18
Xho jiajb guedx Babilonia
1 Dxejcti bahuiä loj stee xangl Dios ni siädyäjt xhaguibaa. Siädnäni yäḻrnibeduxh, xcäḻrdimbicha'ni bazanij loj guedxliujre.
2 Dxejcti dipduxh gunii anglga, guredxa'ni:
―Abiajb, abiajb guedx Babilonia, agubixhlojni, ṉaj najcni guejdx cadro rbäjz rebeṉdxab, ro'c rcanzaj guiralii cuaa spritdxab, najczani xpitiääz guiraa reman xhaguibaa ni najc mandxab, mandxuudx.
3 Sa'csi guiraa rebeṉ guedxliuj agusojzreni xcuent dojḻ ni bennäjreni gunadxabga, guiraa reṟeii loj guedxliuj bejn dojḻ guläsnäjreni gunadxabga, luxh guiraa rebeṉ guedxliuj ni ruto' abejnreni ganduxh, agujcreni ri'cw xcuent recosdxab ni rujn gunabdxabga.
4 Dxejcti biejn diagä xse' stee nani canii xhaguibaa:
―Coḻguirii guejdxga rexpeṉä, te di näj la'tu gunnäjtu gunadxabga dojḻ, te di tedtu trabawduxh lo replaag xtenni.
5 Sa'csi yuduxh rextojḻni, abidzujṉreni xhaguibaali, luxh abanajza lajz Dios rextojḻni.
6 Coḻgudeed loj gunaaga sigajc ni badeedni lojreni. Coḻquijx loj gunaaga tio'pli huält lo ni bejnni laani. Neṉ co'p cadro badeedni gu' bejṉ (te trabajw ni bateedni bejṉ), lagajc neṉga coḻyejn te ni najc tio'p huält maazru fuert yä gunadxabga, nalajznu tedni trabajw tio'p huält.
7 Lacti gulä'p gunaaga xpala'nni, gubajṉni si'ctis ni rlajzni lo guedxliuj. N̲aj coḻguteed gunaaga trabajw, si'cti mediid ni gulä'pni xpala'nni; si'cti mediidza ni bibalaznäjni mood ni gubajṉni, sigajcza gac-huin lastooni sa'csi bejnni xhigab neṉ lastooni: “Narä sobga'ä ree si'c te reiṉ, te beṉroduxh, dina gacä biuud, niclaza gac-huin lazä.”
8 Ni'cni tejsi dxej siajb yejcni guiraa replaag xten Dios: yäḻgujt, yäḻhuin lajz, näj yäḻrliaan, luxh sejczani lo balguiboo, sa'csi rnibeduxh Dad Dios ni gun xcäḻguxhtisni.
9 Guiraa reṟeii lo guedxliujre ni bennäj gunaadxabga cosguijdx, reni cuansanäjnini, sonduxhreni, siaduxhreni che fiireni gujxh ni carii cadro cayejcni.
10 Zijtru sisiujreni sa'csi rdxejbreni replaag xten gunadxabga, dxejc siniizareni:
―Aii, aii, riaduxhnu guedxrore, Babilonia, guedxdipduxh gujclu, luxh chela gucbeenu, ala bidzujṉ yäḻguxhtis yejclu.
11 Rebejṉ ni ruto' loj guedxliuj sonduxhreni, siareni guejdxga sa'csi rutru rsiidi xhixtenreni ni ruto'reni.
12 Laareni ruto'reni oor, pla't, guiraloj reguisa'c, perl, ladliṉ, ladmuraad, ladseed, näjza guiraloj baräjd yagdoo, näj guiraloj cos saru, ni nacchee läi elefant, näj cos saru ni nacchee bronz, näj guiib, näj márm,
13 näjza caneel, guiraloj laj comiid, näjza yalnejxh, näj perfum, näjza yaal, näjza bin, näjza se't oliib, näjza arinsa'c, näjza triuu, näjza gon, näjza rexiil, näjza cabaii, näjza gare't, näjza bejṉ ni ruto'reni tiejxhreni, xaimreni. Guiraa reni'c ruto'reni.
14 Dxejc guniiza xse' ni canii xhaguibaali, najni:
―Ninexhsa'c ni rlazduxhlu, agunitloj. Guiraa recossa'c, recossaruduxh agubicajreni lojtu, luxh di gacdiru guidxäl bejṉ reni'c.
15 Reni ruto' guiraloj recosga, nani gujcreni ri'cw xcuent guedxroga, zijtru sisiujreni sa'csi rdxejbreni trabajw ni cadeed guejdxga, sonduxhreni, sac-huinduxh lajzreni,
16 säjbreni:
―Aii, aii, riaduxhnu guedxrore, naii gojtni ladsacduxh, guiraa ladliṉ, ladmuraad, ladxniaa, gusucheeni con oor, con guisa'c, con perl,
17 tera'tbäztis baralii recosro ni najc xhixtenni, guxhijṉreni.
Guiraa recapitán xte barcw, näjza guiraa remarineer, näjza rebejṉ ni rij biaj lo rebarcw näjza guiraa reni rujn dzuun lo nisdoo, gusujreni zijt,
18 näjza laareni cahuiireni cayäjs gujxh guejdxga, cabedxa'reni, caniireni:
―¿Xhi stee guejdx najc si'c najc guedxrore, ä?
19 Bachajreni yuyoḻ yejcreni sa'csi rac-huin lajzreni, binduxhreni, guredxa'reni:
―¡Aii! ¡Aii! Riaduxhnu guedxro sa'csi xcuenttis guedxduxhre gujc ri'cwduxh guiraa rebejṉ ni rajp barcw ni rujn dzuun loj nisdoo. Luxh ṉaj tera'tbäzsi aguxhijṉ guedxrore.
20 Guniiza xse' ni yu' xhaguibaa, najni:
―La'tu ni yu' xhaguibaa, la'tu rexpejṉ Dios, reapost xtenni, rebejṉ ni gunii xtidx Dios galoo, coḻbalasduxh sa'csi abiajb guedxrore, abejn Dios yäḻguxhtis xcuent ni bejnni lojtu.
21 Dxejcti te xangl Dios ni rajp yäḻrnibee, guläs te guiro ni najc si'c te guij ni ro't dojb, bacuaanini loj nisdoo, dxejc najni:
―Screeza gac guedxro ni laa Babilonia siajbni lo trabajwduxh, sinitlojni par tejpas, dirutu fii lojni.
22 Diru guibi' jiejn cayeḻ nez xladcaiilu reharp, reflaut, retrompe't; diru guibi' chu tej ni gun xhitis dzuun; diruza guibi' chubej molin ni cayo't.
23 Diru guibi' jieṉ xcäḻrdimbicha' te bajl ni cagusanij; diruza guibi' jiejn xse' bi'n näj dxa'p loj te sa' sa'csi rexpejṉlu ni ruto' gujcreni beṉroduxh lo guedxliuj sa'csi basgueezalu rebeṉ guedxliuj xcuent rextzundxablu.
24 Neṉ guejdxga bidxäjlza xtiejn renani gunii xtidx Dios, näjza xtiejn rexpejṉ Dios, näjza xtiejn guiraa rebeṉ guedxliuj ni bagu'treni.