Tai Dam 1 Ti‑ꞌmô‑ꞌthiêu 4

ꞌChự hiêm phủ bók son ꞌluống phít

1 Chảu Khuôn Saư hảư ꞌhụ chẻng#ꞌva, ꞌpái nả ꞌchí ꞌmí ꞌsán ꞌcốn ꞌváng sia ꞌluống ꞌtáng ꞌchưa Chảu ꞌGiê‑ꞌsu, tốc báng ꞌlứa ꞌquám bók son tô phi#ꞌhại. 2 ꞌQuám bók son ꞌnặn ók ꞌmá nẳng sốp ꞌcốn nả ꞌsư chaư ꞌcột ꞌvạu#bẻo, lỏ#pên phủ báu#ꞌhụ phít ꞌhụ#ꞌmen. 3 Sau bók#ꞌva, hảm báu#hảư sú căn pên phua#ꞌmía, ꞌcắm ꞌchương kin ăn ꞌnéo Chảu Pua ꞌPhạ sảng khửn ꞌvạy hảư ꞌpứng phủ ꞌchưa kéng ꞌhụ ꞌluống ꞌtáng ꞌmen ꞌtẹ#kin, ꞌchớ kin ꞌhụ đảy ꞌdọn ꞌTan#chảu. 4 ꞌChu ăn ꞌchu ꞌnéo Chảu Pua ꞌPhạ đảy sảng pên khong đi#mết, báu#ꞌchọ ꞌcắm ăn đaư, ꞌva ꞌháu đảy ꞌdọn ꞌTan chảu ꞌlẹo tó ꞌhéng#kin, 5 ꞌpưa ꞌdọn ꞌquám Chảu Pua ꞌPhạ kéng ꞌquám đé#so, ꞌpứng ꞌchương ꞌnặn đảy ꞌpẹk#saư. 6 ꞌLụk au ꞌquám ꞌnị bók son ꞌpi ꞌnọng dú ꞌtáng#ꞌnặn, ꞌlụk ꞌchí pên phủ ꞌchoi ꞌviạk Chảu ꞌGiê‑ꞌsu ꞌKha‑ꞌlịt ꞌnéo#đi. ꞌViạk ꞌchưa Chảu ꞌGiê‑ꞌsu kéng ꞌquám bók son ꞌnéo đi ꞌnéo ꞌmen ꞌsướng ꞌlụk đảy ꞌtoi ꞌnặn ꞌcọ ꞌchí ꞌchoi hảư ꞌlụk mẳn chaư ꞌchưa tứm khửn#máư.

ꞌTợp ép au ꞌluống kin dú nể dăm Chảu Pua ꞌPhạ

7 ꞌNhá ꞌphắng ꞌquám báu#ꞌlạ báu#đai, báu#ꞌtứ săng Chảu Pua#ꞌPhạ. Hảư ꞌtợp ép au ꞌluống kin dú nể dăm ꞌTan#chảu. 8 Đải#khái, ꞌtợp ꞌmo ꞌkính ꞌmí lởi ꞌnọi ꞌnưng#thôi. ꞌVa ꞌtợp ꞌluống kin dú nể dăm Chảu Pua ꞌPhạ lỏ#ꞌmí lởi ꞌchu#ꞌnéo, ꞌpưa ꞌmí ꞌquám nhẳn pao hảư ꞌchua ꞌlới pang ꞌnị ꞌtếng#cá ꞌchua ꞌlới ꞌpái#nả. 9 ꞌQuám ꞌvạu ꞌmá ꞌnị ꞌmen ꞌtẹ đáng#ꞌchưa, ꞌchu ꞌcốn ꞌchọ nhẳn#au. 10 ꞌPưa ꞌsướng ꞌnặn ꞌháu chắng khổ ꞌmo khó chaư tó nả#ꞌviạk Chảu ꞌGiê‑ꞌsu, ꞌpưa#ꞌva ꞌháu ꞌpơng inh Chảu Pua ꞌPhạ phủ ꞌmí ꞌlới#dú, pên phủ hảư ꞌcốn ꞌtếng#cá ók khói sia báp#ꞌsội, cón mết lỏ#ꞌpứng phủ ꞌchưa Chảu ꞌGiê‑ꞌsu. 11 Hảư tít tơn bók son ꞌpứng nả ꞌviạk#ꞌnị.

Pên ꞌngươn ꞌhói hảư ꞌpứng phủ ꞌchưa Chảu ꞌGiê‑ꞌsu

12 ꞌNhá hảư phủ đaư đu ꞌngai ꞌlụk ꞌpưa ꞌnhắng#nóm. Hảư ꞌlụk pên ꞌngươn ꞌhói hảư ꞌpứng phủ ꞌchưa Chảu ꞌGiê‑ꞌsu ꞌtoi ꞌquám pák#ꞌvạu, hảư ꞌmí nết ꞌmí#ꞌtái, ꞌhụ ꞌhặc#ꞌpéng, ꞌmí chaư#ꞌchưa, ꞌluống kin dú ꞌpẹk#saư. 13 Cuông ꞌchớ thả ꞌpo ꞌmá#ꞌhọt, ꞌlụk sắc mắn đu ꞌpặp ꞌchiến ꞌquám Chảu Pua#ꞌPhạ, tít tơn bók son hảư ꞌsúm ꞌhốm#ꞌphắng. 14 ꞌNhá ꞌlứm sia công ꞌphún phớng ꞌdứa hảư ꞌlụk ꞌdọn ꞌquám ꞌlam páo Chảu Pua ꞌPhạ đảy#páo, ꞌmưa ꞌchớ mốt thảu ké đảy pông ꞌmứ sáư#ꞌlụk.

15 Hảư lắm ꞌlé au chaư sáư ꞌkhớng ꞌpứng nả ꞌviạk ꞌvạu ꞌmá#ꞌnị, ꞌpưa hảư ꞌcốn ꞌtếng lai hên ꞌlụk ꞌhụ tứm#khửn. 16 Hảư hiêm ꞌluống kin dú kéng ꞌquám ꞌlụk bók#son. Hảư mẳn chaư ꞌchu ꞌnéo ꞌtoi ꞌluống ꞌtáng#ꞌnặn, ꞌpưa ꞌdệt ꞌnéo ꞌnặn ꞌlụk ꞌtếng#cá phủ ꞌphắng ꞌlụk ꞌchí đảy ók khói sia báp#ꞌsội.