15
Ǝnǝfilal n angalosan win ǝssâ d agarăw
1 Tǝzzar ǝnaya daɣ jǝnnawan alɣalamat iyyat zǝwwǝrat, tǝknât ǝsǝmmǝklǝl, tǝmosat: Ǝssa angalosan ǝttafnen ǝssa alwabatan win ǝlkamnen s ǝntanay a daɣ d-inda alham ǝn Mǝššina.
2 Ǝnayaɣ arat olân d agaraw igân daɣ arat a d-isaktin tǝlfǝnjart tǝrtâyat ǝd tǝmsay, amaran ǝbdâdan fall-as win ǝrzanen ǝmudar sǝksǝdan ǝd šaššelan-net ǝd meḍan wa iddewan d esǝm-net, ǝtâfan šihǝrdănen a tan-ikfa Mǝššina.
3 Ǝssiggadan daɣ tǝmmal n ǝkli ǝn Mǝššina, a t-imosan Musa ǝd tǝmmal ta n Ǝjemar, gannin:
«Igitan-nak zawwarnen, simaklalan, ya Ǝmǝli Mǝššina!
Kay a imosan mǝššis ǝn tarna kul!
Tarrayen-nak ǝntanatay a oɣadnen, ǝmosnat tidǝt,
ya Ǝmǝnokal ǝn tǝmattiwen.
4 Ma imos wa ewadan a kay wǝr iksud ya Ǝmǝli?
Ma imos wa wǝr za nǝssǝɣmǝr esǝm-nak?
Fǝlas kay ɣas a imosan ǝmizdag.
Amaran tawšeten kul a d-asinat, ǝɣbadnat-kay,
fǝlas igitan-nak oɣâdnen a nafalalnen.»
Šikǝrwasen šin ǝssâyat n alham ǝn Mǝššina
5 Dǝffǝr aratan win den, ǝswadaɣ oggeɣ edag wa zǝddigan n ahaket wa n ǝmǝnǝy as innolam daɣ jǝnnawan.
6 Tǝzzar ǝgmadan-du angalosan win ǝssa edag wa zǝddigan ǝttâfan alwabatan win ǝssa, ǝlân tabdoq ǝn lin iqqitasan isiraqqen, otâban idmaran-nasan ǝs sutab n urǝɣ.
7 Inkar iyyan daɣ mudaran win ǝkkoz, ikfa angalosan win ǝssa ǝssayat tǝkǝrwasen n urǝɣ ǝdkârnen alham ǝn Mǝššina di iddaran har faw!
8 Idkar adag wa zǝddigan ǝhu a d-ifalan tanaya ǝn Mǝššina ǝd tarna-net. Wǝr t-illa i ifragan iguz n adag wa zǝddigan en, iket wǝr ǝnden ǝssa alwabatan win d-ewayan angalosan win ǝssâ.