Tai Dam Ê‑ꞌphê‑ꞌsô 1

Baư sư ꞌtan Pôn tẻm pay ha ꞌpi ꞌnọng

nẳng ꞌmướng Ê‑ꞌphê‑ꞌsô

1 Khỏi ꞌchư Pôn, ꞌtoi chaư Chảu Pua ꞌPhạ hảư khỏi pên ꞌlam ꞌchạư páo kháo Chảu ꞌGiê‑ꞌsu ꞌKha‑ꞌlịt, ꞌmí sư ꞌmá ha ꞌpi ꞌnọng pên dên ꞌpay Chảu Pua ꞌPhạ nẳng ꞌmướng Ê‑ꞌphê‑ꞌsô, ꞌpi ꞌnọng dú cuông ꞌhôm ꞌngáu mẳn chaư tó Chảu ꞌGiê‑ꞌsu ꞌKha‑ꞌlịt. 2 Khỏi đé so Chảu Pua ꞌPhạ phủ pên ꞌPo ꞌsúm ꞌháu cắp ꞌGiê‑ꞌsu ꞌKha‑ꞌlịt Chảu Chom ꞌháu ꞌnặn phớng ꞌdứa hảư ꞌpi ꞌnọng đảy công ꞌphún, dú súc sáng bang#chaư.

ꞌNéo đi phái ꞌminh khuôn ꞌmá té ꞌtếng ꞌphạ

3 So sỏng ꞌnhó Chảu Pua ꞌPhạ phủ pên ꞌPo ꞌGiê‑ꞌsu ꞌKha‑ꞌlịt Chảu Chom ꞌsúm#ꞌháu. ꞌDọn ꞌsúm ꞌháu đảy dú cuông ꞌhôm ꞌngáu Chảu ꞌKha‑ꞌlịt, Chảu Pua ꞌPhạ chắng phớng ꞌdứa ꞌchu ꞌnéo đi phái ꞌminh khuôn cá ꞌtếng ꞌphạ hảư ꞌsúm#ꞌháu. 4 Cón Chảu Pua ꞌPhạ báu#ꞌhế có sảng phén đin ꞌmướng ꞌlum ꞌcọ đảy ꞌlưạk au ꞌsúm ꞌháu pên ꞌcốn ꞌTan chảu dú cuông ꞌhôm ꞌngáu Chảu ꞌKha‑ꞌlịt, ꞌháu chắng đảy pên ꞌcốn ꞌpẹk saư khong ꞌTan chảu báu#ꞌmí ꞌluống#chê. 5 Chảu Pua ꞌPhạ ꞌhặc ꞌpéng téng ꞌsúm ꞌháu ꞌvạy cón ꞌlẹo#ꞌva ꞌchí đảy pên ꞌlụk ꞌTan chảu ꞌdọn Chảu ꞌGiê‑ꞌsu ꞌKha‑ꞌlịt, ꞌtoi chaư ꞌmặc ꞌTan#chảu. 6 ꞌSướng ꞌnặn hảư sỏng ꞌnhó công ꞌphún ăn ꞌhung ꞌhướng ꞌTan#chảu, đảy ꞌmí chaư quảng phớng ꞌdứa ꞌsúm ꞌháu dú cuông ꞌhôm ꞌngáu Chảu ꞌGiê‑ꞌsu phủ pên ꞌLụk ꞌhặc ꞌLụk ꞌpéng khong ꞌTan#chảu. 7 Chảu ꞌGiê‑ꞌsu đảy tai tháy au báp ꞌsội ꞌháu ꞌdọn ꞌlượt ꞌTan chảu lay#ók, Chảu Pua ꞌPhạ ꞌcọ dáng ꞌdóm ꞌchu ꞌviạk phít hảư ꞌháu ꞌtoi công ꞌphún nháư luông ꞌTan#chảu. 8 Chảu Pua ꞌPhạ ꞌhụ lắc ꞌchu#ꞌnéo, chắng phớng ꞌdứa công ꞌphún hảư ꞌháu lưa ꞌlộn ꞌnặn#lo.

9 Chảu Pua ꞌPhạ sôm chaư hảư ꞌháu ꞌhụ chẻng nả ꞌviạk ꞌlặp ꞌlợc ꞌtoi chaư ꞌmặc ꞌTan#chảu, ꞌviạk ꞌTan chảu đảy téng ꞌvạy hảư Chảu ꞌGiê‑ꞌsu ꞌKha‑ꞌlịt. 10 ꞌMưa ꞌhọt ꞌchớ chao ꞌhẹn#ꞌlẹo, ꞌviạk ꞌTan chảu téng ꞌvạy ꞌnặn hák ꞌchí hên#ók, ꞌsướng ꞌTan chảu ꞌchí ꞌhốm au ꞌchu sính ꞌchu ꞌnéo dú nẳng ꞌmướng ꞌphạ ꞌmướng ꞌlum hảư Chảu ꞌKha‑ꞌlịt téng đa ꞌtếng#cá#mết.

11 Chảu Pua ꞌPhạ ꞌdệt ꞌchu ꞌnéo ꞌtoi chaư ꞌTan#chảu, chắng đảy téng ꞌháu ꞌvạy#cón ꞌtoi nả ꞌviạk ꞌTan chảu ngắm ꞌvạy, ꞌlẹo ꞌTan chảu chắng đảy ꞌlưạk au ꞌháu ꞌmá pên dên ꞌpay ꞌTan chảu dú cuông ꞌhôm ꞌngáu Chảu ꞌKha‑ꞌlịt. 12 ꞌSướng ꞌnặn ꞌsúm khỏi ꞌcốn ꞌDiu phủ ꞌpơng inh Chảu ꞌKha‑ꞌlịt cón chắng ꞌpá hảư ꞌchu ꞌcốn ꞌhụ sỏng ꞌnhó ꞌchư siêng ꞌhung ꞌhướng Chảu Pua#ꞌPhạ. 13 ꞌLẹo ꞌpi ꞌnọng ꞌcốn táng ꞌphắn ꞌcọ đảy ꞌphắng ꞌquám bók son ꞌluống ꞌtáng ꞌmen#ꞌtẹ, ꞌsướng kháo ꞌhung saư ꞌviạk đảy khói sia báp#ꞌsội, ꞌmá khảu ꞌhuôm ꞌhôm ꞌngáu Chảu ꞌKha‑ꞌlịt. ꞌMưa ꞌpi ꞌnọng ꞌchưa Chảu ꞌKha‑ꞌlịt ꞌlẹo, Chảu Pua ꞌPhạ ꞌcọ sống Chảu Khuôn Saư ꞌmá mai au ꞌpi ꞌnọng ꞌtoi ꞌquám chao#ꞌhẹn. 14 Chảu Khuôn Saư nhẳn pao hảư ꞌháu đảy ꞌnéo đi quí#ꞌpéng, ꞌhọt ꞌchớ đaư Chảu Pua ꞌPhạ tháy au ꞌháu pên ꞌcốn ꞌTan chảu hảư đảy ók khói sia báp#ꞌsội. ꞌSướng ꞌnặn ꞌpưa hảư ꞌchu ꞌcốn ꞌhụ sỏng ꞌnhó ꞌchư siêng ꞌhung ꞌhướng ꞌTan#chảu.

ꞌQuám ꞌtan Pôn đé so Chảu Pua ꞌPhạ ꞌpưa phủ ꞌchưa

15 ꞌPưa khỏi đảy ꞌnghín ꞌva ꞌpi ꞌnọng pông chaư ꞌchưa Chảu ꞌGiê‑ꞌsu, ꞌlẹo ꞌcọ ꞌhụ ꞌhặc dên ꞌpay Chảu Pua ꞌPhạ ꞌchu#ꞌcốn, 16 ꞌsướng ꞌnặn khỏi chắng ꞌlớng đảy ꞌdọn Chảu Pua ꞌPhạ ꞌpưa ꞌpi#ꞌnọng, ꞌchớ đé so ꞌTan chảu khỏi ꞌcọ ꞌvạu ꞌhọt ꞌpi#ꞌnọng. 17 Khỏi đé so Chảu Pua ꞌPhạ phủ ꞌhung ꞌhướng pên ꞌPo ꞌGiê‑ꞌsu ꞌKha‑ꞌlịt Chảu Chom ꞌsúm#ꞌháu, đé so ꞌTan chảu hảư chaư ꞌpi ꞌnọng ꞌhụ lắc hên chẻng ꞌviạk ꞌTan#chảu. 18 Khỏi đé so Chảu Pua ꞌPhạ hảư chaư ꞌpi ꞌnọng ꞌhụ chẻng#khửn, ꞌpưa ꞌpi ꞌnọng ꞌchí ꞌhụ#ꞌva, ꞌTan chảu ꞌhiạk au ꞌsúm ꞌháu ꞌmá ꞌnặn ꞌpưa ꞌchí đảy ꞌnéo mong ꞌcóng#thả, ꞌsướng ꞌnéo đi quí ꞌpéng ꞌhung ꞌhướng nháư luông khong ꞌTan chảu ꞌvạy hảư phủ pên dên#ꞌpay, 19 ꞌlẹo phép ꞌhéng kheng cả nháư luông ꞌTan chảu ꞌmá tủm ꞌpúa ꞌsúm ꞌháu phủ#ꞌchưa. Phép ꞌhéng kheng cả dú nẳng ꞌsúm ꞌháu ꞌnặn pên ꞌsướng điêu phép nháư ꞌTan chảu#ꞌdệt, 20 ꞌsướng ꞌTan chảu đảy au Chảu ꞌKha‑ꞌlịt tai ꞌlẹo ꞌcứn ꞌhéng#ꞌmá, ꞌlẹo hảư khửn ꞌnăng ꞌhiếng sảng ꞌphượng khoa ꞌTan chảu dú cá ꞌmướng#ꞌphạ. 21 Chảu ꞌKha‑ꞌlịt téng đa pên nháư ꞌsứa#mết, ꞌtếng#cá tiên ꞌchạư phủ téng#đa, phủ ꞌmí chức ꞌmí#ꞌquiến, tiên ꞌchạư phủ ꞌmí phép ꞌhéng kheng#cả, phủ pên chảu pên#chom. Phủ đaư ꞌmí#chức, ꞌTan chảu ꞌcọ pên nháư ꞌsứa#mết, báu#sút ꞌto ꞌchua ꞌlới pang#ꞌnị, ꞌpái nả ꞌcọ ꞌsướng#điêu. 22 Chảu Pua ꞌPhạ hảư ꞌchu sính ꞌchu ꞌnéo dú cỏng ꞌquiến Chảu ꞌKha‑ꞌlịt, téng hảư Chảu ꞌKha‑ꞌlịt pên cốc ꞌchu ꞌnéo ꞌpưa mốt ꞌsúm#ꞌhốm. 23 Mốt ꞌsúm ꞌhốm pên ꞌsướng ꞌmo ꞌkính Chảu ꞌKha‑ꞌlịt, ꞌmí Chảu ꞌKha‑ꞌlịt mốt ꞌsúm ꞌhốm chắng đảy ꞌtục ꞌpó no#ꞌpọm. Chảu ꞌKha‑ꞌlịt ꞌmí phép ꞌquiến dú ꞌtếng ꞌchu ꞌnéo ꞌchu bón ꞌchu#ꞌti.