Mi Banga Vinavatei
E Mataio
a nga vataro
1
Man vinateteik katsep mi tietie se Iesu Karisito
(Luka 3:23-38)
1 Ine arie man vinateteik katsep mi tietie se Iesu Karisito. E Iesu eie e tubuon e Davit. E Davit eie e tubuon e Abaraam.
2 E Abaraam eie e taman e Isak.
E Isak eie e taman e Iakop.
E Iakop eie e taman e Iuda ma bu kasien.
3 E Iuda eie e taman ba baser kasien e Peres ma e Tsera. E kinaguor, e Tamar.
E Peres eie e taman e Esron.
E Esron eie e taman e Ram.
4 E Ram eie e taman e Aminadap.
E Aminadap eie e taman e Nason.
E Nason eie e taman e Salmon.
5 E Salmon eie e taman e Boas, ma e kinan, e Raap.
E Boas eie e taman e Obet, ma e kinan, e Rut.
E Obet eie e taman e Iesse.
6 E Iesse eie e taman e Davit mi kovakova ka leong.
E Davit eie e taman e Solomon. E kinan, eie ta be nga muna reie e Uria.
7 E Solomon eie e taman e Reoboam.
E Reoboam eie e taman e Abia.
E Abia eie e taman e Asa.
8 E Asa eie e taman e Iospat.
E Iospat eie e taman e Ioram.
E Ioram eie e taman e Usia.
9 E Usia eie e taman e Iotam.
E Iotam eie e taman e Aas.
E Aas eie e taman e Esekia.
10 E Esekia eie e taman e Manase.
E Manase eie e taman e Amon.
E Amon eie e taman e Iosia.
11 E Iosia eie taman e Iekonia ma bu kasien. Ian simi avareit bu Babilon gi ta nga kerie sien bu Israel nia ra tsatsang vinatoreis i Babilon.
12 I murien mi kinakir sibu Israel rakot i Babilon,
e Iekonia eie e taman e Sealtiel.
E Sealtiel eie e taman e Serubabel.
13 E Serubabel eie e taman e Abiut.
E Abiut eie e taman e Eliakim.
E Eliakim eie e taman e Asor.
14 E Asor eie e taman e Sadok.
E Sadok eie e taman e Akim.
E Akim eie e taman e Eliud.
15 E Eliud eie e taman e Eleasar.
E Eleasar eie e taman e Mattan.
E Mattan eie e taman e Iakop.
16 E Iakop eie e taman e Iosep, e Iosep eie ken labeit e Maria.
E Maria e kinan e Iesu ese gi ta vuotongie va mi Messia.
17 Io, a nga sinangavur kes ma voveit bu kienakav kokouk sibu tam ma sibu nout kovuni se Abaraam beit se Davit, ma mi sinangavur kes ma voveit te buer bu kienakav sibu tam ma sibu nout kovuni se Davit beit simi avareit bu Babilon gi ta nga kerie bu Israel rakot nia tsatsang vinatoreis i Babilon. Io, vakaek ian en beit si ken kienakav mi Karisito a nga sinangavur kes ma voveit te buer bu kienakav sibu tam ma sibu nout.
Ken kienakav e Iesu Karisito
(Luka 2:1-7)
18 Ine arie vasa ken kienakav e Iesu Karisito a nga tsorubeit ven. E Maria, e kinan, gi nga kubutsie va eguor e Iosep va guor ta nga rei. Eiekesen i muan guor ta kap ngas nga mon kokouk, gi nga vorotan va e Maria a te nga kour simi ngesengesien mi Moromoruo Tamat.
19 E Iosep, ken labeit, eie mi ka duis i matan e Raban. A kap nga lalaron nia vamangarie e Maria i matan mi lobaram. Io, a nga vodon nia kitipie keguor rei menemenen mo.
20 Sien ta nga vor ve vodovodon surie ine, ken angelo mi Nguts a nga tsorubeit seie i aron mi binorea ma a nga vakokoit ven ne, “Iosep, natuon e Davit. Kian va e ta motou nia kerie e Maria va ke vevien, simi vunan ine mi madar eie tate tian ngan, a kuvu simi Moromoruo Tamat.
21 Eie ta kava ka madar tamat, ma e ta ngas vuotongie ngan e Iesu, simi vunan eie ta vatoa ken kulou si kegi sar sinavei tsokor.”
22 Ine bu kepineits kokouk gi nga tsorubeit nia vara tuktuk ngan mi sana nama e Raban ta nga terie i ngutsuon mi propet,
23 “Mi vevien vour ese ta kap ngas telekire ka, ta tian nge kava ka natu madar tamat, ma gi ta vuotongie ngan e Immanuel”, man vuevue va “E Raban a mon meie giet.”
24 Sien e Iosep ta nga pan, a nga tsana malan ken angelo e Raban ta nga oeng sien, ma a nga reie e Maria.
25 Eiekesen, a kap nga mutur meie tuir oit ta nga kava e Natuon tamat, ma e Iosep a nga tour asan ngan e Iesu.