7
144,000 Teꞌ Va Israël To Kon O Vëknöm Pe Sosoenën
1 A tah vëh to hik en, köꞌ ep in a taanaꞌ ankeroꞌ to sun ne po taanaꞌ noton in o oeh. Ee to öt ne o taanaꞌ paknan in a tuvuh, ka tuvuh se nat non ta manih tahiꞌ, me manih po oeh, me manih po naon.
2 Eöꞌ to ep in a meh ankeroꞌ to taneꞌ maꞌ pa ö no a potan to pepeah ke no maꞌ. Eꞌ to öt non o tah vëknöm pe Sosoenën vëh to teꞌ toꞌtoꞌ non. Eꞌ to vaoe vakis a taanaꞌ ankeroꞌ varih ne Sosoenën to heꞌ voh raoe o kikis, marën a miröꞌ o oeh, me a tahiꞌ.
3 Eꞌ to soe pan, “Eöm se koe a miröꞌ vëhöꞌ o oeh, keꞌ, a tahiꞌ, me a ma naon. Emöm to iu vateꞌ nem o vëknöm pe Sosoenën pea manih pa naira ma teꞌ kikiu peꞌ. Köm pah miröꞌ poꞌ a ma moeh tah.”
4 Ee to soe ka neoꞌ a napan varih to teꞌ me ne o vëknöm pe Sosoenën pa naire to antoen ne o 144,000 teꞌ topnin a ma vuteꞌ kurus va Israël.
5 A napan to onöt ne pa 12,000 teꞌ to kon o vëknöm to taneꞌ maꞌ po vuteꞌ pe Judaꞌ,
ko meoh 12,000 po vuteꞌ pe Ruben,
ko meoh 12,000 po vuteꞌ pe Gat.
6 Ko meoh 12,000 po vuteꞌ pe Asaꞌ,
ko meoh 12,000 po vuteꞌ pe Naptaliꞌ,
ko meoh 12,000 po vuteꞌ pe Manësaꞌ.
7 Ko meoh 12,000 po vuteꞌ pe Simeon,
ko meoh 12,000 po vuteꞌ pe Livaë,
ko meoh 12,000 po vuteꞌ pe Isakar.
8 Ko meoh 12,000 po vuteꞌ pe Sebulun,
ko meoh 12,000 po vuteꞌ pe Jeosëp,
ko meoh 12,000 po vuteꞌ pe Bënjamin.
A ma teꞌ poë varih to kon o vëknöm pe Sosoenën.
A Nap Peo To Vasunön Ne E Sosoenën
9 A ma tah varih to hik en, köꞌ ep in a nap peo rakah to vatönun, ahikta teꞌ to onöt non a ëh raoe. A ma napan varih to taneꞌ maꞌ pa ma vuteꞌ kurus, me o sionin vakëkëh, me a ma vu to, me manih po oeh avoes. Ee to sun ne matan a ö ihoꞌ pa teꞌ Sunön, me a Soneꞌ Sipsip. Ee to ohop ne a ma ohop rë kakaare ko öt ne a ma pea vito.
10 Ee to soe vakis maꞌ pan,
“Emöm to kë nem a ëhnan e Sosoenën pea to ihoꞌ non pa ö ihoꞌ pa teꞌ Sunön me a Soneꞌ Sipsip,
ee pon to kon hah a ra,
ka kuru vëh na to teꞌ vavih no!”
11 O ankeroꞌ kurus me o teꞌ susunön to teꞌ ne paan e Sunön, ee to sun tatavi ne a ö ihihoꞌ pa teꞌ sunön, vaꞌpeh me a taanaꞌ tah toꞌtoꞌ. Ee kurus to vatokon, ko vamösru ne havin a ö ihoꞌ pa teꞌ Sunön, pare vasunön ne e Sosoenën.
12 Ee to sosoe va ne manih pan,
“Oman rakah!
Ea to vaeö rakah vi no e Sosoenën pea,
ka kë no a ëhnan apuh peꞌ!
Eꞌ to teꞌ me non a ma kokoman vih vi,
ka vavihvih me no eah.
Ea se vaeö ko kë no a ëhnaneah!
Eꞌ to teꞌ me non o kikis apuh.
A ma kikis kurus neꞌ to teꞌ me non,
pa ma moeh tah kurus varih neꞌ to teꞌ tamoaan me non.
Oman!”
O Kamis Pee To Hik En
13 Ka pah teꞌ sunön hi a neöꞌ pan, “A ma napan varih to ohop ne a ma ohop kakaare, e retereh poë varih, pare taneꞌ maꞌ nih?”
14 Köꞌ piun eah pan, “Teꞌ apuh peöꞌ, eën to nat nom, eöꞌ ahik.”
Keꞌ soe poꞌ ka neöꞌ pan, “A ma napan varih to teꞌ voh ne pa tëëm no a ma kamis apuh to kon raoe. Ko eraꞌ pa Soneꞌ Sipsip ivëh to pupui vakakaare voh a ma ohop pee.
15 Ivëh,
nee to sun suk ne pa matan a ö ihihoꞌ pe Sosoenën.
Pa ma potan me pa popoen,
ee to hinhin ne manih pe Sosoenën koman a iuun vasioꞌ peꞌ.
Ke Sosoenën ihoꞌ non pa ö ihihoꞌ pa teꞌ sunön,
eꞌ varoe kuru se teꞌ me ra non poë ko matop non raoe.
16 Ee hikta se maë hah ne,
me hikta se manoe hah ne,
ka potan hikta se pa non raoe,
me a hikta tah se vëhvaꞌ non a sioniire.
17 Suk ataeah,
a Soneꞌ Sipsip to ihoꞌ topnin rakah e non pa ö ihoꞌ pa teꞌ Sunön,
eꞌ se matop non raoe,
pareꞌ me raoe pa ö no a rën va po toꞌtoꞌ to teꞌ non.
Ke Sosoenën se kon a ma punis pee vamanih peꞌ to hiuk vaꞌnaꞌ a ma hunun matëëre,
kee hikta se ook hah ne.”