Muqeddes Kalam (latin yéziq) Küylerning küyi 7

Sulayman Shulamitqa söz qilidu •••• Shulamit Sulayman üchün «ikki bargah» ussulini oynaydu

1 «I shahzadining qizi,

Keshliringde séning qedemliring némidégen güzel!

Tolghighan yampashliring göherlerdek,

Chéwer hünerwen qolining hüniridur.□

2 Kindiking yumulaq bir qedehtur;

Uning ebjesh sharabi kem emes;

Qorsiqing bughday döwisidur,

Etrapigha niluperler olishidu.□

3 Ikki köksüng ikki maraldek, jerenning qoshkézikidur;

4 Boynung pil chishliridin yasalghan munardur;

Közliring Bat-Rabbim qowuqi boyidiki Heshbon kölchekliridek,

Burnung Demeshqqe qaraydighan Liwan munaridektur;

5 Üstüngde béshing Karmel téghidek turidu;

Béshingdiki örüme chachliring sösün rengliktur,

Padishah büdür chachliringning mehbusidur.□

6 I söyginim, huzurlar üchün shunche güzel, shunche yéqimliqtursen!

7 Séning boyung palma derixidek,

Köksüng üzüm ghunchiliridektur.□

8 Men: — «Palma derixi üstige chiqimen,

Shaxlirini tutup yamishimen;

Köksiliring derweqe üzüm tal ghunchiliridek,

Burnungning puriqi almilardek, tanglayliringning temi eng ésil sharabdektur...».□

Shulamit söz qilip, Sulaymanning gépini dawamlashturidu

«...méning söyümlükümning gélidin siliq ötüp,

Lewler, chishlardin téyilip chüshsun...!□

10 Men méning söyümlükümningkidurmen,

Uning teqazzasi manga qaritilidu».□

On birinchi oylinish — Shulamitning öz yurtini yoqlashqa bolghan arzusi •••• {7:11-8:4} •••• Shulamit söz qilidu

11 «I söyümlüküm, kéleyli,

Étizlargha chiqayli;

Yézilarda tünep kéleyli,□

12 Üzümzarliqqa chiqishqa baldur orundin turayli,

Üzüm tallirining bixlighan-bixlimighanliqini,

Chécheklerning échilghan-échilmighanliqini,

Anarlarning berq urghan-urmighanliqini köreyli;

Ashu yerde muhebbetlirimni sanga béghishlaymen.

13 Muhebbetgüller ashu yerde öz puriqini puritidu;

Ishiklirimiz üstide herxil ésil méwe-chiwiler bardur,

Yéngi hem konimu bardur;

Sen üchün ularni toplap teyyarlidim, i söyümlüküm!»□

□ 7:1 «Keshliringde séning qedemliring némidégen güzel!» — yaki «keshliringde séning putliring némidégen güzel!». □ 7:2 «Kindiking yumulaq bir qedehtur» — bezi alimlar «kindiking» dégen söz jinsiy yolini, yaki tenning töwen qismini körsitidu, dep qaraydu. Undaq bolsa Shulamit Sulayman aldida yalingach bolup ussul oynaydu. «...uning ebjesh sharabi kem emes;..» — «ebjesh sharab» Pelestinde ademni eng mest qilidighan sharab hésablinatti. □ 7:5 «Padishah büdür chachliringning mehbusidur» — ulugh Sulayman padishah yézidiki bir qizgha «esir boldi»! Muhebbetning küchi zordur! □ 7:7 «Séning boyung palma derixidek, köksüng üzüm ghunchiliridektur» — «palma derixi»ning özi ünümlük, hosulluq derex hésablinidu. Shulamit égiz boyluq we zilwa, «hosulluq» dep qaralghan oxshaydu. □ 7:8 «Palma derixi üstige chiqimen, shaxlirini tutup yamishimen; köksiliring derweqe üzüm tal ghunchiliridek...» — palma derixining xormilirini üzüsh yaki güllirini changlashtürüp méwilik qilish üchün uninggha yamiship chiqishi kérek. Sulayman bu oxshitishta belkim ikkila menisini köchme menide ishlitidu. Hazir Shulamit bilen jinsiy munasiwet ötküzüshke bashlaydu. «...burnungning puriqi almilardek, tanglayliringning temi eng ésil sharabdektur...» — «almilar» dégenning bashqa birxil terjimisi «örükler». □ 7:9 «...méning söyümlükümning gélidin siliq ötüp, lewler, chishlardin téyilip chüshsun...!» — ibraniy tilida chüshinish bek tes, bashqa köp terjimiliri uchrishi mumkin. Lékin omumiy menisi éniqki, Shulamit Sulaymanning «muhebbetlisheyli» dégen telipige inkas qayturup, toluq qobul qilidu. □ 7:10 «(1-10-ayet) sherhi» — 9-10-ayette Shulamit Sulaymanning «muhebbetlisheyli» dégen telipige inkas qayturup, toluq qobul qilidu. □ 7:11 «I söyümlüküm, kéleyli, étizlargha chiqayli; yézilarda tünep kéleyli,...» — Shulamitning öz yurtini yene körgüsi, shu yerde Sulayman bilen dalada muhebbetleshküsi bar idi. 12-13-ayetnimu körüng. □ 7:13 «Muhebbetgüller ashu yerde öz puriqini puritidu» — «muhbbetgül» dégen gül jinsiy muhebbetni qozghaydighan birxil gül. «ishiklirimiz üstide herxil ésil méwe-chiwiler bardur, ...sen üchün ularni toplap teyyarlidim, i söyümlüküm!» — Qanaanda (Pelestinde) xelqler «ishik üsti»diki bir jaza üstide herxil méwe-chéwilerni saqlaydu.