1 Spíritu Sant agudixteldíny dec zéedru dxi nuu bniety saandeb ni reldilaazdeb Jesucrist, amazru gúndeb cuend xtiidx de ni run engany ne irateru ni zéed pur bɨndxab. 2 Laadeb amazru gúndeb cuend xtiidx de bɨndixú ni run engany de bniety, de ni aquɨtru xi rziienti run duld pur abiiadeb rundeb ziy. 3 De bɨnqui sniideb dec quɨt náti par guchnaa bniety ne quɨtza iquiinti bniety iralo. Per Dios guluuny iralote aliment par iquiiny de bniety ni reldilaaz laany, de ni anán cún ni ná didxldí ax sdeeddeb gracyny. 4 Te pur irate ni baany Dios ná güen, ax quɨt xi náti par icuanaan belati ideednɨ gracyny chi aiquiinnɨ. 5 Te pur chi rnaabnɨ lo Dios laany cun xtiidxny runldeeny quia ni iquiinnɨ.

6 Pur ningui, belati liú iseedu de ni reldilaaz Jesucrist zec ni aguniia liú, ax cayuncu sirvɨ lo Jesucrist zec ni riáld, pur ziy zeza iseedru ni anánnu xte guelreldilaazqui ne de didxzaac ni zenuu. 7 Per quɨt gúntiu cuend de ni rguichlaaz de bɨny, de ni quɨt náti didxldí pur Dios, güenru güelaa bseed sutipu ibániu zec ni rcaaz Dios. 8 Güenquɨ ná gún bniety iralote muimiant par illúng bniety, per de lo irate cos mazrupac sac ibány bniety zec ni rcaaz Dios. Te pur gati lo guɨchliuztiré illiú ni ibány bniety zec ni rcaaz Dios, sino que néza llayabaa rut gap bniety guelnabány par chazy. 9 Dunnɨ nánnɨ dec didxldí ná de diidxquɨ, ax ná par chaldilaaz irate bnietni. 10 Pur ningui masquɨ zectispac ni cadeednɨ, per zélaa cadxannɨ ni cadxannɨ pur ni roldilaaznɨ Dios ni rbeznabány, laany ni rbezny par gacnény irate bniety, per mastecru par cun de ni reldilaaz laany.

11 Ziy ná par iseedu de bniety par gúndeb ziy. 12 Bcualo quɨt inii bniety dec quɨt illiútiu pur ni gady gactiu bɨngul. Güenru baany pur gacu tuby ejemplɨ par de ni reldilaaz Jesucrist zeclɨ xquel ni rgüiiu diidx, xquel ni nabániu, xquel ni rcaazu stuby de bniety, xquel ni reldilaazu Dios ne zeclɨza pur de xgabzaac. 13 Lalzi guelda, güelaaru biildy xtiidx Dios nez lo de bniety, blɨdxdeb ne bliuudeb xi zelo xtiidx Dios. 14 Quɨt yianlaazu gúnu zec ni riáld pur guelnán ni bnɨɨdx Dios liú chi bzubnaa de bɨngul quiu chi gucbeedeb dec liú ná ni abcuabee Dios.

15 Güené cuend de diidxquɨ te par gacbee irate bniety dec liú zeza ziúu par delant. 16 Bcualo liú ne ni rseedu stuby de bniety. Güelaa guzutipné ni nánnu, te pur ziy xquel zeclɨ cayacníu liú ne cayacnézacu de ni rcuadiag xtiidxu.