Mbeɗe sáka kuni fie Fe ká tina nun ha̰ Za̰a 17

Kúŋ ɓay ká ɓo tul bawda má̰y nun pie

1 Falɛ lɛ, leɗ nzaapeɗ Ŋgɛrɛwṵru mbḭw ká sakra leɗ nzaapeɗ Ŋgɛrɛwṵruri ká tɔnɔ say ká i mgba tuŋguo him hɛrɛ Ŋgɛrɛwṵru ɗo nduo-ri na ɓaa mii: «Mu vi, lɛ, mì kíɛ mù faa ká Ŋgɛrɛwṵru a kúŋke ɓay ɓo tul bawda má̰y ɗáa nun pie, ká ɓa bawda ŋgɛrɛpuo ká ɗo nzaa mbiiri*. 2 Mbayri ka tusiri na i pɔŋ sùo-ri í ɗaa fe ɗáa lɔrɔ ziŋ ni, a nzoɓ tukɛlɛri ká i nzɔ him nun pie ɓe na, himke ɗaa ri tuɗ.»

3 Báyḭi lɛ, Tem Ŋgɛrɛwṵru mgba mì, lɛ, leɗ nzaapeɗ Ŋgɛrɛwṵru na mbi mì se ɓil law kɔr. Lɛɛ, mì kɔ má̰y mbḭw munu ká ɗi kaw tul fe mgbam ká sḭ̀i ŋga̰w ŋga̰w ká ɗo yer ká riŋ tḭ́iri Ŋgɛrɛwṵru ɗo sùo-ɛ kpurukuɗ bele. Fe mgbamke ku na ɗo ɓáy tul tɔnɔ say, tḭwri ɓa duɔ. 4 Má̰yke na nduo gari lari ká ndṵy a ndaɗ ɓamba ká surumkeri ɓa surum gari nduo mbayri. Ka mbaɗa sùo-ɛ ɓáy lari ká ndṵy zḭriri zḭriri nda̰w, ɓáy tisaw ká ndaɗ ɓamba ká larike ŋgɔŋ ɓamba ɓáy zaw kereri nda̰w pi. Ka mgba tuŋguo ká i ɗaa ɓáy lari ká ndṵy zḭriri zḭriri ɗo nduo-ɛ ká fe ɗáari ká maa kɔ́kɔ ya, ɓáy fe lɔrɔri ze mbaa ɗi ɓay tul nun pie ɓe na. 5 Ká nzaa pol-e na, i vbie riŋ ká sa̰w ɓayke ɗo zaɗ muni mii: «Babilo̰n, ŋgɛrɛpuo ká ɗo ɓáy hṵrusuo, máa nzoɓ ɗáa nun pieri ɓáy nzoɓ fe ɗáari ká maa kɔ́kɔ ya ká tusiri key.» 6 Mì kɔ lɛ, sím nzoɓ Ŋgɛrɛwṵruri káʼa nzɔ na ɗaa ni tuɗ ɓa him; ɓa sím nzoɓri ká i i ri ɓay tul ɓay Zezu ká i ɗo tul-e.

Zaɗka mì kɔ ni na, mì yḭ̀i mí kaw yer. 7 Báyḭi lɛ, leɗ nzaapeɗ Ŋgɛrɛwṵru na ɓaa ha̰ mì mii: «Mina nda̰w rɔɔ, mù kaw yer munu lɛ? Mì ɓáa sa̰w ɓay muni má̰y key na ɓáy fe mgbam ká ɗo yer ká tul-e ɓa tɔnɔ say, tḭw-ɛ ɓa duɔ, ká soɓ ni na ha̰ mù laa. 8 Fe mgbam ká mù kɔ na, pola ká ɗo ɓáy kumnun, timbɛɗɛ lɛ, ka ti mbǎa, roo lɛ, kaʼa tḭ́i saa *luɔ zaɗ baw ká gbṵke tiya ɓay séke zaɗ ɓíɛ ká kpukɗu kpukɗu. A nzoɓ tukɛlɛri ká riŋ-ri ɗo ɓil mbeɗe pam pola ya ɗɔɗ nda̰w rɔɔ tusiri ɗo ɓáy na, zaɗka i kɔ fe mgbamke na, i káw yer, ɓay ḭi lɛ, pola na ka ɗo ɓáy kumnun, timbɛɗɛ lɛ, ka ti mbǎa, roo lɛ, kaʼa yḭ́i a tḭi ɓáy.»

9 Ɓe ze ɓa sa̰w síe haŋa nzoɓ taa Ŋgɛrɛwṵruri i ɗo ɓáy fe kɔ́kɔ í ɗaa fe ɓáy nun nzɛm. Tul ká tɔnɔ say na, ɓa kuori ká tɔnɔ say ká má̰y na kaw ɗi†; a ɓa mbayri ká tɔnɔ say nda̰w. 10 Nzoɓ ndeɓekeri ká sakra ɓari mbayri na, i kal ro. Nzoɓ ndeke ɗi yieke re mbay timbɛɗɛ key, a nzoɓ ndeke ɗi tɔnɔ sayke na vi ya rɔɓay. A roo lɛ, zaɗkaʼa vi lɛ, ka ti káw bole ɗi ya hɔy. 11 A fe mgbam ká pola ɗo ɓáy kumnun, a timbɛɗɛ lɛ, ka ti mbǎa na, ɓe kḭ ze ka ɓa mbay ndeke ɗi tɔnɔ siɗike. Ka ɓa nzoɓ mbḭw ká sakra ɓari ká tɔnɔ say na nda̰w‡, a se ɓa zaɗ ɓíɛ ká kpukɗu kpukɗu na.

12 A tḭwri ká duɔ ká mù kɔ na, ɓa mbayri ká duɔ ká i re mbay ya ɓáy, roo lɛ, i zíŋ hṵrusuo réke mbay sa̰w síe mbḭw hɔy ziŋ fe mgbam ká ɗo yer na. 13 Ɓari mbaykeri ku na, law-ri maa kḭ a í ha̰ ŋgɔŋɔ ɓáy hṵrusuo ɓari ɓay ɗáake peɗ ha̰ fe mgbam na. 14 Fe mgbamke ɓáy mbayri ká duɔ na, i rúu ziŋ Vu Baɗu, roo lɛ, Vu Baɗu na, a háw yṵm ká tul-ri, ɓay ḭi lɛ, ka ɓa Ŋgɛrɛmbay ká kal tul ŋgɛrɛmbayri, a ɓa Mbay luye ká kal tul mbayri riw bele. A ɓari ká Ŋgɛrɛwṵru ɗi ri a nan ri zuɔ ɓoɗ ká í ɗo tul ɓay ɓe na, ì ɓá nzoɓ háw yṵm ziŋ ni.

15 Lɛɛ, leɗ nzaapeɗ Ŋgɛrɛwṵru na ɓaa ha̰ mì rɔɓay mii: «Nduo mbiiri ká mù kɔ ká má̰y nun pie ɗaa puo ká ɗi na, ɓa sa̰w nzoɓri nda̰w, ruɔ nzoɓri nda̰w, sa̰w puo nzoɓri nda̰w, rɔɔ nzaa ɓay nzoɓri nda̰w pi. 16 Tḭwri ká duɔ ká mù kɔ, ɓáy fe mgbam na, i túŋ má̰y ɗáa nun pie na ŋgereŋ. I nán feri káʼa ɗǒke na kpakla kpakla bele ɓay pɔ́ŋ ni ɗo hɔy nduɔɗi. I sṵŋa náy sùo-ɛ, a í tay ɓie ɓáy huu kpɔlɔk kpɔlɔk, 17 ɓay ḭi lɛ, Ŋgɛrɛwṵru ɗaa kɔn ɗáa peɗke na ɗo ɓil law-ri ɓay haŋa ri ɗaa fe káʼa leke ɓáy law máa kḭ mbḭw hɔy ha̰ mbayri na i ɗáake peɗ ɓáy hṵrusuo-ri ha̰ fe mgbamke na kpṵru maa ɓáy ɓay ká Ŋgɛrɛwṵru ɓaa na ka ɗaa peɗke ɔ ɓáy zaɗɛ nda̰w rɔ.

18 «A má̰y ká mù kɔ na, ɓa bawda ŋgɛrɛpuo ká ɗo ɓáy hṵrusuo, ká re tul mbayri ká tusiri key.»

* 17:1 Má̰y ɗáa nun pie key na, i ɗi ni ɓa Babilo̰n ŋgɛrɛpuo nda̰w, ɓay ḭi lɛ, fe ɗáa ɓe ula nzoɓ tukɛlɛri a kuɔ ri ɗo ɗi ɗi ziŋ Krisi. † 17:9 Kuori ká tɔnɔ say na, nzoɓri ker í ɓaa mii, ɓaa ɓay se tul ŋgɛrɛpuo Rɔm ká ɓa ŋgɛrɛpuo ká ɗo tul kuori ká tɔnɔ say na. ‡ 17:11 Mbay ndeke ɗi tɔnɔ siɗike key na, ka ɗo sakra mbayri ká tɔnɔ say na, ɓay ḭi lɛ, ka re mbay ba siɗi.