15
ⵜⵀⴹⵢ ⵏ ⵗⵢⵙⴰ ⴹⵜ ⵏⵈⴾⵎ ⵀⵍⵜⵙ
1 ⵙ ⴼⵓ ⵗⵔⴰ ⵎⵏⵢⵏ ⵎⵤⵔⵏ ⵏ ⵍⵎⵎⵏ ⴹⵎⵤⵔⵏ ⵏ ⴾⵍⵍⵢⵂⴹ ⴹ ⵎⵙⵏⵏ ⵏⵜⵓⵔⵜ ⵍⵎⵗⵏⴰ ⵙⴶⵓⵔ ⵓⴰ ⵤⵓⵔⵏ ⴾⵜⵏⵜ ⵙⵙⴾⵔⴹⵏ ⵗⵢⵙⴰ ⵓⵢⵏ⵿ⵜⵓ ⴶⵏ⵿ⵜⵓ ⴹⵗ ⴼⵙⵏ ⵏⵏⵈⴾⵎ ⵀⵍⵜⵙ⵰
2 ⵙⵙ⵿ⵜⵏ⵿ⵜⵓ ⵀⵍⵜⵙ ⵏⵙ «ⵓⴾ ⴾⵢ ⴹⵗ ⵎⵙⵏ ⵎⵏⴾⵍ ⵏ ⴾⵍⵍⵢⵂⴹ⵰» ⵏⵙ ⵗⵢⵙⴰ «ⴾⵢ ⵎⵏⴾ ⵙ ⵜⵏⵗ ⴹⵢ⵰»
3 ⴹ ⵙⵓⵔⵏ ⵎⵤⵔⵏ ⵏ ⵍⵎⵎⵏ ⵗⵢⵙⴰ ⵔⴾ ⴶⵜⵏ ⴶⵜⵏⵏ⵰
4 ⵍⵙ⵿ⵜⵓ ⵀⵍⵜⵙ ⵙⵙ⵿ⵜⵏ ⵏⵙ «ⵜⵙⵍⴰ ⵢⵔⵜⵏ ⴾⵍ ⵓⵏ ⴾⵢⵙⵓⵔⵏ ⴹⴰ⵰ ⴾⵢ ⵎⴰ ⵜⵏⵗ⵰»
5 ⵆⵎ ⵗⵢⵙⴰ ⵓⵔ ⴹⵙⵍⵙ ⵜⵏⴰ ⵏⵔⵜ⵰ ⵙⵎⴾⵍⵍ ⵓⵏ ⵙ ⵀⵍⵜⵙ⵰
6 ⴹ ⴹⵗⵍⵢ ⵎⴹ ⵓⵏ ⴾⵢ ⴹⴾⵙ ⵏⵈⴾⵎ ⵀⵍⵜⵙ ⵎⵙⴾⵙⵓ ⵓⵙ ⵜⵔⴰ ⵜⵎⵜⵢ ⴶⵎⴹ⵰
7 ⵙ ⵜⴶⵓ ⵓⵏ ⵍⵢ ⵍⵙ ⴶⵏ ⵙⵎ ⵀⵔⵗⵀⵙ ⵂⵏ ⴾⵙⵓ ⵏ⵿ⵜⴰ ⴹ ⵏⴼⵍⴶ ⵓⵢⴹ ⵙ ⴾⵍⴰ ⵌⵏⵌⵔⵓⵢⵏ ⵜⵎⵜⵢ ⵂⵔ ⴶⵏ ⵎⵏ ⵏⵓⴹⵏ ⴹⵗ ⵓⵏ⵰
8 ⵜⵏ⵿ⴾⵔ ⵜⵎⵜⵢ ⴹ ⵜⴶⵎⵢ ⴹⵗ ⵀⵍⵜⵙ ⴹⵙⴶⵓ ⵜⵏⴼⵙ⵿ⵜ ⵜⴰ ⵗⵔⵙ ⵜⵍⵎⴹ⵰
9 ⵏⵙⵏ ⵀⵍⵜⵙ «ⵓⴾ ⵜⵔⴰ ⵜⴶⵎ ⴹⵓⵏⴾⵙⵗ ⵎⵏⴾⵍ ⵏ ⴾⵍⵍⵢⵂⴹ ⴹⵗ ⴼⵙⵏ⵰»
10 ⵏ⵿ⵜⴰ ⵀⵍⵜⵙ ⵙⵏ ⵙ ⵛⴹⵜ ⵏⵎⵏ⵿ⵤⵗ ⵏ ⵎⵤⵔⵏ ⵏ ⵍⵎⵎⵏ ⵗⵢⵙⴰ ⴼⵍ ⵜⴶⵏ ⴹⵗ ⴼⵙⵏ⵰
11 ⵎⵛⵏ ⴶⵏ⵿ⴹⵓ ⵎⵤⵔⵏ ⵏ ⵍⵎⵎⵏ ⴹⵗ ⵜⵎⵜⵢ ⴹ ⵜⴹⴶⵤ ⵀⵍⵜⵙ ⵢⴹⵙⴹⴾⵙ ⵀⵔⵗⵀⵙ ⵓⵔⴶⵗ ⵗⵢⵙⴰ⵰
12 ⵍⵙ ⵀⵍⵜⵙ ⵓⵍ ⵏⵙⵏ «ⴹⵗ ⴹⵢ ⵎⵙ ⵜⵔⵎ ⴹ ⵜⴶⴰ ⵢⵍⵙ ⵓⵙ ⵜⴶⵏⵎ ⴹⴰ ⵎⵏⴾⵍ ⵏ ⴾⵍⵍⵢⵂⴹ⵰»
13 ⵍⵙⵏ ⴹⴾⵍ ⵏⵎⵙⵍⵏⵙⵏ ⴹ ⴶⵏⵏ «ⵜⵢⵜⵢⵜⵓ ⴼⵍ ⵜⴶⵜⵓⵜ ⵜⵀⴰ⵰»
14 ⵏⵙⵏ ⵀⵍⵜⵙ «ⵎⴼⵍ ⵤⴰ⵰ ⵎⴰ ⵗⵛⴹ⵰» ⵎⵛⵏ ⵙⵂⴾⵏ ⵓⵍⵏ ⵎⵙⵍⵏⵙⵏ ⴹ ⴶⵏⵏ «ⵜⵢⵜⵢⵜⵓ ⴼⵍ ⵜⴶⵜⵓⵜ⵰»
15 ⵙⴼ ⵀⵍⵜⵙ ⵍⴾⵎ ⵢⵓⴰ ⵜⵔⴰ ⵜⵎⵜⵢ⵰ ⴾⵙⵙⵏ⵿ⴹⵓ ⵀⵔⵗⵀⵙ ⴹⵗ ⴾⵙⵓ ⵗⵢⵙⴰ ⵎⵔⵏ ⵙⵙⴶⵙ ⵜⵏⵗⵢ ⵍⵀⵙⵜ ⵙⵍⴾⴹ ⴹⴼⵔ ⴹⵢ ⵎⵔⵏ ⵈⴾⵎⵙ ⵜⵓⵜⵢⵜⵢ ⴼⵍ ⵜⴶⵜⵓⵜ⵰
ⵜⵎⴾⴾⵢⵜ ⵏ⵿ⵙⵌⵜⵏ ⴹⵗ ⵗⵢⵙⴰ
16 ⵓⵢⵏ ⵙⵌⵜⵏ ⵗⵢⵙⴰ ⵙⵎⵙ ⵏⵗⵔⵗⵔ ⵏⵗⵍⴰ ⵏⵂⵏ ⵓⵏ ⵛⵔⵗⴰ⵰ ⵗⵔⵏ⵿ⴹⵓ ⵙⵌⵜⵏ ⴾⵍ ⵓⵏ ⵂⴹⵜⵏⵏ⵰
17 ⵙⵍⵙⵏ⵿ⵜⵓ ⵀⵔⵏⵤ ⵤⴶⵗⵏ ⵓⴰ ⵍⵙⵏ ⵎⵏⴾⵍⵏ ⵙⵓⵔⵏⵙ ⴹⵗ ⵍⵎⵜ ⵏ ⵜⴾⵀⵜ ⵤⵏ ⵜⵏ ⵎⵏⴾⵍⵏ ⵜⴶⵜ ⴹⵗ ⵛⵏⵏⵏ⵰ ⵎⵙ ⵓⵏ ⴶⵢ ⴹⵗⵙ ⵜⵎⴾⴾⵢⵜ⵰
18 ⵜⵙⵙⵍⵎⵏ ⴶⵏⵏⵙ «ⵢⴾ ⵎⵏⴾⵍ ⵏ ⴾⵍⵍⵢⵂⴹ⵰»
19 ⴹ ⴶⵜⵏ ⵗⴼⵏⵜ ⵙⴶⵀⵍ ⵏ⵿ⵜⵍⵏ⵿ⵜ ⵙⵜⴼⵏ ⴼⵍⵙ ⵜⴶⵔⴼⵏ ⵙⵌⴹⵏⵙ⵰
20 ⵙ ⴹⵗⵙ ⵗⵔⴹⵏ ⴶⵢ ⵏ ⵜⵎⴾⴾⵢⵜ ⵜⵔ⵿ⵜⵢⵜ ⴹⵜⵙⵙⵍⴾⴰ ⴾⵙⵏ ⴼⵍⵙ ⵀⵔⵏⵤ ⵤⴶⵗⵏ ⵓⴰ ⵜⵙⵍⵙⵏ ⵙⵗⵍⵏ⵿ⵜⵓ ⵙⵍⵙⴰ ⵓⵏ⵿ⴹⵏⵜ ⴶⵍⵏ ⴹⵔⵙ ⴶⵎⴹⵏ ⴹⵔⵙ ⵗⵔⵎ ⵢⴹ ⵜⵜⵢⵜⵢⵏ ⴼⵍ ⵜⴶⵜⵓⵜ⵰
ⵜⵓⵜⵢⵜⵢ ⵏ ⵗⵢⵙⴰ ⴼⵍ ⵜⴶⵜⵓⵜ
21 ⵎⵏⵢⵏ ⵙⵌⵜⵏ ⴹ ⵙⵎⵗⵏ ⵓⵏ ⵗⵔⵎ ⵏ ⵆⵔⵓⵏ ⵓⴰ ⵔⵓⵏ ⵍⵙⴾⵏ⵿ⴹⵔ ⴹ ⵔⴼⵙ ⴼⵍⴹⵓ ⵛⵓⴶⵙ⵰ ⵛⵂⵛⵍⵏ⵿ⵜⵓ ⴶⵢ ⵏ ⵜⴶⵜⵓⵜ ⵜⴰ ⴼⵍ ⵤⵜⵓⵜⵢⵜⵢ ⵗⵢⵙⴰ⵰
22 ⵓⵢⵏ ⵗⵢⵙⴰ ⵙⴹⴶ ⵙ ⵜⵓⵏⵓ ⴶⵍⴶⵜⴰ ⵍⵎⵗⵏⴰ ⵏⵓⵏ «ⴹⴶ ⵓⵏ ⵜⴾⵢⴰ⵰»
23 ⴾⴼⵏ⵿ⵜⵓ ⵙⵎⴹ ⵏⵤⵀⵀ ⵔ⵿ⵜⵢⵏ ⴹⵎⴶⵍ ⵎⵙⵏ ⵤⵏⴼ ⵏ⵿ⵜⵗⵍⵀⵙ⵿ⵜ ⴼⵏⵤⵏ ⵜⵍⵓⵢⵜ ⵎⵛⵏ ⴶⵢ ⵗⵢⵙⴰ ⵙ ⵜⵙⵢⵏⵙⵏ⵰
24 ⵜⵤⵔ ⵜⵢⵜⵢⵏ⵿ⵜⵓ ⵙⵌⵜⵏ ⴼⵍ ⵜⴶⵜⵓⵜ ⵤⵏⵏ ⵙⵍⵙⵏⵜ ⵙ ⵜⵛⵗⵔⵏ⵰
25 ⴹⴶⵍⵛⵜ ⵙ ⵜⵜⵢⵜⵢⵏ ⴼⵍ ⵜⴶⵜⵓⵜ⵰
26 ⵜⵢⵜⵢⵏ ⴹⵏⴶⵙ ⵙⵍⵎ ⴼⵍ ⴾⵜⵀ ⴹⵍⵍ ⵓⴰ ⵙⵔⵙ ⴹⵓⵢⵏ ⵜⵎⵜⵏ⵿ⵜ⵰ ⵙⵍⵎ ⵏ ⴾⵜⵀ ⴼⵍⵙ ⵙ «ⵓⴰ ⵎⵏⴾⵍ ⵏ⵿ⴾⵍⵍⵢⵂⴹ⵰»
27 ⵌⵢⵜ ⵗⵢⵙⴰ ⴹⵛⵏ ⵌⵌⵀ ⵏⵀⵢⴹⴶⵏ ⵜⵓⵜⵢⵜⵢ⵰ ⵢⵏ ⵜⵓⵜⵢⵜⵢ ⴹⵗ ⵗⵍ ⵏ ⵗⵢⵙⴰ ⵓⴰ ⵂⴹⵏ ⵜⵓⵜⵢⵜⵢ ⴹⵗ ⵤⵍⴶⵜⵏⵜ⵰
28 ⵎⴾⵏ ⴹⴰ ⵙ ⵜⵏ⵿ⴹⴰ ⵀⵜⵓ ⵜⴰ ⵜⵏⵜ ⴹⵗ ⵍⴾⵜⵀⵏ «ⴹ ⴹⵏ ⴹⵗ ⵎⴶⵏ ⵏ ⵜⴾⵎⴰ⵰»
29 ⴹⵙ⵿ⵜⴶⵏ ⵢⵜⴹⵏ ⵓⵏ ⴹⵜⴾⵢⵏⵏ ⴹⵏ ⵔⴾ ⵀⵜⵜⵏ ⵙⵓⵍⵓⵍⵏ ⵗⴼⵓⵏⵙⵏ ⴶⵏⵏⵙ «ⴹⵓ⵰ ⴾⵢ ⵓⴰ ⵏⵏ ⴹ ⵜⵌⵀⵔⵌⵗ ⵂⵏ ⵓⴰ ⵤⵓⵔⵏ ⵏⵍⵗⵀⴹⴰ ⵜⵍⵙⵆⵓ ⴾⵔⵙ ⴹⵗ ⴾⵔⴹ ⴹⵏ
30 ⵎⵔⴹⴰ ⵙⴼⵙⵓ ⵎⵏⴾ ⵜⵤⵀⵗⴹⵓ ⵜⴶⵜⵓⵜ ⴹⵢ⵰»
31 ⵎⴾⵏ ⴹⵗ ⵙ ⵎⵤⵔⵏ ⵏ ⵍⵎⵎⵏ ⴹ ⵎⵙⵏⵏ ⵏⵜⵓⵔⵜ ⴹⴰ ⴶⵏ ⴹⵗⵙ ⵜⵎⴾⴾⵢⵜ ⵜⵏⵎⵏⵏ ⴶⵔⵙⵏ «ⵏ⵿ⵜⴰ ⵓⴰ ⵙⴼⵙⵏ ⵢⵜⴹⵏ ⵓⵔ ⴼⵔⴶ ⵙⴼⵙⵢ ⵏ ⵎⵏⵜ⵰
32 ⴾⴹ ⵏ⵿ⵜⴰ ⵍⵎⵙⵈ ⵎⵙ ⵓⵏ ⵎⵏⴾⵍ ⵏⵙⵔⵢⵍ ⵤⵀⵜⵜⴹⵓ ⵜⴶⵜⵓⵜ ⵎⵔⴹⴰ ⴹ ⵏⵏⵢ ⴹⵢ ⵏⵤⴶⵤⵏ ⵙⵔⵙ⵰» ⵎⴹⵏ ⵓⵏ ⴹⵔ ⵌⵢⵜ ⵗⵢⵙⴰ ⵜⵓⵜⵢⵜⵢ ⵏ⵿ⵜⵏⵢ ⴹⴰ ⵂⵏ ⵛⵏⵜ⵰
ⴶⵎⴹ ⵏ ⵎⵏ ⵗⵢⵙⴰ
33 ⵙ ⴶⴰ ⵎⵙⵏⵤⵍ ⵍⵙⵏⵜ ⵛⵢⵢ ⴾⵍ ⴾⵜⵏⵜ ⵂⵔ ⵜⴶⴰ ⵜⵤⵔ⵰
34 ⵙ ⵜⴶⴰ ⵜⵤⵔ ⴹⴾⵍ ⵗⵢⵙⴰ ⵎⵙⵍⵏⵜ ⵏⴰ
«ⵍⵢ ⵍⵢ ⵍⵎⴰ ⵙⵀⵈⵜⵏⵢ⵰»
ⵍⵎⵗⵏⴰ ⵏⴹⵢ «ⵢⴰ ⵎⵍⵏ
ⵢⴰ ⵎⵍⵏⵏ ⵎⴼⵍ ⵜⵢⵗⵢ ⴹ ⵎⵏⵏ⵰»
35 ⵙⵍⵏⵙ ⵔⵜ ⴹⵗ ⵢⵜⴹⵏ ⵓⵏ ⵀⴹⴹⵏⵏ ⴹⵏ ⴹ ⴶⵏⵏ «ⵙⵙⵎⵜ⵰ ⵗⵔⵓ ⵏⵀⵢ ⵍⵢⵙ⵰»
36 ⵤⵍⵏ ⵙⵔⵙ ⵓⴹⵏ ⵢⵏ ⵙⵍⵎⵗⴹⵓ ⵜⴹⴼ⵿ⵜ ⴹⵗ ⵀⵏⴶⵔ ⵜⵍ⵿ⵜⵜ ⴹⵎⵢ ⵏⴶⵀⵍ ⵤⵍⵙ⵿ⵜⵜⵏ ⵢⵜⵜⵛⵓ ⴶⵏⵓ «ⵙⵍⵏⵜ ⴹ ⵏⵙⵏ ⵜⴹⵙⵓ ⵏⵀⵢ ⵍⵢⵙ ⴾⵙ⵿ⵜⴹⵓ ⴼⵍ ⵜⴶⵜⵓⵜ ⵜ»
37 ⵎⵤⵢ ⵓⵏ ⴹⴰ ⴹ ⴾⵙ ⵗⵢⵙⴰ ⵎⵙⵍⵢ ⵙⵂⵏ ⵎⵔⵏ ⴶⵎⴹⵏ⵿ⵜⵓ ⵎⵏ⵰
38 ⵙⵗⵜ ⵜⵏ ⴹⴰ ⴹ ⵤⵔⵜ ⴼⵔ ⵓⴰ ⵤⵓⵔⵏ ⵎⵙⵏ ⵏⵗⵔ ⴶⵔ ⴹⴶ ⵓⴰ ⵤⴹⴶⵏ ⴹ ⵓⴰ ⴶⵔⵏ ⵜⵤⴹⴾ ⴹⵗ ⵂⵏ ⵓⴰ ⵤⵓⵔⵏ ⵏⵍⵗⵀⴹⴰ⵰ ⵙⵔⵜⴹⵓ ⵏⵗⵔ ⵓⵏ ⵗⵔ ⴼⵍⴰ ⵂⵔ ⵔⵙ⵰
39 ⵙ ⵏⵢ ⴾⵀⵜⵏ ⵏ⵿ⵙⵌⵜⵏ ⵏ⵿ⴾⵍⵔⵎ ⵀⴹⴹⵏ ⴹⵏ ⵎⴾ ⵓⵙ ⴶⵎⴹⵏ ⵎⵏ ⵗⵢⵙⴰ ⵏⴰ «ⵍⴾⵏ ⵙ ⵍⵙ ⵓⴰ ⵀⵔⵔ ⵏ ⵎⵛⵏⴰ⵰»
40 ⵀⴹⴹⵏⵜ ⴹⵗ ⵜⴹⴹⵏ ⵛⵢⴹ ⵙⴹⵢ ⵙⵓⴹⵏⵜ ⴹⵗ ⵓⴰ ⴶⵏ ⴹⵏ⵰ ⵛⴹⴹⵏⵏ ⵜⵂⵏⵜ ⵎⵔⵢⵎⴰ ⵎⴹⵍ ⴹ ⵎⵔⵢⵎⴰ ⵜⴰ ⵜⵔⵓⵜ ⵢⵆⵀ ⵓⴰ ⵏ⵿ⴹⵔⵏ ⴹ ⵢⵙⵙ ⴹⵢⵜ ⵜⴶⵜ ⵙⵎ ⵙⵍⵎⴰ⵰
41 ⵂⵔⵓⴰ ⵂⴰ ⵗⵢⵙⴰ ⴾⵍ ⵓⵏ ⴶⵍⵍⵢⴰ ⵙ ⴹⵙⵍⴾⵎⵏⵜ ⴹⵂⵍⵏⵜⵓ ⵙⵓⴰ ⴼⵔⴶⵏⵜ⵰ ⵀⴹⴹⵏⵜ ⴹⵗ ⵜⴹⴹⵏ ⵛⵢⴹ ⴹⵏ ⴶⵜⵏⵏ ⴹⴹⵓⵏⵏ ⴹ ⵗⵢⵙⴰ ⵙ ⵢⵔⵙⵍⵎ⵰
ⵜⵓⴶⴰ ⵏ⵿ⵜⵗⵙⴰ ⵏ ⵗⵢⵙⴰ ⴹⵗ ⵤⴾⴰ
42 ⵙ ⵜⴾⵢ ⵜⴾⵙ⵿ⵜ ⵏⵤⵍ ⵓⵏ ⵍⴶⵎⵜ ⵙⵎⵜⴶⵏ ⵢⵜⴹⵏ ⵢⵤⵍ ⵓⵏ ⵜⵙⵏ⵿ⴼⵓⵜ⵰
43 ⴾⴰ ⵢⵙⴼ ⵓⵏ ⵗⵔⵎ ⵏⵔⵎⵜⵢ ⵂⵏ ⵏ ⵀⵍⵜⵙ⵰ ⵢⵙⴼ ⵍⵙ ⵎⵙ ⵜⵓⵙⵗⵎⵔⵏ ⵂⵏ ⵙⴶⵓⵔ ⵓⴰ ⵤⵓⵔⵏ ⵎⵙ ⴹⵗ ⵓⴹⵏ ⴶⵏ ⵜⵎⴰ ⴹⵗ ⵙⴰ ⵏ ⵜⵗⵎⵔ ⵜⵏ ⵎⵛⵏⴰ⵰ ⵏ⵿ⵜⴰ ⴶⵏ ⵎⵤⵍ ⵏ ⵜⵂⵍⵜ ⵎⵙⵏ ⵙ ⴾⴰ ⵀⵍⵜⵙ ⴶⵎⵢ ⴹⵗⵙ ⵜⵗⵙⴰ ⵏ ⵗⵢⵙⴰ⵰
44 ⵙⵎⴾⵍⵍ ⵙ ⵀⵍⵜⵙ ⵜⵔⵀ ⵏⴶⵎⴹ ⵓⴰ ⴶⵏ ⵎⵏ ⵗⵢⵙⴰ⵰ ⵙⵙⵗⵔⴹⵓ ⴾⵀⵜⵏ ⵓⵏⴹ ⵙⵙ⵿ⵜⵏ⵿ⵜⵓ ⴾⴹ ⵜⴹⴰ ⵀⴰ ⵏ ⵗⵢⵙⴰ ⵓⵍⴰ⵰
45 ⵙ ⴹⵙⴶⴰ ⴾⵀⵜⵏ ⵓⴰ ⵙⵍⵏ ⵏⵀⴰ ⵏ ⵗⵢⵙⴰ ⴾⴼⴰ ⵀⵍⵜⵙ ⵢⵙⴼ ⵜⵔⴶⵜ ⵏⴹ ⴹⴾⵍ ⵜⵗⵙⴰ ⵏ⵿ⵗⵢⵙⴰ⵰
46 ⵤⵏ⵿ⵤⴹⵓ ⵢⵙⴼ ⵛⴼⵜ ⵜⴰ ⵜⵂⵙⵢⵜ ⴾⵙⴹⵓ ⵗⵢⵙⴰ ⴼⵍ ⵜⴶⵜⵓⵜ ⴶⵢ ⴹⵗⵙ ⵜⵤⵔ ⴶⵢ ⴹⵗ ⵤⴾⴰ ⵎⵙⵏ ⴾⵤⵎ ⵙⵗⵔⵔⴹⵓ ⵜⵂⵏ⵿ⵜ ⵤⵓⵔⵜ ⵂⵔ ⵙⵔⵙ ⵎⵏⵜ⵰
47 ⵜⵍⴰ ⵎⵔⵢⵎⴰ ⵎⴹⵍ ⴹⵏ ⴹ ⵎⵔⵢⵎⴰ ⵜⴰ ⵜⵔⵓⵜ ⵢⵙⵙ ⵙⵓⴹⵏⵜ ⴹⵗ ⴹⴶ ⵓⴰ ⴹⵗ ⵜⵜⵓⴶⴰ ⵜⵗⵙⴰ ⵏ⵿ⵗⵢⵙⴰ ⴹⵏ⵰