16
Hming a mingkaitu mehdihly
1 Zisu tah a hningzuitu sahlo cawh, “Mehrung pakheh ung ka, hming a mingkaitu pakheh a hnui. Hming a mingkaitu taco mehrungpaw a cho le pe sahlo cawh a longdepaw tah a tua tatah pu a cang.
2 Macawtaco ama cawh mehrungpaw tah y ka, ‘Na kong ka thuipaw heh zekhatamaw a cang? Rai na hrepaw cazing papei, zecawtamaw tatah ka hming mingkaitu cang khy khawh bei ceh,’ a tah.
3 Hming a mingkaitu taco ama le ama cawh, ‘Zemaw ka tua a? Ka buipaw tah ka rai a pa lah pah thah. Alui che pawtah thawzaang hnui tlung be ca neh ka, kih do pawtah ka ning a zeh tlung.
4 A cang caco, zemaw ka tua a tahpaw ka hni myca! Ma hratei ka tua caco, ka rai a chang tihtah cawngsaw tah aa ing letah aa pa tlungsah du a,’ tatah a tah.
5 Maco a buipaw khatei luibah a hnuipaw sahlo khah pakheh cy tah y he ka, a pakhehnah khah, ‘Ka buipaw cawh khazeh maw na bah?’ tatah a hae.
6 ‘Oliv sathy galon pung zareh,’ tatah a palei.
Hming a mingkaitu taco, ‘Na cazing law la, rairang tah a ty la, galon pung zapali tatah cia,’ tatah a ching.
7 Mataico a pahningnah cawh, ‘Nama saw khazeh maw na bah?’ tatah a hae.
‘Changvuh bai thongkheh,’ tatah a palei.
Ma cawngsawpaw zong cawh, ‘Na cazing law la, zareh tatah cia,’ tatah a tah.
8 Ma hming a mingkaitu mehdih lypaw tei singthai tei hming a tuapaw cawh a buipaw tah a pachaw ngetei. A hmang, khazaw cawngsaw heh aaning aa mehnung hui khatei aa cawtah aa tuanah kong leco Khazing a khainah letei a ungpaw cawngsaw navy tah a sing vy he.
9 Ka ca ching he, khazaw cho le pe heh vesaw hnui nápawtah hmang o. Ma hratei naa tua caco, naa cho a chang tihtah chaizaw ing letah naa ung he ceh.
10 Ahohmai a chia pawtei letah zingchui pawtah a ungpaw cawh alaipaw zong letah zingchuipaw cang tei ka, ahohmai a chia pawtei letah zing a chui lypaw cawh alaipaw zong letah zing chui hrah be.
11 Macawtaco, khazaw hnuirungnah letah zingchuipaw naa cang ly caco, rungnah hmuisuipaw letah ahomaw a ca zing he a?
12 Taico, cawngsaw hringpaw hnuicho letah zingchuipaw naa cang ly caco ahomaw naa tei rua pawtah hming a ca pei he a?
13 Aho sae tahmai abui pahning aa rai hre khy be. Pakheh a hua ka, pakheh a do a, a cang ly leh pakheh cung letah zingchuipaw tah ung a ka, pakheh khah ze tah rei a be. Khazing rai kha, tangka rai kha hre pakong khy bei ceh,” tatah a ching he.
14 Tangka a dupaw Farasi sahlo tah ma bia cawh thui he ka, Zisu cawh aa hmo aa miaso.
15 Zisu tah aaning cawh, “Cawngsaw mehmuh letah thai a cangsah he ceh ka, canghrasala naa lungthing cawh Khazing tah a hni. Cawngsaw tah a sungsah ngeteipaw heh Khazing mehmuh leco pasih a chuipaw a cang.
Cawngpahnah chahchipaw
(Mt 11:12-13; 5:31-32; Mk 10:11-12)
16 Moses phungbia le Khazing khuavang bia sahlo cawh baptisma peitu Johan chai tai khah a cang he. Ma cai ri taico Khazing painah raang thawngchawbia cawh rei leimei tah cang ka, ming hlupui cawh ma langpui chunglang khah a chuchei tah a nae he.
17 Khazing phungbia cabu chung letei a chia caipaw, casung tei deipaw tei hmai heh lahly navy co, alui le avai a lypaw hmai heh a neh vy syly a.
18 A nupui mah katei ahringpaw canu a chuipaw cawh a pheipaw a cang. Mah ciapaw canu a chuipaw capaw cawh a pheipaw a cang,” tatah a tah.
Mehrungpaw le Lazaru
19 A rei vypaw cawh, “Mehrungpaw pakheh, saidungpaw paithladih anaipaw a tua katei, ning tating tei a nawng teitah khua a sahpaw a ung.
20 Kih dopaw, a ming Lazaru aa tahpaw, hmawchia tei a pahlong thlangpaw khah a hawkaw letah chia he ka,
21 mehrungpaw a cabuai taitah didang a tlahpaw khah e rua pawtah a du ngetei. Ui sahlo taco a vong he ka, a hmaw khah aa liapah tei.
22 Kih dopaw cawh a thihnah cai a va phah tihtah vaiming tah ama cawh Abraham kae letah aa seikhui. Mehrungpaw zong cawh thi hrah ka, aa phung.
23 Vaisang ngetei tei a ungnah hraihming taikhei, a cung lang cawh a kahui ka, langhlaw pui lekhei Abraham le a kae letei Lazaru khah a hmuh he.
24 Taico Abraham cawh y ka, ‘Ka paw Abraham, ning pa do la, Lazaru khah taw la, a kih dong khah tui letah nong seh la, ka lui a cakaw nápawtah za pa thlah so ky seh, zecawtamaw tatah ma me lehei ka tai tu myca,’ tatah a tah.
25 Canghrasala Abraham taco, ‘Ka sawtei, na hring chung tei hming chawpaw na cypaw vytei khah a thui thlang bei ceh maw? Ma ning lekhei Lazaru taco hmingchahly a cy kho. Canghrasala, atoheh cawh ama cawh ma lehei a hnaw pangang he ka, nama cawh taisai na tai myca.
26 Ma hlui co, na kaa le kaa kaa lehei khobatlung a thuh ngeteipaw ung ka, macawtaco ma taihei nama kha a va sei dupaw sahlo aa va sei khy lypaw hratah ma taikhei kaaning khatah ahohmai va cakang khy hrá bei he,’ tatah a palei.
27 Mataico mehrungpaw taco, ‘Ka ca naw, ka paw! Lazaru khah ka paw ing lang taw la,
28 uny papangaw hnui he neh ka, aaning cawh a raeringnah va pei he seh la, ma tai-ingnah hming lang heh aa va sei ly nápawtah,’ tatah a tah.
29 Abraham taco, ‘Moses le Khazing khuavang sahlo hnui thlang he ka, aaning aa bia cawh nge thlang he seh,’ tatah a palei.
30 Mehrungpaw taco, ‘Cang be, ka paw Abraham, a thi ciapaw tah aaning kha aa va sei caco, aa ngepachih thlang he a,’ tatah a tah.
31 Canghrasala Abraham taco, ‘Moses le Khazing khuavang sahlo aa bia aa nge ly caco, thihnah taitah a thokawpaw aa ung tahmai tah aa bia zong nge hlui a bei he,’ tatah a palei,” tatah Zisu tah a tah.