Ebaruwa eya Paulo yajojera
AWAEFEESO
Amangʼana ku owuimpi
Ebaruwa eya Awaefeeso yajojwa no *Omutumwa Paulo mu omwaka ogwa 60, ni yawanga mu owusiwe ku omugizi ogwa Rooma. Ebaruwa eno ewonekana mbwe yatumwa ku ekaniisa eya Efeeso na amakaniisa gandi agaawanga ampi ne Efeeso, aeniki ewula na amangʼana agalagana mbwe yajojerwa ekaniisa eya Efeeso engʼene. Efeeso yawanga omugizi omunene ogwa ekialo ekia *Eesia Ekitono, kandi Paulo yamenya ao ku amiire amangi na alanzia nawuno arekaao ekaniisa enene. Paulo yajoja ebaruwa eno na amaingirizio mbwe esookere Efeeso kandi mbwe ni wamiire okugisomerwa, wagitumre amakaniisa gandi goona.
Ebaruwa eya Awaefeeso egawukaane ne ebaruwa zindi ezia Paulo yajoja aeniki ngegamba-gamba ku awagerezi awa owuweeyi ne eminyako-nyaako mu ekaniisa. Paulo yajoja ebaruwa eno okuizurizia Awakristo okuwa no owulala kandi mbwe okuagala okwa Katonda kwawanga okureeta alala ewintu wiona ewiri ku igulu ni ku ekialo, ansi eya owurinzi owua omuntu omulala, ori *Kristo. Kutio ku Kristo, Awakristo woona wari awa enyumba endala kandi wasugaane wawe na awiina waawu no olugonzi, omusaaza ni mukaae, awiiwuzi na awaana waawu kandi omukangasi na awemirimo waae. Paulo lwona awoola mbwe ekaniisa ngeri enyumba eombookwe yaaya. Ne ezogaanie Awakristo woona, awaafwa na awalamu, awari mu ekialo kiona. Paulo afwanania owulala owuri agati ya Kristo ne ekaniisa, no owulala owuri agati ya ewiimo ewia omuwiri, owulala owua ewintu ewiomboka enyumba, kandi no owulala owuri agati ya omukazi no omusaaza. Amaariizia na awoola mbwe Awakristo wasugaane wamenye mu engira elagana Kristo owarimo.
1
Amakeezio agasookere
1 Ni inze Paulo, *omutumwa owa *Kristo Yesu ku okuagala okwa Katonda.
Ebaruwa eno mbajojera inywe awalowole awa Katonda awari Efeeso, awari no okuganya okuisimbiire ku Kristo Yesu.
2 Muwe no owusiza no owuolu owuema ku Soifu Katonda no *Omwami Yesu Kristo.
Paulo atondowola Katonda ku omupango ogwa owuinunuzi
3 Atondowolwe ino Katonda ori Swawu Omwami iifu Yesu Kristo, omiire okutusereka ne ensereki enyingi ezieama ku igulu, ni kuwitra ku Kristo.
4 Aeniki yatulowola namba ne ekialo kiawanga ni kikiari okulukwa, kugere tuwe awantu aweeru awawula no owuoni emberi waae ni kuwitra ku Kristo. Mu olugonzi lwae,
5 Katonda yawanga na amiire okuwisia kale mbwe tuwe awaana waae ni kuwitra ku Yesu Kristo. Kino nikio ekiawanga ekilootu ku iye kandi okuagala kwae.
6 Kutio tutondowola Katonda ku owusiza wuae owuluguulwa owua yatukorra ni kuwitra ku Omuzia waae owa agonziizie ino.
7 Ni kuwitra ku amasaai aga Kristo, tumiire okuteewua owuyanga kandi turekerwa amawi giifu, nikulondokana no owusiza owungi owua Katonda
8 amiire okulagana ku ifwe, na amaganga no okumanya kwona.
9 Kandi Katonda amiire okugera tumanya omupango gwae ogwawanga ni guiwisre, ogwa yaagalanga okutuusia ni kuwitra ku ekia Kristo yaazanga okukola.
10 Ne enyinga ziae ezisugre zimiire okutuuka, Katonda arituusia omupango ogwo olwa arita ewintu wiona ewiri ku igulu ne ewiri ku ekialo ansi eya owukangasi owua Kristo.
11 Lwona ni kuwitra ku Kristo, Katonda yatulowola okuwa awantu waae omwene aeniki nintio omwene yawisia okukola kale kandi ewintu wiona wiikola mala kiomo iye omwene yawitaao okuikola.
12 Okuagala okwa Katonda kwawanga mbwe, ifwe *Awayaudi awaasooka okuta emioyo giifu ku Kristo, tutondowole Katonda ori no owunene.
13 Kandi ku Kristo, inywe mwona olwa mwamala okuwurra amangʼana aga Katonda agari kuwuene, eri *injiili eyawareetra owuinunuzi, kandi okuta okuganya kwinyu ku Kristo, mwateewuako ekilago ekiri *Omwoyo Omweru owa yaifuuwa okutuma, okulagana mbwe muri awantu waae omwene.
14 Omwoyo Omweru ogwa Katonda nio empanwa esookere elagana mbwe Katonda aaza okutu-aa ewintu wiona ewia yaifuuwa okutu-aa kandi mbwe arituta okuwa owuyanga owutuukre. Kuno kugera ni tumutondowola ku owunene wuae.
Kristo nio otuusia ewintu wiona
15 Okuemera olwa nyawurra amangʼana aga okuganya kwinyu ku Omwami Yesu no olugonzi olwa mugonziizie nalwo awalowole awa Katonda woona,
16 nkiari okureka okuiranizia Katonda otioo ku amangʼana giinyu ni mbaingirizia mu okusawa kwange.
17 Nsawa mbwe Soifu omunene ori Katonda owa Omwami iifu Yesu Kristo, aganye awa-ee amaganga no okumanya okwa munsi okuema ku Omwoyo gwae Omweru, kugere mumanye geeza owuene owumuemako.
18 Lwona nsawa mbwe amiiso aga mu emioyo giinyu egia munsi gaiguke gawone, kugere mumanye okurindirra okwa mwaeterwa, owuri owunyazi owua ewintu ewiluguulwa ewia Katonda awiikiire awantu waae.
19 Kandi nsawa mbwe mumanye amaani gaae amangi agaluguulwa agakola emirimo ku ifwe awari no okuganya ku Kristo. Amaani gano gafwana na aga
20 Katonda yakola nago okuziusia Yesu okuema ku awafu, agia amuta nyakukono kwae okusaaza, asi aeerwe owuti mu owuami wuae owuri ku igulu.
21 Nyingeeno ari kungulu okukira owukangasi, owukire, amaani, no owuami, alala na amiina goona ku ekialo ekia nyingeeno, ne ekialo ekiiza emberi.
22 Kandi Katonda amiire okuta ewintu wiona ansi eya amagulu gaae kandi amuezania okuwa omukangasi owa ekaniisa ku ewintu wiona.
23 Ekaniisa eri omuwiri ogwa Kristo kandi nie etuusia owunene owua ari nawuo, no omwene nio otuusia ewintu wiona mu engira ziona.