18
Želgox̱e' Jesús
(Mt. 26:47‑56; Mr. 14:43‑50; Lk. 22:47‑53)
1 Kate' beyóž bchaḻj Jesusen' da' ni, bžoje' ga na', na' benne' wsedle chie' ka' wyéjḻengake' Ḻe' tẕen. Wdíe' yecheḻá'a yego Sedrón, na' bžine' gan de to yežlyó, na' wyó'oḻene' benne' wsedle chie' ka' latjen'.
2 Ḻezka' Judas, bennen' ẕdie' Jesusen', nónbi'e latjen' dan' btob Jesusen' benne' wsedle chie' ka' ga na' zan chi'i.
3 Naž Judas na' bchi'e to kwe' benne' ka' žjake' ḻo wdiḻe, na' benne' ni'a na'gak bx̱oz wnná bia' ka', na' benne' ni'a na'gak benne' yodo' fariseo ka', na' jake' gan zoa Jesusen', zej noe'e yi' yež ka', na' ya ntoche' chégake' ka'.
4 Dan' nnézkzele Jesusen' yógo'te da' žaḻa' gaken chie', bžoje' gan zoe', na' gože' ḻégake':
—¿Noẕ benne' žeyiljle?
5 Beží'igake', na' belyi'e Ḻe':
—Jesús, benne' Nasaret, žeyiljto'-ne'.
Jesusen' gože' ḻégake':
—Nedkzan'.
(Ḻezka' Judas na', bennen' ẕdie' Jesusen' ḻo ná'gake', žónḻene' benne' ka' tẕen.)
6 Kate' Jesusen' gože' ḻégake': “Nedkzan'” naž bebíga'gake', na' wbíx̱gake' ḻo yo.
7 Jesusen' wnnable' ḻégake' da' yoble, na' wnné':
—¿Noẕ benne' žeyiljle?
Belyi'e Ḻe':
—Jesús, benne' Nazaret, žeyiljto'-ne'.
8 Naž bechebe Jesusen', na' wnné':
—Ba goža' ḻe'e, nedkzan'. Cha' žeyiljle neda', le gonn latje yeyejgak benne' ki.
9 Ki wnná Jesusen' nich bžin da' bchaḻje', katen' wnné': “Benne' ki benno' chia', bi bnita' nitóe'.”
10 Naž, dan' nwa' Smon Bedw to ya ntoche', wlejen', na' ḻa' bentie' we' Malko, benne' wen žin che bx̱oz blo, na' bchoge' yid nage' ḻi ža.
11 Naž Jesusen' gože' Bedon':
—Begó'o ya ntoche' chio' ližen. ¿Bi žaḻa' saka'a dan' wnná X̱an' gaken chia'?
Ẕžin Jesús ḻaw bx̱oz blo
(Mt. 26:57‑58; Mr. 14:53‑54; Lk. 22:54)
12 Benne' ka' žjake' ḻo wdiḻe ḻen bennen' ẕchi'e ḻégake', na' benne' ni'a na'gak benne' judío wnná bia' ka', béx̱wgake' Jesusen', na' bchéjgake' Ḻe'.
13 Naž bché'gake' Ḻe' ḻaw Anás, dan' nake' x̱to' ẕi'n Kaifás, bennen' nake' bx̱oz blo yizen'.
14 Kaifás na' nake' bennen' bzejni'ile' benne' judío wnná bia' ka', na' bḻoe'ele' ḻégake' gakže chawe' gat toze benne', na' kege kwia yi' dot yež chégake'.
Ẕnna Bedw bi nónbi'e Jesús
(Mt. 26:69‑70; Mr. 14:66‑68; Lk. 22:55‑57)
15 Smon Bedw ḻen yetó benne' wsedle che Jesusen', jake' x̱kóže'lgak benne' ka' ẕché'gake' Jesusen', na' bejnáwgake' Ḻe'. Benne' wsedle ni wyó'oḻene' Jesusen' ḻa' ḻi'a liž bx̱oz blo, dan' nonbia' bx̱oz blon' ḻe'.
16 Bedon' bga'ne' na'le gan žo'ogak benách ka' ḻa' ḻi'a na'. Che ḻen bežój benne' wsedlen' nonbia' bx̱oz blon' ḻe', na' bcháḻjḻene' no'len' žape chi'e gan žo'ogak benách ka' ḻa' ḻi'a na', na' bene' ga wyó'o Bedon' ga na'.
17 Naž no'len' žape chi'e gan žo'ogak benách ka' ḻa' ḻi'a na' gože' Bedon', na' wnné':
—¿Ḻezka' le' žónḻeno' Bennen' tẕen?
Beží'i Bedon', na' wnné':
—Kege neda'.
18 Dan' žak da' zag, benne' wen žin ka', na' benne' ni'a na'gak benne' yodo' ka', ba bẕéngake' yi', na' zégake' žoa'a yin', na' žeché'l kwíngake'. Ḻezka' Bedon' zéḻene' ḻégake' tẕen, na' žeché'l kwine'.
Bx̱oz blo ẕbeje' Jesús diža'
(Mt. 26:59‑66; Mr. 14:55‑64; Lk. 22:66‑71)
19 Naž bx̱oz blo wleje' Jesusen' diža' nich nnezle' no benne' ka' žónḻengake' Ḻe' tẕen, na' bi da' žsedle Jesusen' benách ka'.
20 Bechebe Jesusen', na' gože' ḻe':
—Kwáselo bcháḻjḻena' yógo'te benách ka'. Bsédtezegekla'-ne' gan nak ḻo yo'o gan ẕdóbgake' nich yéngekle' x̱tiža' Dios, na' ḻezka' ḻo ẕchil yodo', gan ẕdobgak yógo'te benne' judío ka', na' bi be bchaḻja' ngáche'ze.
21 ¿Biẕ chen' ẕbejo' neda' diža'? Wléj diža' benne' ka' béngekle' da' bcháḻjḻengaka'-ne'. Bwia nga, nnézgekle benne' ka' dan' bcháḻjḻengaka'-ne'.
22 Kate' beyóž bchaḻj Jesusen' da' ni, na' to benne' ni'a na'gak benne' yodo' ka', benne' zoe' ga na', wdape'e žoa'a ḻaw Jesusen', na' wnné':
—¿Ki žebi'o ḻaw bx̱oz blon'?
23 Bechebe Jesusen', na' gože' ḻe':
—Cha' bi wnnía' chawe', bḻoe'el biẕ da' wnnía' da' bi naken chawe', na' cha' gok chawe' da' wnnía', ¿biẕ chen' wdapo'o neda'?
24 Naž Anás na' beseḻe'e Jesusen' nžeje', na' bejzégake' Ḻe' ḻaw Kaifás, bennen' nake' bx̱oz blo.
Da' yoble ẕnna Bedw bi nónbi'e Jesús
(Mt. 26:71‑75; Mr. 14:69‑72; Lk. 22:58‑62)
25 Kate' ne ze Bedw žoa'a yi', žeché'l kwine', benne' ka' nníta'gake' ga na' belyi'e ḻe', na' wnnágake':
—¿Ḻezka' le' žónḻeno' Jesusen' tẕen?
Beží'i Bedon', na' wnné':
—Kege neda'.
26 Zoa to benne' wen žin che bx̱oz blo ga na', na' nake' ljež bennen' bchog Bedon' yid nage', na' benne' wen žin ni gože' Bedon':
—Bḻe'ela' le' ḻo yežlyón', žónḻeno' Jesusen' tẕen.
27 Da' yoble beží'i Bedon', na' ḻa' wžéžete leko'.
Ẕché'gake' Jesús ḻaw Pilato
(Mt. 27:1‑2, 11‑14; Mr. 15:1‑5; Lk. 23:1‑5)
28 Naž bché'gake' Jesusen', na' bezá'gake' liž Kaifás, na' bžíngake' yolawe' che benne' wnná bia', dan' nzin' Pretorio. Dan' ba ža'ní' ža na', na' benne' judío ka' bi wyó'ogake' yolawen' dan' žékgekle' bága'gake' ẕia cha' chó'ogake' ga na', da' gonen ga bi gak gáwgake' x̱che' Lni Pasko', lnin' žejsá' ḻáže'gake' kan ben Dios, katen' bebeje' benne' Israel ka' ḻo yežlyó Egipto.
29 Naž bžoj Pilato, benne' wnná bian', na' bḻe'e gan nníta'gake', na' gože' ḻégake':
—¿Biẕ ẕia žesbága'le benne' ni?
30 Beží'igake', na' belyi'e ḻe':
—Chela' bi nbaga' benne' ni ẕia, bi wdeto'-ne' ḻawo'.
31 Naž Pilaton' gože' ḻégake', na' wnné':
—Ḻe'ekze le chi'e, na' le wchi'a ḻaže'e Ḻe' kan ẕnna da' žsédlele ḻe'e.
Benne' judío ka' belyi'e ḻe', na' wnnágake':
—Bi nzi' ḻo na'to' gotto' no benne'.
32 Ka' goken, bžin x̱tiža' Jesusen', da' wnníe' kan gate'.
33 Naž Pilaton' beyoé'e yolawen', na' bḻiže' Jesusen', na' gože' Ḻe':
—¿Nako' le' benne' nna bi'e benne' judío ka'?
34 Bechebe Jesusen', na' gože' ḻe':
—¿Žakze chio' ẕnno' ki, o gožgak benách ka' le' ki naken chia'?
35 Pilaton' gože' Ḻe':
—¿Žeklo' naka' benne' judío? Benne' wláž chio' ka', na' bx̱oz wnná bia' ka', bdégake' Le' ḻo na'a. ¿Biẕkze beno'?
36 Naž bechebe Jesusen', na' gože' ḻe':
—Ẕnna bi'a neda', san kege kan ẕnna bia'gak benách ka' nníta'gake' yežlyó nga. Chela' ẕnna bi'a kan ẕnna bia'gak benách ka', na' tiḻgak benne' ka' žónḻengake' neda' tẕen, nich bi wé'gake' latje no benne' wdíe' neda' ḻo na'gak benne' judío ka'. Kan ẕnna bi'a neda' bi naken kan ẕnna bia'gak benách ka' nníta'gake' yežlyó nga.
37 Naž Pilaton' gože' Ḻe':
—¿Nako' benne' ẕnna bi'e?
Bechebe Jesusen', na' gože' ḻe':
—Naka' kan ẕnno'. Che ḻen golja' yežlyó nga, nich wzóa lia' che da' naken dot da' li. Yógo'te benne' ka', benne' žóngake' da' naken dot da' li, ẕze nággake' da' ẕnnia'.
38 Pilaton' gože' Ḻe':
—¿Biẕen' da' naken dot da' li?
Želchoge' che Jesús gate'
(Mt. 27:15‑31; Mr. 15:6‑20; Lk. 23:13‑25)
Kate' beyóž wnná Pilato ki, bežoje' ga na', na' bḻe'e da' yoble gan zej nnita' benne' judío wnná bia' ka', na' gože' ḻégake':
—Bi be da' ẕia bžeḻ-la' da' nbaga' benne' ni.
39 Ḻe'e de to da' žónteze žonle kate' žak Lni Pasko' ni, ẕnnáblele neda' wsana' ḻo na'le to benne' nyejwe' liž ya. ¿Žénelele wsana' ḻo na'le benne' ẕnna bi'e benne' judío ka'?
40 Naž wžéžeya'agake' zižje yógo'tegake', na' wnnágake':
—Kege benne' ni, san Barrabás wsano'-ne' ḻo na'to'.
Barrabásen' nake' benne' wen da' ẕinnj.