19
Ka chiñuꞌu ia Dios ndee andivi
1 Te nuu ni yaꞌa yun, te ni jini san na kuinio ja ka kaꞌan jaa kuakuaꞌa ñayiu ndee andivi, te ka kachi:
Kaꞌnu kuu ia Dios,
chi nuu maa Jitoꞌo Dios vaji ja skaku niꞌnu ña ya,
vi oo jayeꞌe tajan ya vi jakaꞌnu ya.
2 Chi maa ya guaa jandaa ja sandaa ndija ya kuechi,
chi ni tetniuu ya tnundoꞌo siki ñuu yun ja kui na kuinio in ñaꞌa xiko maa,
te jin ja xiko ñaꞌa yun maa ña
te ni xtivi ña ñayiu ñuyiu,
te ni ndaxtenaa ña ia Dios jin ña
ja ni ka jiꞌi tee ni ka ojinokuechi nuu maa ya.
Ka kachi.
3 Yun te ni ka ndajiokuiin ni ka kaꞌan tukui:
Kaꞌnu kuu ia Dios,
chi nikuii nikani kokana ñuaꞌa ñuu yun ja kokai.
Ka kachi.
4 Te ndi oko kuun tee nijaꞌnu jin ndi kuun ia ka teku ni ka jinkuiin jiti de, te ni ka chindei de xini de ndee nuu ñuꞌu, te ni ka chiñuꞌu de ia Dios ja nukoo ya nuu mesa nuu tatnuni ya. Te ka jiñaꞌa de:
―Saa na kokuu. Kaꞌnu kuu ia Dios.
5 Te ndee nuu mesa nuu tatnuni ya ni kee in tnoꞌo ja kaꞌan suaꞌa:
Vi kaꞌan yiñuꞌu nuu ia Dios mao,
ndiꞌi roon ja ka jinokuechi ron nuu ya,
vi roon ja ka yuꞌu niꞌnu ron ya,
a kuu ron ñayiu naꞌnu a ñayiu kueli.
Kachi.
Viko ja tnandaꞌa Lelu ia Dios
6 Te suni ni onini san ja na tnoꞌo ka kana kuakuaꞌa ñayiu, axi na kuinio ja jiso nuu jika kuaꞌa ndute, axi na kuinio ja niꞌi jiso kani tajan. Te ka jiñaꞌa:
Kaꞌnu kuu ia Dios,
chi ni jinkondee maa Jitoꞌo ja tatnuni ya,
chi maa ya kuu ia Dios ndakui ja ndiꞌi ni ja kuu ja saꞌa ya.
7 Te na vi kokuu sii inio, te vi ja ka osii inio,
te na vi chiñuꞌo ya,
chi ja ni jino kiuu ja tnandaꞌa Lelu maa ia Dios,
chi ja ka otuaꞌa ñayiu maa Dios
ja vi kokui na kuinio suchi ja vi tnandaꞌi jin ya.
8 Chi ni jandetu ia Dios ja vi kekuiꞌnui saꞌun kuijin ja kuu lino,
saꞌun vii ja yeꞌe tajan.
Ka kachi.
Chi saꞌun vii yun kuu taka tniuu ndaa ja ni ka saꞌa ñayiu maa ia Dios.
9 Te kachi ia jinokuechi nuu Dios:
―Tee tnoꞌo yaꞌa: “Na taꞌu na ndetu ñayiu ni kana ya ja vi koi nuu viko tnandaꞌa Lelu ia Dios”.
Te kachi ka ya:
―Tnoꞌo yaꞌa kuu tnoꞌo ndaa ja ni kaꞌan maa ia Dios ―kachi ya.
10 Te ni jinkuiin jiti san nuu jaꞌa ya ja chiñuꞌu san ya nuu siun. Te kachi ya:
―Ñaꞌa, ma saꞌa ron siun, chi suni jinokuechi rin nuu Dios nagua ka jinokuechi maa ron jin sava ka ñani ron ja ka ndikin ndaa ron tnoꞌo Jesús. Chiñuꞌu ia Dios, chi tnoꞌo ja ni kaꞌan Jesús kuu tnoꞌo ka ndiso tee ka ndakani tnoꞌo ya.
Ia yoso kuai kuijin
11 Yun te ni jini san ja nune andivi. Te yun ni kenta in kuai kuijin, te ia yoso ti yun nani ia ndaa, ia skunkuu, chi saꞌa ndaa ya tniuu vi jaꞌnde ndaa ya kuechi, vi jaxin tnaꞌa ya.
12 Te nduchi nuu ya, chi vi yeꞌe na kuinio yaa ñuꞌu, te ñuꞌu kuaꞌa corona xini ya, te ndee in sivi ja tu na in jini, chi maintnoꞌo maa ya guaa jini.
13 Te niꞌnu ya in saꞌun ni indajin nuu niñi, te sivi ya kuu: Tnoꞌo maa ia Dios.
14 Te yata ya ka ndikin kuaꞌa ña soldado ja ka oo andivi ka yoso de kuai kuijin, te ka niꞌnu de saꞌun finu ndevaꞌa ja kuu lino saꞌun kuijin vivii.
15 Te yuꞌu ya ni kee in yuchi kani xenxeen, nagua ja jin yuchi kani yun kuñaꞌa ya tnundoꞌo vi tnaꞌa ñayiu taka ñuu. Te tatnuni xeen ya jin in xtnuxii ja kuu kaa, te sandaa ya kuechi na kuinio ja kuain niꞌnu ya uva, te taxin ti, te keneꞌe ya nduxi ti ja kuu tnundoꞌo ndevaꞌa tetniuu ya, ja kiti ini ndevaꞌa Dios, ia ndakui ndevaꞌa ja ndiꞌi ni ja kuu ja saꞌa ya.
16 Te nuu saꞌun ya jin nuu kuñu kokin siꞌin ya yoso in sivi ja kaꞌan suaꞌa: “Maa rin kuu Rey nuu taka rey, vi maa rin kuu Jitoꞌo nuu taka jitoꞌo”.
17 Yun te ni jini san in ia jinokuechi nuu Dios ja nukuiin ya nuu nikandii. Te ni kana jaa ya nuu ndiꞌi kiti ndagua ja ka jiko ichi andivi ja ka jaa kuñu, te jiñaꞌa ya:
―Neꞌekuei te vi ndututu ron, nagua ja vi kaxini ron, chi saꞌa ia Dios in viko kaꞌnu,
18 nagua ja vi kaa ron kuñu tee ka kuu rey vi tee ka kuu capitán, vi kuñu tee inu teyii ndevaꞌa, vi kuñu kuai, vi kuñu tee ka yoso ti, kuñu ndiꞌi ñayiu ka jinokuechi vi ñayiu tu ka jinokuechi, ñayiu naꞌnu vi ñayiu kueli ―jiñaꞌa ya.
19 Yun te ni jini san ja ni ka ndututu maa kiti xeen jin taka rey ka oo ñuyiu vi soldado de, ja vi kaxin tnaꞌa de jin ia yoso kuai vi soldado ya.
20 Te ni ka kakuiko ya kiti xeen yun jin tee tnoꞌo ja ni ka ondakani tnoꞌo ia Dios ja ni ka osaꞌa de tniuu naꞌnu jin nuu maa kiti xeen yun. Chi jin tniuu naꞌnu yun ni ka xndaꞌu de ñayiu ja ni ka jandetui ka ndisoi tnuni maa kiti xeen yun. Te ni ka chiñuꞌi chuꞌchi ja ni ka ndaneꞌe nagua kaa maa ti. Yun te nduu kiti xeen yun jin tee ni ondakani tnoꞌo tnoꞌo yun, ni ka tnaa teku ña ya nuu in jitnu ja kai jin azufre.
21 Te sava ka ñayiu yun, chi ni ka jiꞌi jin yuchi kani ja ni kee yuꞌu ia yoso kuai yun. Te ndiꞌi kiti ndagua ni ka jaa ti kuñu yun, guaa ndee ni ka ndenuu ini ti.