5
Jonima mui buka garari utaro eri
1 Na Joni, nana tubetuberoma erena i dera yaure yawoetanu orofaro yaubi Amaranu banibira afu agero mui buka ibiro ere. I bukanu oroini dubenaroini owawa ue odiro ere. Nono uwane tarieta na sewenima i buka uwane tarita.
2 Nana nono erena mui buna derawere aneruma yua derawere we mamite wei, anama dawa kobere amarana i uwane tarieta na ma furiare sabite i buka ma wurafite efisu wei.
3 Eno weiro doberebe mui amarama i buka ma wurafite ubarero efie ureroini nasiniroini nasini wowonaroini atanawa uta.
4 I buka ma wurae ereta amara atanawa utaba iba na i derawere webitara.
5 Nana eno ueba mui dera amarama naba eno wei, i da wiate ea. I Juda uwarabairoma fari raiyoni waita Amara, i Amarana Deiwidinu dera sirorari amara. Dana i orofa atatanu siosawere ueta nesia serigari uiba Dana i uwane tarieta na seweni ma furiare sabite i buka ma wurafisu wei.
Jonima Reka Mamoe eri
6 Nana mui Reka Mamoe erena emema urebaitaro uitebasute ibebasu, i ari i Dera Yawoeta Amaranu iboro inaibiro i me ibene ibene ibeta emeru fonu iboroini i dera uwaraini ema nesia Dawa ode kara utaro ere. I Mamoe Danu yawera nesiana seweni. Nono Danu diti nesiana seweni. I diti seweni ina Godinu Imumu seweni. Godima imumu seweni ema siaia uiro orofa atata aika maikaro anita.
7 I Reka Mamoema ane i buka i dera yaure yawoetanu orofaro yaubi Amaranu age duro muniro ere.
8 Ane i buka muniro me sinina ido i me ibene ibene ibeta emeru foini i dera uwara tueniti foini (24) ema nesia i Reka Mamoenu iboro arubi uta. Ema nesia gita ari afa waita emetuini korube goru naberoini muta. I korube naberoro fauda ari bonanawere emeruma i korube nabero nesia wate fare ibita. Ina Godinu uwaranu guriguri ueta.
9 Ema nesia reka soni i Reka Mamoeba eno weita,
Abaina arotorowaba i buka muninute i uwane tarisinu na ma furiare saninu. Emema a utaro uite Anu ononoma uwara aika maika, sina aika maika webita uwaraini orofa aika maika aboro aboro ibita uwara oiya uite ema woure amo Godibai odi.
10 Ana i uwara nesia Godibai gaukara ufitae iba ema dera yawoeta uwaraini fuyo ode sina weta uwara we mune odiba emana i orofa atata uwara nesia yawofitaita. Ana eno uiba Abaina arotorowaba i buka mubate i uwane tarisinu na ma furiare sabasu,
eno weita.
Reka Mamoenu ifu we ma derawere uta
11-12 Nana nono erebe nauena aneru faiya faiyawerema weroroka webitaro naue. Emana i dera yaure yawoetanu orofaini i me ibene ibene ibeta emeru foini i dera uwara tueniti foini ode kara utate soni derawere eno weita,
i utaro ui Reka Mamoe Dawana kobererauro bunawereba Dana yawoetaini gugua gubarini iwata uetaini buna derawereini mubisu. Emema Dawabai Danu ifu we ma derawere ufitate we ma kobererau ufitaro Godima Danu araeta mafisu,
eno weita.
13 Nana nono nauena Godima ubu uiro ibinita ememetu nesia, nasiniro ibinitaini urero ibinitaini nasini wowonaro ibinitaini enea ogo ubarero ibinitaini ema nesia soni weitaro naue. Emana soni eno weita,
i dera yaure yawoetanu orofaro yaubinu Godi, Dawaini i Reka Mamoeini ema sadeibai we ma kobererau uteibitate emanu ifu we ma derawere uteibitaro araeta derawereini buna derawereini emabai me ibene ibene ibifisu,
eno weita.
14 Eno weitaro i me ibene ibene ibeta emeru foma weita, ina ido weitana i dera uwara tueniti foma arubi uteda guriguri utaro ere.