12
Kiuu sandiꞌi
1 ’Te tiempu yun ndakoo Miguel, ia kuu kaꞌnu ka nuu ia ka jinokuechi nuu Dios ja jito ya ñayiu ñuu ron.
Te kokuu in tiempu ja koo ndevaꞌa tnoꞌo suchi ini,
ja vi ni tu saꞌun na ama oo,
guaa ndee nuu ni ka jinkoo in in ñuu, vi guaa ndee kiuu yun.
Su nuu na kenta tiempu yun, te vi kaku niꞌnu ñayiu ñuu ron,
ndiꞌi ñayiu ja ka yoso sivi nuu liuru maa ia Dios.
2 Te kuaꞌa ñayiu ni ka jiꞌi ja ka yiꞌi chii ñuꞌu vi ndatekui,
savai ja vi kotekui nikuii nikani,
te sava kai ja vi tnaꞌi jakanoo,
ja vi koi in nuu ioo ndevaꞌa ka nikuii nikani.
3 Te ñayiu ndichi vi koyeꞌi,
nagua yeꞌe ndika andivi.
Te ñayiu ka kaxtnoꞌo ichi ndaa,
vi koyeꞌi na kuinio kimi nikuii nikani.
4 ’Su maa ron, vi Daniel, tavaꞌa maa ron ini anu ron tnoꞌo yaꞌa, te ndakasi liuru yaꞌa na kondesi maa, guaa ndee kiuu sandiꞌi. Chi kuaꞌa ñayiu vi kunui yaꞌa yun, kiꞌinkuei vi ndukui ja vi junkuiꞌnu guaꞌa ka ini tnoꞌo ndichi ―kachi ya.
5 Yun te ni jini tuku maa san ja kuu san Daniel, uu ka tee ka nukuiin yuꞌu in yute, in de jioo yaꞌa, te inka de jioo yun.
6 Te jiñaꞌa in tee yun nuu tee niꞌnu saꞌun vii ndevaꞌa ja kuu lino, ja nukuiin de siki ndute ñuꞌu yute yun:
―¿Na kiuu guaa skunkuu ja koo javii ndevaꞌa yaꞌa? ―jiñaꞌa de.
7 Te ni onini san ni kaꞌan tee niꞌnu saꞌun vii ndevaꞌa ja nukuiin siki ndute yute yun. Ni kaneꞌe de ndaꞌa kuaꞌa de vi ndaꞌa satni de ichi andivi, te ni kee yuꞌu de nuu ia teku nikuii nikani, te kachi de:
―Nuu uni kuia yosava, te skunkuu ndiꞌi yaꞌa, nuu vi junkuiin ja vi xnaa jandakui ñayiu ñuu ia Dios ―kachi de.
8 Ni onini san tnoꞌo ni kaꞌan de, su tu ni junkuiꞌnu ini san. Yun te ni jikan tnoꞌo san de:
―Jitoꞌo san, ¿naxa kaa ja kokuu nuu skunkuu ndiꞌi yaꞌa? ―jiñaꞌa san.
9 Te kachi de:
―Kuaꞌan ichi maa ron, Daniel, chi ndesi tnoꞌo yaꞌa vi koo vaꞌa guaa ndee na kenta kiuu sandiꞌi.
10 Te kuaꞌa ñayiu vi yaꞌa nuu tnundoꞌo, te vi nduvii ja vi ndee vi nduyayai. Su ñayiu kueꞌe, chi vi kosaꞌa ni mai jakueꞌe, te ni in ñayiu kueꞌe yun, ma vi junkuiꞌnu ini. Su ñayiu ndichi, chi vi junkuiꞌnu ini.
11 Te ndee kiuu ja vi kindee ja ka soko ñayiu in kiuu in kiuu, vi guaa ndee kiuu vi kani in chuꞌchi tneꞌe ndevaꞌa nuu veñuꞌu, te yaꞌa in mil uu ciento kuun xiko uxi kiuu.
12 Su na taꞌu na ndetu ñayiu ndetu kaꞌnu ja kentai in mil uni ciento oko xaꞌun kiuu.
13 ’Su maa ron, Daniel, kaka yutnu ron guaa ndee kiuu kuu ron, te ndatatu ron. Te kiuu sandiꞌi, te ndateku ron ja niꞌi ron in ja kutaꞌu ron ―kachi de, ni tee Daniel.