3
Imehnõ nono põkõ apiakãko Ritonõpo mana
1 Ritonõpo Kuesẽkõ ynara ãko:
— Moro ẽmepyry toehse ahtao kure rokẽ Jerusarẽ põkõ rĩko ropa ase, Juta põkõ roropa.
2 Mame imeimehnõ nonory põkõ emero oximõme enehpõko ase toto arotohme jakanahmã Josapa pona, toto apiakatohme. Moro rĩko ase popyra Izyraeu tõ ritopõpyry pokoino eya xine, ynymenekatyã ypoetoryme: sapararahme Izyraeu tõ taropose eya xine imeimehnõ nonory pona, mame ynonory tapiakase eya xine tynonorykõme.
3 Imenekatoh tomase eya xine tynamoto tõme ypoetory tõ apiakatohme; poetohti tokamose eya xine imehnõ namotome toto ehtohme. Mame moro tineru tonahkase eya xine nohpo tõ poko, eukuru jehnahpyry poko roropa.
4 — Oty se hmatou ya, Tiro põkomo, Xitõ põkõ roropa, Pirixitea põkõ roropa? Jepehmary kuhnõko matou ynyrihpyry poko oya xihne? Popyra ehtoh riryhtao oya xine ynyrihpyry emetakame, axĩ onyrihpyrykõ emetakamãko ase roropa!
5 Ykyryry kurano parata tapoise oya xine, uuru roropa arotohme oneponãmarykõ eahmatoh taka.
6 Juta tõ tarose oya xine, Jerusarẽ põkõ maro, mya toto esarykõ poe, toto ekarotohme Kerexia tõ namotome toto ehtohme.
7 Ypoetory tõ enehnõko ropa ase moino, imeimehnõ nonory poe; morotona taropose toto oya xine. Mame oritorỹko ase onyrihpyrykõ saaro.
8 Opoenõ ekamopõko ase Juta tõ namotome toto ehtohme; mame toto ekamõko roropa mã toto sapeu tomo a moe nono pona toto arotohme. Ywy ase Ritonõpo, oturuno.
9 — Imeimehnõ nonory põkõ zurutoko:
“Atakimatoko etonatohme;
soutatu tõ ikohmatoko;
toto enehpoko oximõme, oximaro toytotohkõme.
10 Tupito poko erohtoh tonõ kehko anyhtanohpoko etonatoh kyryryme:
tapema tomo, warata tõkehko.
Ah jamihme pyra exiketõ: ‘Jamihme ase,’ nykã toto.
11 Axĩ ke osehtoko,
imeimehnõ nono põkõ emero,
oximõtohme jakanahmã pona.
“Ritonõpo, opoetory soutatu tõ jamihmãkõ enehpoko etonatohme!” ãko.
12 “Imeimehnõ nonory põkõ emero,
akimatoko ooehtohkõme jakanahmã Josapa pona.
Moroto ywy, Ritonõpo, ahno tõ emero moro zomye exiketõ apiakãko ase.
13 Mokaro ahno tõ iirypyrymehxo mã toto,
naeroro tysahsahkasẽme exĩko mã toto
tiriiku toehse exikety samo,
isahkatoh po toehse ahtao;
tytũtũmasẽme exĩko mã toto uwa tõ tũtũmary sã eukuru ritoh ao,
uwa eukuru ekuãtoh pona.”
14 Tuhkãkõ maro tuhkãkõ
moroto mã toto Jakanahmã Atapiakatoh po.
Morotona Ritonõpo ẽmepyry oehsasaka mana.
15 Xixi kohmãnõko mana, nuno roropa,
xirikuato tõ zemime hkopyra exĩko mã kehko.
Kure rokẽ typoetory tõ rĩko Ritonõpo mana
16 Ypy Xião poe opore Ritonõpo oturũko mana,
aomiry konomeru sã mana Jerusarẽ poe;
nono tykytyky ãko, kapu roropa!
Yrome typoetory Izyraeu tõ ewomãko mana.
17 Ynara ãko Ritonõpo typoetory tomo a:
“Izyraeu tomo, zuaro exĩko matose:
ywy, Ritonõpo Oesẽkõme ase.
Jesary Xião ypy kurã po.
Jerusarẽ ypatary kurãme exĩko roropa mana;
moro pata jũme onyporemãkara ropa imehnõ exĩko mana.
18 Morarame moro toehse ahtao emory mã tõ pehme exĩko mã kehko uwa zoko ke,
onahpoty enahnõko pui tõ mana ypy tõ po,
tuna itamurume iporiry tõ ao exĩko Juta tõ nonory po.
Ytapyĩ tae tuna tũtãko mana,
jakanahmã Akaxia ehxikatohme.
19 Ejitu turumekasẽme exĩko, ona tonorẽ samo,
Etõ patãpome exĩko
Juta nonory typoremãkase eya xine exiryke,
ahno kurã totapase roropa eya xine exiryke.
20-21 Mokaro mỹpõko ase,
toto etapahpõkõ wãnohnõko ase.
Yrome Juta nonory po ahno jũme exikehpyra exĩko mana,
Jerusarẽ po roropa, jũme pata typõke exĩko mana.
Ywy, Ritonõpo, moroto exĩko ase, ypy Xião po.”