1 YOANE
Pepa Yoane iŋgere muŋga panzi kalo-tawana tamâta
Yesu Kirisi ne pâri-tamâta Yoane iŋgere pâri ara marumbu lâ, ŋineŋga muli iŋgere ŋgua ŋine panzi kalo-tawana tamâta ŋgu pinde. I nde koŋa lâ, aku i ilo ndo keno panzi kalo-tawana tamâta ŋinde, kala ipatu ŋanzi tu i natu wukale. Tamâta pinde silaŋenzi ŋgu siporo tu Yesu ipâŋga tamâta mao tia, aku siporo tu nenda kiesaka nde kelekele ŋalae tia. Yoane ileleanzi laŋeŋa tamâta ŋinde, ku itula ŋgua pwataki ŋana tini-mwasa ne vetâŋa kâ. Iporo tu Maro Kindeni ilo ndo keno pa kinda, kala isupwa Yesu imâ, aku Yesu ilo keno mine nâ kala imâte ŋana kinda kâ. Mine nde ara ŋana kinda taitu-taitu ma tininda mwasa panzi tamâta rârâni.
1
Ŋgua Via ipâŋga nia yo
1 Maka uru katula ŋgua pwataki ŋana Ŋgua Via kâ, i ŋa toŋge tu Yesu. Lâ zo ŋinde Maro Kindeni ipulia samba wa tâno tia yo, ande Ŋgua ŋinde imo muŋgani lâ, kala ŋine i imo mine nâ. Maka kaloŋo i ku matama kamora i lâ. Maka kalea sondo nâ pa i, aku kataŋo i tini lâ.
2 Via ŋinde nde ipâŋga nia yo lâ. Maka kamora i, aku uru katula ŋgua pwataki ŋana ŋinde kâ. Kala ŋine maka kaporo pwataki pa miki tu Ŋgua Via ŋinde imo via mine ku imo nâ. Muŋgani i imo kuku Tama, ŋineŋga ipâŋga nia yo, aku maka kamora lâ.
3 Maka kamora wa kaloŋo ŋinde marumbu lâ, ande kala maka uru katula ŋgua pwataki pami ŋana ŋinde kâ. Maka kaveta mine ŋana duvi ŋine kâ; maka iloma tu miki ma kamo ilomi taitu kuku maka. Aku kinda tao ilonda ilâ taitu kunzi Tama kuku Natu Yesu Kirisi rua.
4 Maka kaŋgere ŋgua lâ pepa ŋine tini imâ pami ŋana ma iveta nenda ndekâŋa ipipi ndo lâ ilonda kalonda.
Ara ŋana kinda ma toka sinâla ilo nâ
5 Yesu Kirisi itula ŋgua pwataki pa maka kaloŋo lâ, ande kala maka katula ŋguani ndaina pwataki pa miki. Ŋgua ŋinde nde mine: Maro Kindeni i nde sinâla, aku kondoma toŋge ikeno pa i, ande tia ndo kanaŋo.
6 Ambo kinda ma taporo tu, “Naŋa ao iloŋgu ilâ taitu kuku Maro Kindeni”, andeta nenda yokâŋa ikeno lâ kondoma ilo, ande nenda ŋgua ŋinde nde mao tia. Ŋgua ŋinde nde laŋeŋa nâ, ŋana tu kinda ŋandai tapono muli pa vetâŋa mao ŋga.
7 Taitu miki kaloŋo ŋga; ambo kinda toka lâ sinâla ilo, itogo Maro Kindeni uru imo sinâla ilo mine, ande kinda tamo ilonda taitu kunzi Maro Kindeni ne tamâta. Aku Maro Kindeni Natu Yesu see izavaru nenda kiesaka rârâni piti lâ tininda, aku iveta kinda tamo tava ilonda mbâra-mbâra nâ.
8 Ambo kinda ma taporo tu, “Naneŋgu kiesaka toŋge ikeno tia”, ande kinda taporo laŋeŋa pa warakânda, aku ŋgua mao ikeno ilonda kalonda tia ndo.
9 Andeta miki kaloŋo ŋga; ambo kinda ma tapatula nenda kiesaka pa Maro Kindeni, ande i ma iveta ikura ne ŋgua pâŋa mine. I ma iveta kie ara ndo pa kinda mine; i ma izavaru kiesaka piti lâ tininda, aku ma izavarunzi vetâŋa soki-soki ndia rârâni uru taveta ŋinde piti tona. Aku i ne vetâŋa ŋinde ma iveta kinda tamo tava ilonda mbâra-mbâra ndo.
10 Ambo kinda ma taporo tu, “Naŋa muŋga aveta kiesaka toŋge tia”, ande ŋinde itogo kinda taporo ŋgua tu Maro Kindeni nde laŋeŋa tamwata. Ambo mine, ande Maro Kindeni kawa ŋgua ikeno ilonda kalonda, ande tia.