26
1 Iesu eseamulu abara mer uridili, E uiabi detager tabara kaimeg giz,
2 Uaba umele, eseamud neis gereger abele paseka ikeli, a Le la Uerem namarid ko satauroem.
3 Abele kerker etami gaire zogozogo le giz, pako aotale giz, pako aule giz abgedlam abele zogo le ra meta ge, abara nei Kaiafa;
4 A uiaba mer atager nalu lu umele mirem erpei, pako ipitare eumilu Iesu.
5 A uiaba kega, Nole ikeli abele uetpur, iaueakai abele ged ataperetlam.
6 Iesu emri Bethania, Simona lepera ra meta,
7 Nerute kosker abim tabakeam nagri abele alabasa tarpor, muige abele ide debe lagelag au bodomalam, E epaitered abara kerem, a E eidi leuer aroem.
8 Abara kaimeg giz uiaba erdali, uiaba nerkepu au asiasi, a uiaba kega, Nalugelam abele lu dedkoli?
9 Abelelam, ese terapei abele ide debe lagelag, mena gaire lu bodomalam a ko nakuarare gaire lu kak le.
10 Iesu umele, E uiabi kega, Nalugem uaba bamsili abele kosker? abelelam E debe lu karim ikeli.
11 Abelelam uaba mena emri okakis gaire lu kak le, epe kakanali uabim nole niai emri.
12 Abelelam E epaitered abele ide debe lagelag kara gem kekiam, keubu kara etkobei.
13 Ageakar, kaka uabi detager, Gaire ged uridili abele geseb ge etomertare abele euangelia, a ko etomeret abele lu abele kosker ikele mena ko dikiapor abim.
14 Nerute le abele tuelf lelam, abara nei Iuda Isakariota, E bakeam gaire au zogozog le giz,
15 A uiabi kega, Nalu lu uaba kari ikuar, a kaka abi ikuar uabim? Ege uiaba abi ikuar mani thirti.
16 Abele gerger ge E ditimed mirem abim, na kaua umele ko abi erpei.
17 Abele kekiam gerger abele areto nole isi kak, abara kaimeg giz Iesuim tabakeuare, a abim kega, Nade uteb ma lagelag keriba derser ko paseka eroare?
18 Ege E uiabi detager, kega, Uaba bakeuare abele uteb, a nerute le uaba abi daratagerare, Abele Ereuer le mari detager, Kara mop maike; kaka ikeli abele paseka mara meta, kaka pako kara kaimeg giz.
19 Ege abara kaimeg giz ikerare mokakalam Iesu mer tigri, a ko derser abele paseka.
20 Kikem tabarki, E eidi leuer ero kemem tuelf le.
21 Uiaba eroare, E uiabi detager, Ageakar, kaka uabi detager, uabielam nerute le kari mirem.
22 A uiaba au asiasi, a uiaba ditimeda abim detagerare, Opole ae, nako kaka?
23 E uiabi etkalu, kega, Abele le kemem akameida abara tag, pako kara tag abele tanelu ge, E dali abele le kari mirem.
24 Le la Uerem bakeamulu, mokakalam detarer abim; epe abele le Le la Uerem abi mirem uaiai abele le! debele abele le nole aosmer kak.
25 Ege Iuda, le abi mirem, abi etkalu, kega, Rabi ae, nako kaka? E abi detager, Eko mama detager.
26 Uiaba eroare, Iesu ekao abele areto, a esoao, a itur; a uiabim nakuarare tabara kaimeg giz, kega, Tekao, aroem; kara gem ike.
27 E tanelu ekao, a esoao, a uiabim nakuarare, kega, A ui uridili areem;
28 Abelelam kara mam ike, abele mam kerkar gelar ko epaitered gaire le giz adem dikri le ra uite giz.
29 Kaka uabi detager, kega, Kaka nole aree kak abele uina turumlam, mena bakedida abele gerger kaka ko aree abele kerkar uaina uabi kemem kara Aba ra baselaia.
30 Uiaba emetu uedakiriare nerute ued, a uiaba Oliua paserem bakeamuda.
31 Ege Iesu uiabi detager, Uaba uridili ezigmada karielam abele ki ge; emetu detali, kega, Kai le mamoe asesered ipiti, epe mamoe giz kepu bamarid.
32 Ese kaka ko eded akaida, kaka kekiam bakeam Galilaiaem, a uaba keubu.
33 Epe Peteru abi detager, kega, Ese ui uridili marim ezigmada, kai nolea.
34 Iesu abi detager, kega, Ageakar kaka mari detager, kega, Abele ki ge, kimiar faul nole ereretikri kak, a neis netat ma kari nasared.
35 Peteru iako elele detager, kega, Ese kaka mari kemem naumilu, kaka nole mari asared kak. Uiaba uridili daratagered abkoreb.
36 Uiaba baosi kemem Iesu abele ged nei Gethesemane, E uiabi detager, tabara kaimeg giz, Uaba bamer ike, a kaka bakeam peike ko esorerapare.
37 E bakeuare kemem Peteru pako Zebedaio ra neis uerem, E au asiasi a ko okasosok.
38 E uiabi detager, Kara nerkepu au asiasi, bakedida abele eud; uaba ko bamer ike, pako kari kemem uti kak.
39 E kebikebi bakeam, a E etkobeilu, a esorerapare, kega, Kara Aba ae, ese umele, adem abele tanelu karielam; epe nole kara lag ikeli, mabara lag ikeli.
40 E ko akomed a erdali abara kaimeg giz uiaba uteid, E detager Peteruim, Nako, uaba nole saserim kari kemem uti kak abele netat haua ge?
41 Uaba uti kak a esorerapare, iaueakai uaba nole mirem barota; merkepu au lagelag, a gem gebegeb.
42 E iako bakeam, a esorerapare, kega, Kara Aba ae, ese nole umele adem abele tanelu karielam, mena kaka aree, mabara lag ikeli.
43 E iako akomeda a uiaba erdali ko uteid, abelelam uiaba pone au perper.
44 E uiabi dikaer, a ko bakeam esorerapare abele neis netat bakeam, E no netat mer detager.
45 E iako akomeda a erdali abara kaimeg giz, E uiabi kega, Uaba uteid, a nerbazi: dasmer, maike abele haua Le la Uerem ko abi mirem gaire uit le giz ra tag.
46 Bako, meriba bakeuare: dasmer, E maike abele le kari mirem.
47 Dasmer, E mer detaut, Iuda tabarki, nerute le tuelf lelam, E kemem gaire le lakub, pako zogozogo le giz, a aule giz abgedlam, uiaba nagri teibur aososo tulik pako gabgab.
48 Abele le abi mirem E uiabi etomeret nerute atamelam, kega, Abele le kaka abi eskos, E dali: uaba abi erpeirare.
49 E sobkak tabarki Iesuim, a abi kega, Rabi ae; a abi eskos.
50 Iesu abi detager, kega, Makanali, nalugem ma tabakeam? A uiaba tabakeuare a tag giz Iesui dog emarirare, a ko erpeirare.
51 Dasmer, nerute le Iesui dog E ekao tabara teibur aososo tulik iseda, E ipiti nerute zogozogo le giz ra memeg le abara laip ismilu.
52 Iesu abim detager, Mara teibur aososo tulik ko ikedi taba gedge; abelelam uiaba uridili ekao abele teibur aososo tulik, a ko eumilu abele teibur aososo tuliklam.
53 Nako ma dikiapor kaka nole umele damosi kara Aba ko namarkare karim gaire angela giz tumem gaire legiona tuelf?
54 Nako nole bakedida gaire iauali zogo, abkoreb bakedida abele gaire lu?
55 Peirdi abele haua kige, Iesu detager gaire le lakub, Nako uaba karim tabakeuare, gaire teibur aososo tulik, pako gabgab ko erpei mokakalam idikeda le ise? Meriba bamer abele zogo meta, kaka uabi ereuerem gaire gerger, a uaba nole kari erpei.
56 Gaire lu uridili ikerare, iaueakai bakedilu gaire perofeta giz uiaba iauali. Abara kaimeg giz abi dikaerti, a uiaba derar.
57 Uiaba Iesu erpeirare, a abi datkimuardare Kaiafaim zogo le, a gaire aotale giz le pako aule giz netate gedim.
58 Epe Peteru muriz ge abi irmili, zogo le ra meta tabarki, a balu a emri kemem gaire memeg le, E lagelag erdali abele mop.
59 Ege gaire zogo le giz pako aule giz pako gaire tarim le uridili uiaba deraimerare uader le bes ageakarem Iesuim, iaueakai uiaba abi ipitare eumilu:
60 Epe nole erdali; a ko tabakeuare gaire bes ageakarem, a nole ardar kak. Keubu neis le bes ageakarem tabakeamlei, a kega,
61 Abele le keribi detager, Kaka umele Ade ra zogo meta ezageri, kaka umele ko ikeli neis netate gerger.
62 Abele zogo le ekue, a abim kega, Nako ma nole mer etkalu? nako neis le ra mer marim?
63 Epe Iesu nole mer kak. Ege zogo le abim detager, kega, Kaka mari detager, Ma iskosi keribim edede Ad ra nei, nako mama Keriso Ade ra Uerem?
64 Ege Iesu abi detager, Eko, mama detager; kaka uabi detager, Keubu uaba erdali Le la Uerem E emri tuter tag abele adigir kemer le, E ko tabakeam gaire kotor baz giz ge.
65 Abele zogo le tabara am uali etoat, a uiabi kega, E adud mer egali Adim: nako, nole ko abkoreb nerute ageakarem meribim? dasmer, uaba aserare peirdi abara adud mer egali Adim.
66 Nako uaba dikiaporare? Ege uiaba daratagerare, kega, Abkoreb E eumilu.
67 Ege uiaba mos iduari abara opem; a uader le tag giz ipitare abim,
68 A uiaba mer kega, Keriso ae, mase keribi etomertare, nete le mari ipiti?
69 Epe Peteru E adige emri abele meta ge; nerute memeg neur abim tabakeamulu kega, Mama nerute le kemem Iesu Galilaia le.
70 E abi asared uiaba opem uridili, kega, Kaka umer kak abele lu ma kari detager.
71 E teosomeda abele maisu ge, a nerute memeg neur ko abi erdali, E detager uader le, Abele le E kemem Iesu Nazareta le.
72 E ko abi asared, a ditimeda adud mer egali, kega, Kaka umer kak abele le.
73 Kebikebi, uader le tekueilu, a uiaba kega, Peteruim, Ageakar ma nerute le uiabielam; abelelam keriba umele mara kodomer.
74 E ko adud mer egali, a iskosi, kega, Kaka umer kak abele le. Ege kimiar faul sobkak ereretikri.
75 Epe Peteru ko dikiapor abele mer Iesu abi detager, Nole kimiar faul ereretikri kak, ma neis netat kari asared. Ege osomed E au ezoli.