ دِ فِنّ قْشْ رَ. عَ تٌ عِسَ شَ قٍ مّ، عَ نَشَ قَ عَ يِرٍ، عَ سُيِدِ عَ بّ.
26 يُوِقِ شَ مُ نُ يِ فِنّ رَ، عَ نُ بَرِشِ سِرِيَ قٍنِسِيَ نّ. عَ نَشَ عِسَ مَيَندِ، عَ شَ حِننّ كٍرِ عَ شَ دِ فِنّ قْشْ رَ.
27 عِسَ نَشَ عَ يَابِ، «عَ لُ دِ مّيٍ نَن سِنفٍ شَ عٍ دّفٍ، بَرِ مَ عَ مُ لَن تَامِ شَ بَ دِ مّدِيٍ يِ رَ، عَ سَ بَرٍيٍ بُن.»
28 فِنّ قَن نَشَ عَ يَابِ، «مَرِفِ، عِ نْندِ، كْنْ بَرٍدِ نَشٍيٍ نَ تٍيبِلِ بُن مَ، عٍ قَن دِ مّيٍ شَ دٌنسٍ دٌنمَ نَشَن بِرَ مَ بْشِ.»
29 عِسَ نَشَ عَ قَلَ عَ بّ، «عِ شَ يَابِ شَ قٍ رَ، سِفَ، حِننّ بَرَ فبِلٍن عِ شَ دِ فِنّ قْشْ رَ.»
30 فِنّ تٌ فبِلٍن عَ شْنيِ، عَ نَشَ عَ شَ دِ لِ عَ سَشِ سَدٍ مَ، حِننّ بَرَ فبِلٍن عَ قْشْ رَ.
عِسَ تُلِشْرِ بٌبٌشِ رَيَلَنقٍ
31 عِسَ نَشَ كٍلِ تِرٍ بْشِ، عَ دَنفِ سِدْن، عَ فبِلٍن فَلِلٍ بَا مَبِرِ، تَا قُ بْشِ مَ.
32 عٍ نَشَ قَ تُلِشْرِ ندٍ رَ عَ شْن مَ، وْيّنقٍ شْرْشْشِ نَشَن مَ، عٍ عِسَ مَيَندِ عَ شَ عَ بّلّشّ سَ عَ مَ.
33 عِسَ نَشَ تُلِشْرِ تٌنفٌ حَمَ يِرٍ، عٍ سَ تِ عٍ شَتِ مَ. عِسَ نَشَ عَ بّلّشّسٌلٍيٍ رَ سٌ تُلِشْرِ تُلِيٍ كُي، عَ عَ يّتّ كَن دّيٍ سَ عَ نّنيِ مَ.
34 عَ نَشَ عَ يَ رَتٍ كٌورٍ، عَ عَ حّنفِ رَتٍ عَ بٍلٍبٍلٍ رَ. عَ قَ عَ قَلَ تُلِشْرِ بّ، «عٍقَقَتَ!» نَ نَن قَلَشِ عٍ شَ شُي، «عِ شَ رَبِ!»
35 عَ تُلِيٍ نَشَ قٍ مّ كٍرٍن نَ، عَ نّنيِ قَن نَشَ كٍلِ، عَ نَشَ وْيّن قْلْ عَ قَنيِ رَ.
36 عِسَ نَشَ عٍ يَمَرِ، عَ عٍ نَشَ يِ قٍ قَلَ مِشِ يٌ بّ. كْنْ هَلِ عِسَ تٌ نُ تْنيِ دْشْمَ عٍ مَ كِيٌكِ، عٍ تَن نُ سِفَمَ عَ شَ شِبَارُ قَلَ رَ نَن تُي.
37 عٍ نُ بَرَ كَابَ كِ قَنيِ، عٍ نُ عَ قَلَ، «عَ قٍ قَنيِ مْولِ بِرِن نَبَمَ! عَ عَ نِيَمَ تُلِشْرِ شَ قٍ مّ، بٌبٌي قَن شَ وْيّن!»