52
Ni ndakuñaꞌa ia Dios tnoꞌo sii ini nuu ñayiu Jerusalén
1 Ndoto ñuu Sión, ndoto ja suni nani ron Jerusalén,
te saꞌa ndakui maa ron, ja kuu ron ñuu ii.
Ndekuiꞌnu saꞌun vii ka ron,
chi ma kiukuei saꞌun ka ñayiu tu ka yitnuni,
ni ñayiu tneꞌe nuu ron.
2 Ndakoo, vi Jerusalén, te kisi ñuyaka ja kaa ron,
te jinkoo nuu mesa ja ndatatnuni ron.
Te roon, sesiꞌi ñuu Sión ja ka ndesi ron vekaa ñuu jian,
vi xtajioo cadena ja ka nuꞌni ron, te vi yaa ron.
3 Chi suaꞌa kaꞌan Jitoꞌo ron:
“Tu na xuꞌun ni ka tniuyaꞌu nuu ni ka kuyaꞌu ron,
te suni saa ni, tu na xuꞌun vi nukuꞌun ron ja ndatau ña rin”.
4 Chi suaꞌa kaꞌan Jitoꞌo ron:
“Ni jaꞌankuei ñayiu ñuu rin Egipto ja vi koi yun ndee tiempu ja ni yaꞌo yun,
te nuu kuee ka te ndevaꞌa ndetnuni ni ka saꞌa ña ñayiu Asiria,
su masu na jakueꞌe ni ka saꞌi jin ñayiu Asiria yun”.
5 Te vitna, “¿nagua kuu ja saꞌo?”, kachi Jitoꞌo.
“Te ni ka jaka ña jin ñayiu ñuo ja vi kunukuechi ñuu Babilonia,
te masu nagua ni ka saꞌi jin ñayiu yun.
Te ñayiu ka tatnuni nui, chi siun ni ka kana ja ka saꞌa teyii,
te ndiꞌi kiuu ni ka kaneꞌe ña jion.
6 Yun te vi kuni ñayiu ñuo na ia kuo,
te kiuu yun te vi kuni ja mao kuu ia jiñaꞌa: Yaꞌa oo rin”,
kachi ia Dios.
7 Nase vivii siꞌin nevaꞌa ñayiu vaji nuu yuku jin tnoꞌo vii tnoꞌo vaꞌa,
vi kaꞌin tnoꞌo mani, vi vaji jin tnoꞌo sii ini,
vi xtutenui tnoꞌo ja skaku niꞌnu ia Dios ñayiu,
te jiñaꞌi nuu ñuu Sión: “Maa ia Dios ron kuu rey, ia tatnuni”.
8 Konini, chi ka kana tee ka yoxnee sukun ja ka jito ña jin ron,
te inuu inuu ka kana de ja ka kusii ini de,
chi ka ndiaꞌa de jin nuu de ja ni ndajiokuiin Jitoꞌo ñuu Sión.
9 Roon, veꞌe tikundu ja ni ka ndoo Jerusalén,
vi kata yaa nuu ia Dios ja ka kusii ini ron,
chi ni ndakuñaꞌa Jitoꞌo tnoꞌo sii ini nuu ñayiu ñuu ya,
chi ni ndatau ya ñayiu Jerusalén.
10 Chi vi jin nuu ñayiu ndiꞌi ñuu, te ni xneꞌe ya jakaꞌnu ya,
te vi ndiꞌi ñuu ja ka oo ndee jaꞌa ñuyiu
vi kuni ja ni skaku niꞌnu ña ia Dios mao jion.
11 Te maa ni ja ka ndiso ni ndatniuu ii Jitoꞌo,
vi kujioo ni, ndekuei ni ñuu Babilonia jian,
vi ndasavii ni maa ni, te ma vi keꞌe ni, ni in ka jatneꞌe.
12 Chi masu ñama ndekuei ni, te ni masu vi kunu yuꞌu ni,
chi koxnoꞌo maa Jitoꞌo ichi nuu ni noꞌokuei ni,
te ichi yata ni suni kokoto ña maa ia Dios mao ja ka kuo ñayiu Israel.
Ni tnaꞌa tee jinokuechi nuu ia Dios tnundoꞌo te ni saꞌa kaꞌnu ña ya jin de
13 Vi kondiaꞌa ja kee guaꞌa tee jinokuechi nuu rin,
te kokuu kaꞌnu de, kokuu kaꞌnu ndevaꞌa ndetnuni de.
14 Te kuaꞌa ñayiu vi saꞌu kuii ini nuu vi kuni ñai jin de,
ja vini ndesi saꞌun nuu de, te vini tu ka naꞌa de ja ñayiu kuu de.
15 Saa te vi saꞌu kuii ini ñayiu kuaꞌa ñuu nuu vi kuni ñai jin de,
te vi kasi yuꞌu tee ka kuu rey nuu de,
chi vi kuni de in ja tu na ama ka ndakani nuu de,
te vi jinkuiꞌnu ini de in tnoꞌo ja tu saꞌun na ndee ka nini de.