7
144,000 cakhai a cang he
1 Ma khy taico alui ki kipali letah vaiming papali a daw thlangpaw he khah hmuh he neh ka, aaning taco alui kipali letei thli khah raang letah cang seh, rili letah cang seh, thingkung cung letah cang seh a hrang ly nápaw he takhei aa tlepakhih he.
2 Mataico, Khazing hring cakhai a tlepaw ahringpaw vaiming khah nichualang tah a vongpaw khah ka hmuh. Ama taco alui le rili hanah peh ruapaw tei hmingtuakhynah peh a cangpaw he vaiming papali khah a thangpui tah a y he,
3 “Alui le rili le thingkung sahlo cawh kaa Khazing a sae sahlo aa pangcarih letah cakhai kaa khai hlai taco hanah pei balang khe o,” tatah a tah he.
4 Mataico cakhai a cangpaw sahlo cawh khazeh maw a cang tah cawh ka thui. Israel mingphing vytei taitah 144,000 a cang he.
5 Judah phing taitah 12,000. Reuben phing taitah 12,000. Gad phing taitah 12,000.
6 Asher phing taitah 12,000. Naftali phing taitah 12,000. Manaseh phing taitah 12,000.
7 Simeon phing taitah 12,000. Levi phing taitah 12,000. Isakhar phing taitah 12,000.
8 Zebulun phing taitah 12,000. Josef phing taitah 12,000. Benjamin phing taitah 12,000 a cang he.
Pai rang a buhpaw cawngsaw rungpui
9 Ma khy taico ming neh ka, ka hme letei a ungpaw he cawh buidyching hme le Tuu teitei hme letei a daw thlangpaw he, raangting, citing le phing ting le rei ting taitah a va chuh pawhe reite a cang lypaw cawngsaw rungpui khah ka hmuh he. Pai rang khah a buh he ka, aa kih letah tung ky a tle thlang he.
10 Taico a thangpui tah y he ka,
“Pachahnah cawh buidyching cung letei
a typaw kaa Khazing le
Tuu teitei tei a cang,”
tatah aa tah.
11 Vaiming vytei takhei buidyching le macang sahlo le hminghring sangpali khah a daw cahlung he ka, taico buidyching hme lekhei aa khuh panai tah a bung he ka, Khazing khah aa beh,
12 “Amen!
Reithainah le rungnawnah le
singnah le alawngnah le pasungpanawnah le
hmingtuakhynah le chongnah cawh
kaa Khazing khatah
chaizaw tah chaizaw tai ung ky seh, Amen!”
tatah aa tah.
13 Mataico, macang letei pakheh takhei, “Ma pai rang a buhpaw sahlo heh aho sahlo maw aa cang? Zelang tamaw aa va chua?” tatah a pa hae.
14 “Ka pu, nama tah pui na hni kata,” tatah ka chai.
Mataico ama taco, “Ma tlaw heh cawh taithuinah alaipaw pui ingnah taitei a ka piachuapaw cang he ka, Tuu teitei thisai letah aa pai khah suh he ka, aa pai cawh a raangsah myca he.
15 Macawtaco,
Khazing buidyching hme letah ung he ka,
a behnah ing letah ching kha, zai kha a rai aa hre,
taico buidyching letah a typaw takhei a thlangda khah aa cung letah a pakai pá he a.
16 Aa ngaidi khawh by be,
aa tui hrae khawh by be,
ningsaw tah ry khawh be ca he ka,
sehu sehe tah ung khaw bei he.
17 Zecawtamaw tatah buidyching a lecingcing letei a typaw,
Tuu teitei takhei aaning cawh king he ka, Ama taco aaning cawh hringnah tuihnaw lang khah a hrui he.
Taico Khazing tah aa meh letei aa mehthli vytei cawh a hruhly pá he a,”
tatah a tah.