42
Wina nintimauruka Yusetai
1 Yusru japa kitamak entsan eaawa nunisnak amincha eajme.
2 Yusru ameketme pujut sukartinmeka.
Tura asakmin aints kitakjai wait wajak entsan eawa nunisnak amincha eajme.
¿Warutik ataksha ami jeemnisha wayaatnuitja? tu nintimsan pujajai.
3 Tura asan tsawaisha,
tura kashisha yutancha yutsuk juutkun pujajai.
Wi turamtai aints wina inintinak:
¿Yusrumsha pujawak? turutinawai.
4 Tura nuna nintimsan,
nukap wake mesekan pujakun:
Yaanchuikia aints ainau warainak,
Yusen maaketai tiartas ni jeen wearti tusan jeemiajai.
Tura asamtai aints ainau fiestanam weenawa nunisrik Yus seati jeanam wemiaji.
5 ¿Warukanak napchau nintimrataj? ¿Warukanak wake meseknasha pujustaj?
Wikia Yusen nintimsan pujajai.
Tura asan: Ameketme Yusem titatjai.
Ningki wina Yusur asa uwemtikrurtinuitai.
6 Wikia wake mesekan napchau nintimsan pujajai.
Tura asan amincha nukap nintimtusan pujakun,
mura Hermón tutainum tura mura Mizar tutainum Yus pujatsuash,
tura entsa Jordánka nujin
7 túna uutmauri aa nuni Yus pujatsuash,
tu nintimsan pujajai.
Nu entsaka ame najanamiame nuni jakerua nunisnak wikia nekapmamjai.
8 Antsu tsawai wina Apurka ni anengkratairin nekamtikiartawai.
Tura kashisha wina Yusur pujutan sukartinua nuna nintimtusan,
tuke kantan kantamrakun,
nuniasha Yusen seakun pujajai.
9 Turayatun Yusrun chicharkun:
Wina ejarin ayatmesha,
¿warukamtaiya winasha kajinmatrukniume? Wina nemasur ainauka wina itit awajtusaru asaramtai,
¿warukanak timiá wake meseknasha pujustaj?
10 Wina nemasur ainauka wina inatsturartas kintajai metek inintinak:
¿Ami Yusrumsha pujawak? turutinawai.
Tuke turutinau asaramtai,
wina ukunchrusha najamrutinawai.
11 ¿Warukanak napchau nintimrataj? ¿Warukanak wake meseknasha pujustaj?
Wikia Yusen nintimsan pujajai.
Tura asan ameketme Yusem titatjai.
Ningki wina Yusur asa uwemtikrurtinuitai.