41
Aints jau Yusen seatin
1 Aints kakaichu tura mianchau ainausha pengker awajinaunka Yuska pengker awajsatnuitai.
Tura nisha wait wajamtaisha,
Yuska angkanmamtikiatnuitai.
2 Tura niincha ejaktinuitai.
Turasha ju nungkanam pujus pengker nintimias pujusti tusa,
pujutan susatnuitai,
tura warastinnasha susatnuitai.
Tura ni nemase ainau niin itit awajsarai tusa surimkatnuitai.
3 Tura najaimiak tepamtaisha,
Yus kakamtikratnuitai.
Tura ataksha tsaarti tusa inankitnuitai.
4 Tura asamtai wikia Apurun chicharkun:
“Apuru wait anentruram wikia aminka umirchamaitiatmek,
ataksha pengker wajasta tusam tsuwaarata” timiajai.
5 Wina nemasur ainau wina pachitsar pasé chichartinawai.
Tura inintrinak:
“¿Warutik jaka mengkakat?” turutinawai.
6 Tura wina jiirsartas wininayat,
pengker nintimsarka wininatsui.
Antsu pasé chichaman antukar chikich aintsnum wayaawar aujmatrinawai.
7 Wina kajertin ainauka iruntrar wina pachitsar chichainak:
“Ningki wiasmamak wait wajawai”,
turutinawai.
8 Tura ataksha chichainak:
“Ni jatairingkia iwianchnumiayaintai.
Ni peakrin jaak tepa auka pengké nantakchatnuitai” tusar aujmatrinawai.
9 Turutinai wina nekas amikruka wikia:
Wina nekas amikruitai tamaitiat,
wijai yuya nuka wina nemasur wajasi.
10 Antsu Apuru ame wait anentrurta,
tura ataksha inantukta.
Ame turakmin wina kajertin ainaun yapaijkiatnuitjai.
11 Tura wina nemasur ainau wina nepetukcharamtaikia,
amin pachisan Yusrun pengker awajnuyajai tusan nekaamnawaitjai.
12 Tura wikia tunaun takatsuk pujau asamtai,
winaka tuke pengker awajtusta.
Tura tuke wijai pujusti tusam waitkata.
13 Apuru ami aintsrum ainauti Yusri asakmin,
yamaisha tura tuke:
Ameketme pengkeram tajame.
Tu ati.