1 Pur ningui chi bzuguaan guɨdx Atenas aquɨtru bdxuelaaztin gacbeen pur laat, ax bdxannɨ xgab bdxaannɨ dunzin ruy. 2 Chiy bxiaaldnɨ xcumpniernɨ Timoteo, laab ni rac tuby de sanicadxannɨ xmandad Dios catɨɨchnɨ de didxzaac xte Jesucrist, par cuzaclaazbɨ laat sutipnét ni areldilaaztɨ. 3 Te par nic tubytɨ quɨt chaxaclaaz pur de guelzii ni rdeedtɨ, laat nántɨ dec ziypac ná par ideednɨ. 4 Chi bzuguanén laat bdixteen lot dec zienzi guelzii ideednɨ, ne laat nántɨ dec ziyguiy aguc. 5 Pur ningui aquɨtru niuelaaztia, ax bxiaalda Timoteo par gacbiia xa zenuut ni reldilaaztɨ Jesucrist. Te pur rdxibia niun bɨndxab engany laat, chiy ax aquɨt xi blliúti ni bdxannɨ pur laat.

6 Per anre ni abdzɨny Timoteo xte ni güeguiaab laat, agudixteeb lon dec güenquɨ zenuut ni reldilaaztɨ Jesucrist ne zec ni rcaaztɨ de saa bniettɨ. Laab nab dec llillite rzaclaaztɨ renelaaztɨ dunnɨ ax quesentiand ójlapac laat xo iniát dunnɨ, zectiziac ni rcaazzacnɨ inián laat. 7 Pur ningui, de saniroldilaaznɨ Jesucrist, masquɨ iralozy de trabaju ne guelzii ni cadeednɨ, per quesentiand rzaclaaznɨ bindiagnɨ dec güenquɨ zenuut ni reldilaaztɨ. 8 Ax anre amastecru nuzaclaaznɨ pur ni agucbeen dec cazutipnéctɨ ni zenuut xnez Dad Jesucrist. 9 Parzi axtpacza niclɨ quɨt rdxialnɨ xa ideednɨ gracy Dios pur laat, pur irate guelrzaclaaz ni rziiennɨ pur laat nez lo Xtadnɨ Dios. 10 Rdxi ne guxin rguiin rnaabnɨ lo Dios isaanny yiopguiaan laat, ax yalo iniin laat ni rieedx gacbeet xte ni reldilaaztɨ Jesucrist.

11 Xtadnɨ Dios ne Dad Jesucrist gacnény dunnɨ chalee yiopguiaan laat. 12 Ne Xtadnɨ Jesucrist gacnény laat chaza icaazrupactɨ de saat, icaaztɨ irate de saa bniettɨ zec ni rcaazzacnɨ laat. 13 Laany gacnény laat sutiptɨ par ibiit nania, sin duld nez lo Xtadnɨ Dios, dxi ni gueed Dad Jesucrist cun irate de xpɨnny.