74
Ɩsɔ yɑɑʋ kɛ ɩsɔtəsɛɛlɛ ncɑɑlɛ tɑɑ
1 Asɑfɩ yontu nti tə wɛ yonyoolɑɑ
nyʋɣʋ tʋ yontunɑɑ tɑɑ tɔɣɔlɔ.
Hɑɩ, Ɩsɔ, pepe tɔɔ kɛ́ n lɔɔkɩ-tʋɣʋ tɑm tɔɔ?
Nɑ n mʋɣɩ pɑ́ɑ́nɑ́ nɑ nyɑ́ yəlɑɑ tɑ?
2 Tɔɔsɩ nyɑ́ yəlɑɑ mpɑ n hikɑ too lɔŋtɑɑ
nɑ ń yɑ-wɛ sɩ pɑ́ pəsɩ nyɑ́ kpəntɛ tɔ pɑ tɔɔ.
Tɔɔsɩ Siyɔŋ pʋɣʋ ŋku kʋ tɔɔ n lɑpɑ nyɑ́ tɛ tɔ kʋ tɔm.
3 Kɔɔ nɑ ń nɑ́ lonɑ ɑnɩ,
pə wɑkələɣɩ-yɛɣɛ tɑm kɛ́.
Kolontu wɑkəlɑ nyɑ́ təyɑɣɑ tɑɑ.
4 Nyɑ́ kolontunɑɑ kiisiɣinɑ ntɛɣɛ timpi n sulɑɣɑ-tʋ tɔ,
hɑlənɑ pɑ́ tʋ pɑ kʋyʋsʋm.
5 Pɑ́ nɑ pɑ lɑwɑ kɛ́ nɑ pɑ loŋ
ɩsɩɩ tɑɑsɩ sɛtəlɑɑ kɛ hɔtʋɣʋ tɑɑ.
6 Nɑ pɑ́ fɑkɩ lɛɛsəŋ nɑ pɑ́ yɔkəɣɩ lɛləŋ.
7 Pɑ tʋ kɔkɔ kɛ nyɑ́ təsɛɛlɛ
nɑ pɑ́ yɔkɩ nɑ pɑ́ wɑkəlɩ timpi nyɑ́ hətɛ wɛɛ tɔ.
8 Nti pɑ mɑkɩ pɑ lɑŋɑ tɑɑ tɔɣɔlɛ sɩ,
pɑ́ wɑkəlɩ-tʋɣʋ tɔm kʋlʋm tɔɔ.
Pɑɑ wɔ kɔkɔ kɛ lonɑ nnɑ ɑ tɑɑ
Ɩsɔ nɑ yəlɑɑ pɑ suliɣi tɔ.
9 Tɩɩ tɑsəɣɩ nɑʋ kɛ mpi pə hʋləɣɩ sɩ Ɩsɔ wɛɛ tɔ.
Ɩsɔ kʋyɔɣɔtʋtʋ tɛləsəlɑɑ nɑ́ fɛɩ tɔtɔ.
Tɑ tɑɑ nɔɣɔlʋ tɑ nyɩ ɩsənɑ pɩɩ tɑɑŋɩ tɔ.
10 Hɑɩ, Ɩsɔ Tɑcɑɑ,
pəlee kɛ́ kolontunɑɑ kɑ́ hɛɛsɩ nyɑ́ hətɛ kʋtʋɣʋ?
Pəlee kɛ́ pɑɑ hɛɛsɩ-tɛɣɛ footuɣu?
11 Pepe tɔɔ kɛ́ n sumɑ,
nɑ nn sɑŋ nyɑ́ niŋ ntɔɣɔŋ kʋsʋɣʋ sɩ n mɑ?
12 Hɑɩ, Ɩsɔ, nyɑɣɑlɛ mɑ wulɑʋ kɛ too lɔŋtɑɑ,
nyɑ́ wɑɑsəɣənɑ tɛtʋ tɑɑ.
13 Nyɑ́ toŋ kɛ n fɑɣɑnɑ teŋku
nɑ ń yɔkɩ lʋm tɛɛ tʋmɑɑ sɔsɑɑ nyɔɔŋ.
14 N yɔkɑ tʋm sɔsɔ Lefiyɑtɑŋ nyʋɣʋ nɑ ń pɛtɩ-ɩ
wʋlɑɣɑ tɛtʋ tɑɑ yəlɑɑ sɩ pɑ́ tɔɣɔ.
15 Nyɑ́ hulinɑ lʋm sɛɛlɑɑ nɑ ń hɛɛ lɔɔŋ
nɑ ń yele nɑ pusi nsi sɩɩ nyɔɔkɩ tɔ sɩ lʋm nyɔɔ.
16 Nyɑɣɑlɛ ilim tɑɑ nɑ ɑhoo pə tʋ.
Nyɑ́ lɑpənɑ ilim nɑ ɩsɔtʋ.
17 Nyɑ́ sɩɩnɑ tɛtʋ toosi tənɑ
nɑ ń lɑ́ wɑtʋ wɑɑtʋ nɑ yolumɑ.
18 Tɑcɑɑ tɔɔsɩ sɩ kolontu kʋləɣɩ nyɑ́ tɔɔ,
yəlɑɑ kʋmɛlɛməŋ ɩnɩ ɩ woŋəɣɩ-ŋ.
19 Tɑɑ pɛtɩ nyɑ́ yəlɑɑ kʋpɑmɑ weesiŋ kɛ tɑɑlɛ wontu.
Tɑɑ sɔɔ nyɑ́ kʋnyɔntʋnɑɑ tɔɔ kɛ́ tɑm tɔɔ.
20 Tɔɔsɩ nyɑ́ nɔɣɔ pɛɛlʋɣʋ tɔɔ.
Mpi tɔ, mʋsʋŋ nyəmnɑɑ sunɑ ɩcɑtɛ səkpɛtəŋ tɑɑ.
21 Tɑɑ yele nɑ mpɑ pɑ ɩsɛ pɑ tɔkɩ tɔ pɑ́ tɛɛnɑ lɑŋwɑkəllɛ.
Amɑ kʋnyɔntʋnɑɑ nɑ wɑhɑlɑ nyə́mɑ ɩ́ sɑŋɩ-ŋ.
22 Hɑɩ, Ɩsɔ, tɔɔsɩ nɑ ń pɑɑsənɑ kʋtʋɣʋ ŋku
kʋmɛlɛməŋ ɩnɩ ɩ tʋʋkɩ-ŋ pɑɑ kʋyɑkʋ ŋku tɔ.
23 Tɑɑ sɔɔ nyɑ́ kolontunɑɑ wulɑ tɔɔ,
nɑ kɑkiisɑsɩ nsi pɑ kiisiɣinɑ-ŋ tɑm tɔ sɩ tɔɔ.