1 Per liú, Tito, bseed de bniety irate zectisy ni ná de diidx zaac xte Dios. 2 Bseed de bniety bɨngul ibánydeb zacru, ni nianlaaz par gap de bniety didxdoo laadeb. Dibylotisy chaldilaazdeb, icaazdeb de saadeb, ne güelaazdeb ni teedtisdeb. 3 Ziytiziacza de nanbɨngul ná par ibánydeb zec ni riáld ibány de xpɨny Crist. Quɨt náti par güeedeb xtiidx bɨny, ne quɨt gacdeb borrach. Ná par iliuudeb de bniety xa ná güen, 4 ilɨdxdeb de bniety gunaa ni ná bniinru par icaazdeb chialdeb ne de lliindeb, 5 ne par ibánydeb nania, ni nianlaaz, icualodeb lizdeb, gacdeb güen ne icuadiagdeb xtiidx chialdeb par quɨt tu inii de mal diidx pur xtiidx Dios.

6 Ziytiziacza liú, Tito, blɨdx de nguiu ni ná bniinru par ibánydeb ni nianlaaz. 7 Baany pur gúnu irate xnezni te par íguiaadeb xa riáld gúndeb ni ná güen. Chi iseedudeb, bseeddeb zacru, zec ni riáld, 8 cun púrzi de diidx zaac par quɨt xi icuaquia bɨny liú, te itiulo tutix ni rdxichné dunnɨ, pur quɨt xi idxialtib icuaquiab dunnɨ.

9 Ziyza blɨdx de mos icuadiagdeb xtiidx xlámdeb par irate, gacdeb güen ne quɨt izieecquitideb lo diidx. 10 Niclɨza quɨt cúaantideb xixte xlámdeb, sino que dibylotisy gúndeb dzɨɨny par iniá irate bniety xquel ni nabánydeb dec quesentiand nasaa ná de didxzaac xte Xtadnɨ Dios ni run perdón de xtuldnɨ.

11 Ne Dios abliuuny xa xquel gacnény dunnɨ, ne pur guelgucnéqui zelee gac irate bniety perdón. 12 Pur guelgucnéqui racbeen dec ná par isaannɨ de mal cun de ni quɨt illiú ni rcaaznɨ idxannɨ lo guɨchliuré, par ibánnɨ ni nianlaaz, zec ni riáld, zec ni rcaaz Dios ibánnɨ lo guɨchliuré 13 lalzi ni canuun idzɨny dxi nasaa ni gac cumplir xtiidxny zec ni aguniiny dunnɨ dec sbíi gueed Dios Xtadnɨ Jesucrist cun guelrnabee xtenny, laany ni baanny perdón de xtuldnɨ. 14 Laany gutyny pur dunnɨ par bldány dunnɨ lo ira de duld ne bsiany dunnɨ par gacnɨ xpɨntisny ax idxannɨ pur idxannɨ púrzi ni ná güen.

15 Irate ni aguniia liú bseedni laadeb. Sin dxiby blɨdxdeb, ne guluxnezdeb cun guelrnabee ni napu par quɨt isaandeb ni rcuadiagdeb xtiidxu.