15
Mɓa̱la̱ n cindere mu ukosu
1 A̱vu me enishe a̱ba̱jini e iroci ɗe zuva a na a zuwai ama suru o oꞌwoi a asalama. Nlingata ma̱ A̱sula̱ n cindere m ɓa̱na̱ ta̱ mɓa̱la̱ n cindere mu ukosu. Na̱ A̱sula̱ o koto a casu ama oforo na̱ mɓa̱la̱ n ndolo, wa̱a̱ da̱shi yuwan upan waru shi.
2 Reve me ene ili i na i rotsoi mala ma̱ ma̱dubi ma na a̱ ja̱mba̱ra̱i na akina. A̱vu waru me enishe aza a na a lyuwai aci a̱ a̱a̱dodo na̱ a̱a̱ma̱li a̱ yi, a̱yi ɗa a̱a̱dodo za na a ɗanai aala a̱ yi na̱ laamba. A̱ da̱na̱ ta̱ mishin zuzu na̱ mala ma̱ ma̱dubi, waru a̱ guza̱ ta̱ ikumburu i na A̱sula̱ a ca nle.
3 Reve a cana ishipa i na Musa† aagbashi a̱ A̱sula̱ a canai a̱vu waru a cana ishipa i na Ma̱giriꞌi ma canai, adansa,
“A̱vu ɗa A̱sulazuva Mogono me Ili Suru,
vu ta yuwusan a̱ba̱jini a̱ba̱jini e ili ya asalama.
Vu ta yuwusan tsugono tsu uvaɗi u nda suru.
A̱tsuma̱ e ili i na vaa yuwusan suru amayun a ɗa oɓolo nu ulobonu.
4 Vuma suru ta ca wu tsugbain, A̱sulazuva!
Ama suru a ta damma, ‘Vu ta̱ na̱ tsugbain nu ucira.
Babu vuma na ri na akiza, she a̱vu goon.
Ama o uvaɗi suru a̱ ta̱ ta̱wa̱ a yuwaan wu a̱ga̱nda̱.
Ama ene ta̱ mejege me ili i na vu yuwain suru.’ ”
5-6 A̱vu me ene ɗe zuva, nlingata ma̱ A̱sula̱ n cindere aza a na a̱ ɓa̱na̱i mɓa̱la̱ n cindere o uta̱ pe a̱tsuma̱ o Upasu wa Akiza† a̱ A̱a̱ꞌisamapaɗa. Za suru oto ta̱ itana i uri i na i da̱na̱i a madala, a̱ ka̱nda̱ꞌwa̱ ta̱ amuna a na a ɗavai na̱ zinariya a̱ nka̱ka̱n n le.
7 A̱tsuma̱ e ili i wuma i na̱shi i ndolo za ta̱ ca ta̱ malingata ma̱ A̱sula̱ biti aakwanu a zinariya tapu na̱ a̱tsuma̱lima̱ a̱ A̱sula̱, za na ri na̱ wuma u babu ukotu, a̱ tsun a̱tsuma̱ o uvaɗi.
8 A̱vu Upasu wa Akizaꞌa u shiwan na̱ mikyon n na moo utusa̱ diga ɗe uba̱ta̱ u tsugbain tsa̱ A̱sula̱ nu ucira wa̱ yi. Babu vuma na aa gura uwa pe a̱tsuma̱ a̱ A̱a̱ꞌisamapaɗa o ndolo she na̱ mɓa̱la̱ n cindere n na nlingata n cindere n ndolo n ta̱wa̱yi n koto.