☰ Dong 5
5
Nim nane shiishaiduii
1  + Biang shii hanyie dug pha jia airo phazoi wad shii nim ne um pha doh; jine nyimanyi ithuathek zey pha ji re-è chaig srane chebthek miley rog shii nab rek ne ruii. 2 Chiih-è gu è hamangkhliie riichaiboh jia doh, hanyie ne ziak ne yao, “Hanyie ne nabthek shii chui ne nim pha ji shii hong mua spho lei?” 3 Jishii hamangkhung hà dinne sohnyiak dinne sohjambling pha bucho hà ne* hanyie nim shii hong ne iliing riig mua spho jia de oi ro. 4 Gu ne khiwegkho ne chomage nyieliieshii nim pha ji shii hong ne iliing hà riig mua spho hanyie jia shii de adoh ro. 5  + Chiihphado dukhothek pha è jia yi gu shii yao, “Acho rabo. Riig bo! Judah pha jad pha Bargi, Dawid ro boh riing, è ne yang pha ji shii muajong ro, chiih-è ai ne miley nabthek shii chui ne nim shii hong mua ruii phro.”
6  + Chiihphado Isieng miseypho nane dukhothek wi è shan pha biang duchoi shii shiishaiduii yi riu gu è doh. Shiishaiduii ne ua muii pha duiine doh. Aishii iriangthek miley nane imieg miley um, nyie jine Hamangkhung-aphuii ro miley ragungthek ro nyie jine zab pha sohnyiak hà thojong pha ji ro. 7 Shiishaiduii wuii srane hanyie yi biang shii dug pha jia airo phazoi wad re-è nim pha ji yiemuii. 8  + Ai è rek shii, isieng miseypho wi nane ichiignawi dukhothek ne shiishaiduii ibi shii lakhiung niing. Zab shii ben nane san pha shiikhiiakhjamthek shii bisi chab srane, nyie jine Hamangkhung-aphuii ro branthek misiathek ro. 9  + Ithek ne iwo ibai bai:
“Nane nim shii yie ne nabthek shii hong mua spho ro.
Chiih-è na shii ne uamuii,
chiih-è naro iy pha khlem re-è zab pha iiriing, nyuakthek
zab pha branthek shii chiih-è jad shii ne Hamangkhung-aphuii pha pheg phi ro.
10  + Nane gathek ro Hamangkhung-aphuii ro blia rek pha ithek shii sajathua phabithek pha rabjong ro.
Chiih-è ithek ne sohnyiak shii bokhoh ruii phro.”
11  + Din ne gu è riig, chiih-è gu è hamangkhliiethek shii yoi, ithek ne atham mua pha um ro! ithek ne biang shii isieng miseypho, chiih-è dukhothek shan ne riu, 12 chiih-è goh gang re-è bai:
“shiishaiduii hanyie shii ua muii pha ji shii ne blu, nuruii, khani nane chuh,
ilab, biisiie, chiih-è chiong mua spho ro!”
13 Chiih-è hamangkhung pha zab zen, sohnyiak lakhung, sohjambling pha bucho, chiih-è khamuii hà—hamangnyiak pha zab shii chai um pha—thek ne bai ramuii pha jine gu è yoi:
“Hanyie biang shii dug pha aishii chiih-è shiishaiduii shii ne,
chiong nane ilab, biisiie ne idang
nane idang pha ro!”
14 Isieng ibeymuthung wi è chang, “Amen!” Chiih-è dukhothek lakhiung niing srane misiasia.
+ 5:1 5:1: Ezkh 2:9,10; Aij 29:11 * 5:3 5:3: Sohjambling pha luii hà: Bi-iy ro sohjambling (riig 1:18) + 5:5 5:5: Igo 49:9; Aij 11:1-10 + 5:6 5:6: Aij 53:7; Zekh 4:10 + 5:8 5:8: Chng 141:2 + 5:9 5:9: Chng 33:3; 98:1; Aij 42:10 + 5:10 5:10: Mul 19:6; Dng 1:6 + 5:11 5:11: Dan 7:10
☰