2
Taparara tomo, Ritonõpo ẽmepyry poko
1 Rue tõ etotoko ypy Xião po, toto tuarõmatoh etotoko ypy kurã po!
Tykytyky kahtoko enaromỹke oehtohkõke Juta tomo!
Ritonõpo ẽmepyry oehnõko oya xine exiryke.
2 Moro ẽmepyry ikohmamyry sã exĩko mana, koko ehtoh samo,
akurũ xinukutumã sã exĩko mana tapure exikety samo.
Taparara tõ oehnõko mã toto soutatu tõ ikuhpỹme samo jamihme roropa,
akurũ xinukutumã sã ypy tõ po.
Sero panõ exipitopyra nexiase moino ro,
taroino exipyra ropa exĩko roropa mana.
3 Emero enahnõko mã kehko, apoto samo,
apoto nyahkary samo emero enahkaryhtao.
Oehpyra ro toto ahtao tupito kurã sã mana,
Ritonõpo narykahpyry Etẽ samo;
yrome toytose ropa toto ahtao ona tonorẽ sã mana.
Taparara tomo a emero tonahkasẽme exĩko mana!
4 Kawaru tõ sã mã toto,
kawaru tõ osetapaketõ sã tururume ytõko mã toto.
5 Pyhsekyhsekyh ãko mã toto ypy tõ emory po,
panaikato mã toto kahu tõ ao osetapaketõ samo,
apoto po amoriry tõ tonore exiketõ sã roropa.
Soutatu tõ ikuhpỹme exiketõ sã mã toto, atakenaka, etonatohme.
6 Mokaro oepyryhtao, tykytyky ãko imehnõ mana emero porehme,
ẽmytykõ roropa enaromỹke exĩko mana.
7 Osetapãko mã toto soutatu tõ orẽpyra exiketõ samo;
tururume ytõko, apuru tõ pona onuhnõko, ytokehpyra.
Atakenaka ytoytõko topohme
8 imehnõ onypurohmara mã toto,
tosemarykõ ae ytõko mã toto.
Ytoytokehpyra mã toto, typyre ke
onetypohkaposaromepyra imehnõ mana.
9 Xiaxiake tururume ytõko mã toto pata poro.
Apuru tõ pona onuhnõko mã toto tapyi tõ taka.
Osenuhmatoh ae omõnõko mã toto, omato kõ samo.
10 Ytokehpyra mã toto, nono tykytyky ãko mana, kapu roropa,
xixi kohmãnõko mana nuno roropa,
xirikuato tõ roropa zemime hkopyra exĩko mã kehko.
11 Konomeru sã soutatu tõ tyripõko Ritonõpo mana;
ipoetory tõ osetapaketõ ikuhpỹme mã toto,
orẽpyra aomiry omipona exiketõ mana.
Ritonõpo ẽmepyry enaroximatoh imehxo mana,
orekohmato konõto.
Onoky moro eanahtõko nae?
Oorypyrykõ irumekatoko
12 “Naeroro seromaroro,” ãko Ritonõpo Kuesẽkõ mana,
“eramatoko ropa ya yronymyryme,
otuhpyra roropa ehtoko õtururukohtao ya te, oxitatoko te, emynyhmatoko.
13 Oorypyrykõ rumekary se oehtohkõ enetupuhpotoko;
oupõkõ onyxihkara ehtoko,
yrome okurohtao xine oxitatoko oorypyrykõ poko.”
Eramatoko ropa Ritonõpo Kuesẽkomo a.
Kure mana, awãnopyrykõ se pyra roropa mana;
penekehpyra mã ynororo, kypyno xine mana;
axĩ ekurãkãko ropa mana kuãnohpyra xine toehtohme.
14 Otarame Ritonõpo Kuesẽkõ tõsenetupuhtoh myakamãko mana
kure rokẽ typoetory tõ ritohme ropa;
tykyrysã itamurume ahtanohpõko ropa mana.
Mame tonahsẽ ekarõko ropa matose eukuru maro onekarorykõme Ritonõpo a.
15 Rue tõ etotoko ypy Xião po;
ẽmepyry imenekatoko otuhpyra oehtohkõme õtururukõ poko Ritonõpo a,
ahno ikohmatoko oximõme toto ehtohme Tapyi Kurã tao!
16 Ahno emero ikohmatoko oximõme toto ehtohme,
tyyrypyrykõ korokapotohme eya xine.
Tamuhpomãkõ ikohmatoko, toto oehtohme poetohti tõ maro,
enurusenã kõ maro roropa.
Pytasenãkõ ikohmatoko tytapyĩkõ tae toto oehtohme Ritonõpo Tapyĩ taka!
17 Amarokõ roropa, oturuketomo Ritonõpo Tapyĩ zara po erohketomo,
oxitatoko, ynara kahtoko Ritonõpo a:
“Opoetory tõ onuãnohpyra exiko, Ritonõpo!
Yna onyporemãkapopyra exiko imehnõ ahno neneryme,
yna oneunohpyra imehnõ nonory põkõ ehtohme,
ynara kara toto ehtohme: ‘Otoko hnae mokyro, Ritonõpo Oesẽkomo?’ ”
Tynonory kurãkary ropa Ritonõpo a
18 Mame tynonory pyno toexiry tonepose Ritonõpo a, typoetory tõ pyno tonepose roropa mana.
19 Tozuhse toto eya, ynara tykase:
“Seromaroro tykyrysã ekarõko ase oya xine,
tiriiku tõkehko, uwa eukuru te, azeite roropa;
otuhnõko matose, tuesapare exĩko.
Taroino opoihtopopyra xine exĩko ase imehnõ ahno tomo a, jũme.
20 Mya mokaro taparara tõ inikahpoe aehtyã aropõko ropa ase owinoino xine.
Ona tonorẽ pona toto aropõko ase.
Osemazuhme aehtyã tõmasẽme exĩko mã kehko tuna konõto Aorikyhpyry kuaka xixi tũtatoh wino,
mokaro mykapo aehtyã epukãko mã toto tuna konõto Metiteraneu kuaka.
Mokaro taparara ekepyry tõ tymoke exĩko mana, su ãko mã kehko.
Toto enahkapõko ase yjamitunuru ke.
21 “Tupito tomo, enaromyra ehtoko,
atãkyematoko, ynyrihpyry imehxo ehtoh pokoino! Ywy ase Ritonõpo.
22 Onokyro tomo enaromyra ehtoko,
onahpoty ahtãko ropa mana,
wewe tõ eperytãko ropa mã kehko,
fiku tõ tuhke exĩko, uwa tõ tuhke exĩko roropa mã kehko.
23 “Atãkyematoko, Jerusarẽ põkomo,
ywy, Ritonõpo Oesẽkõ, nyrihpyry imehxo ehtoh pokoino.
Konopo ekaroase oya xine zae konopo oehtoh po,
ikonopotatoh po te, eina exisasaka ahtao roropa,
konopo itamurume, osemazuhme ehtopõpyry samo.
24 Kure tiriiku tõkehko apoĩko matose,
uwa eukuru itamurume te, azeite itamurume roropa.
25 Taparara tõ enahkatopõpyry emetakamãko ase,
akurũ konõto sã taparara tõ enehpoase,
soutatu tõ tuhke exiry samo, anarykatyãkõ enahkatohme.
26 Tonahsẽ nae exĩko matose, tuesapare exĩko,
ise pyra oehtohkõ pona.
Ritonõpo Oesẽkõ eahmãko matose,
kure ehtoh tuhke tokarose eya exiryke oya xine.
Mame ypoetory tõ onyporemãkapopyra ropa exĩko mã toto jũme.
27 Mame amaro xine jehtoh waro exĩko matose.
Ywy, Ritonõpo Oesẽkõme jehtoh waro exĩko matose,
imepỹ ritõ pyra mana ipunaka.
Mame ypoetory tõ onyporemãkapopyra ropa exĩko mã toto jũme.”
Ritonõpo Ẽmepyry
28 Ynara tykase Ritonõpo typoetory tomo a:
“Moromeĩpo Juzenu enehpõko ase opona xine, emero porehme: omũkurukõ
Jomiry ekarõko mã toto, oẽxirykõ roropa.
Tamuhpomãkõ osenehnõko mã toto,
nuasemãkõ Ritonõpo nenepotoh enẽko mã toto.
29 Moro toehse ahtao namoto tõ pona roropa Juzenu enehpõko ase,
orutua kõ pona, nohpo tõ pona roropa.
30 Moro ẽmepyry oehtoh enetupuhtohme
osenuruhkapotoh rĩko ase kapu ao, nono po roropa,
munu te, apoto roropa, akurũ tõ orexĩto maro.
31 Xixi kohmãnõko mana,
nuno kamirarame exĩko munu samo,
Ritonõpo ẽmepyry oehpyra ro ahtao,
imehxo ehtopo te, oserehtoh konõto exĩko.”
32 Yrome Ritonõpo a ekaroporyhtao ahno a takorehmatohme, typynanohsẽme exĩko mana. Ynara tykase Ritonõpo exiryke: ahno akoĩpyry ypy Xião po exĩko mã toto, Jerusarẽ po, Ritonõpo nymenekatyã typynanohsẽme exĩko mã toto.