7
Jesús nak ngwleyy kuu nataak leeka taxal ngok Melquisedec
1 Lee Melquisedec ngok rey yez Salem, ne ngok zha ngwleyy kuu kwathoz nataak lo Diox kuu ndob yibaa. Leettsa lee Abraham mretab ngwa lo zhoo, leettsa mtsow Abraham gan lo re rey, tsa lee Melquisedec mroo mzaal Abraham net, ne mnaab zha kuu wen lo Diox par Abraham,
2 tsa lee Abraham mndaa lo Melquisedec thib part lo tsii part, kuu mtsow Abraham gan lo zhoo. Ne lee le Melquisedec nak “rey nali”; ne lee zha ngok rey yez Salem, ne lee le yeza nak, “wen kwin men”.
3 Ne myatht naa cho ngok xut zha ne xnaa zha, neeka re tey zha; ne neeka yent cho mndaa kwent naa pol ngol zha ne pol nguth zha; tak lee zha ngok taxal Xgann Diox, kona thitanax ngok zha ngwleyy kuu nataak.
4 Ne wii goo naa xa ngok nataak Melquisedec, kona lee teyaa Abraham zha ndala mndaa thib part lo tsii part re kuu mtsow Abraham gan lo zhoo lo zha.
5 Ne taxal nak ley chaan Moisés, beeta re ngwleyy kuu nak raz chaan Leví, nak zha kuu ndoblo kayaa thib part lo tsii part lo reta kuu nap men, ne tegal zha liz zha re zha, ne reta zha nak zha raz chaan Abraham.
6 Per lee Melquisedec tegal nagt zha, zha raz chaan Leví, lee zha mkayaa thib part lo tsii part kuu mtsow Abraham gan lo zhoo, ne tegal lo Abraham mtaan Diox diiz, per lee Melquisedec mnaab lo Diox, tsa taa Diox naroob kuu wen lo Abraham.
7 Ne yent cho tak gab wlit koree, tak lee zha kuu naab kuu wen par tedib men, zhaʼa masraa nataak nake zha kuu kayaay.
8 Ne nzhee xidaa, zha nzhath nak kuu nkayaa thib part lo tsii part kuu ntsowaa gan, per lee xkeets Diox ndaa kwent chaan Melquisedec, taxal thib zha kuu nabanka.
9 Ne tak gabaa, lee Leví ne reta ngwleyy kuu mroo lo raz chaan Leví, re zha kuu mkayaa thib part lo tsii part chaan re teyaa, noga re zhaʼa mndaa zha thib part chaan zha lo Melquisedec, leettsa lee Abraham mndaay lo Melquisedec;
10 kona lee kuu wli nak, leettsa lee Melquisedec mroo mzaal Abraham, terka keno Abraham re zha kuu gak raz Abraham tsya, tak lee re zhaʼa bee nzo zha leen kwerp Abraham tsya.
11 Kona os lee re ngwleyy kuu nak raz chaan Leví taxal nabee ley, gatsow zha gan gagakaa zha nali lo Diox, neeka gatetht Diox tedib ngwleyy kuu nak taxal Melquisedec, thib zha kuu nagt zha raz chaan Aarón, ne lee Aarón nak zha raz chaan Leví.
12 Tak leettsa lee yalngwleyy nzee, noga ley ndoblo tsee.
13 Ne kwent chaan Jesucrist Zha Nabee loʼaa ndaa xkeets Diox kwent, ne nagt Jesucrist, zha raz chaan Leví; tedib raz chaan re teyaa zha Israel nak Jesucrist, ne yent cho ngok ngwleyy lo raza.
14 Tak wen neʼaa, lee Zha Nabee loʼaa myaad lo raz chaan Judá, ne mtetht Moisés raza, leettsa mndaa Moisés kwent chaan raz kuu gak re ngwleyy.
15 Ne mas nambi mloo koree, leettsa myaad tedib zha kuu ngok ngwleyy, kuu nak taxal Melquisedec,
16 ne mzint zha ngok zha ngwleyy lo raz taxal nzhab ley, sinke ngok zha ngwleyy kon yalney chaan thib yalnaban kuu nluxt.
17 Tak tenzhee nzhab lo xkeets Diox, leettsa ndaay kwent chaan zha:
Lu nak thib ngwleyy thitanax,
taxal ngok Melquisedec ngwleyy. [Sal. 110:4]
18 Kona lee ley nataagt raa ley nal, tak nake thib kuu neyt ne nlortsint raay nal,
19 tak lee ley kuu mndaa Diox lo Moisés, yent kwan mtsowe tsa gagakaa zha nali lo Diox. Per nal napaa ne ngebetaa thib kuu mas wen, ne por leey tak bigaa lo Diox.
20 Ne wlipaa nzhab Diox koree, per lee tedib net re ngwleyy tabaata ngok zha ngwleyy.
21 Per lee ngwleyy ree, wlipaa lee Diox nzhab gak zha ngwleyy, tak lo xkeets Diox ndaa kwent chaan zha, ne nzhabe:
Lee Zha Nabee nzhab tsowe ne tseet zha xkiiz zha:
“Lu nak ngwleyy thitanax”. [Sal. 110:4]
22 Diox mtaal Jesús loʼaa, tsa neʼaa wli diiz kuu mtaan Diox loʼaa, mas wene nake diiz kuu mtaan Diox ndala.
23 Ne lee tedib net re ngwleyya kwathoz zha ngoke, tak nzhath re zha kona naroob zha ngok ngwleyy kuu nataak;
24 per lee Jesús nak ngwleyy thitanax, tak thitanax naban Jesús.
25 Kona thitanax tak telaa Jesús reʼaa lo yalguth, reʼaa kuu mbig lo Diox por Jesús, tak thitanax naban Jesús ne tak naab Jesús lo Diox por lee.
26 Ne lee Jesús nak ngwleyy kuu kwathoz nataak kuu ndecheʼaa. Tak lee Jesús nak zha kuu nali lo Diox, ne mtsowt zha neeka thib kuu went, zhaa nak zha nake re ngwleyy kuu mndaa falt, kona mtob Diox zha ta mas ya yibaa.
27 Ne nagt Jesús taxal ngok re ngwleyy kuu ngok nataak lo yezlyu ree, re zha kuu mbeth maa kadta wiz, ne ner kwent falt zha nzhuth zha maa, tsaraa nzhuth zha maa kwent falt re men yez. Per lee Jesús thibka welt mtsow Jesúse por reta men, leettsa mndaa zha leeka lee zha nguth.
28 Leettsa ngoo ley chaan Moisés mkwaan zha mbyi kuu nalit nak lo Diox; par ngok ngwleyy kuu nataak, per bluz lo ley kuu wlipaa nzhab Diox, lee Xgann Diox gak ngwleyy kuu nataak thitanax, tak thitanax nali nak Xgann Diox.